Romalılara 13 - Enі Baalantı

Zaabitleri sesleyin

¹ Herkeziniz seslesin üüsek zaabitleri, zerä yok zaabitlik, ani Allahtan olmasın. Zaabit olannar Allahtan sıralanmış.

² Onuştan, kim karşı durêr zaabitlerä, karşı durêr sıraya, ani Allahtan kurulu. Karşı durannar cezalanmış olaceklar.

³ Zerä öndercilerdän yok neçin korkmaa ii işlär için, ama salt kötü işlär için. İsteersin korkmayasın zaabitlerdän mi? Yap ii işlär, da o metedecek seni.

⁴ O – Allahın izmetkeri senin iiliin için. Ama eer kötü yaparsaydın, kork ondan, zerä o naafilä taşımêêr kılıcı. O Allahın izmetindä, Onun üfkesinnän cezalasın kötü yapıcıları.

⁵ Onuştan lääzım boynunuzu iildäsiniz, diil sade Allahın üfkesindän, ama çünkü üreenizdä bilersiniz, ani lääzım bölä yapasınız.

⁶ Onuştan harçları ödeyin, zerä zaabitlär – Allahın izmetçileri, ani hojma çalışêrlar bunu tamannamaa.

⁷ Hepsinä, kimä ne borçluysunuz, verin. Kimä harç, verin harç, kimä vergi, verin vergi. Kimdän lääzım korkmaa, ondan korkun. Kimi lääzım hatırlamaa, onu hatırlayın.

Kardaşçasına sevgilik

⁸ Kalmayın kimseyä bişey borçlu, biri-birinizi sevmektän kaarä. Zerä kim sever başkalarını, o Ayoz Zakonu tamannêêr.

⁹ Zerä sımarlamaklar: «Orospuluk yapmayasın», «öldürmeyäsin», «hırsızlık etmeyäsin», /«yalancı şaat olmayasın»,/ «tamahlanmayasın» hem başka sımarlamaklar da hepsi bu lafta baalı birerdä: «Sev yakın olanını, nicä kendini».

¹⁰ Sevgi yapmêêr kötülük yakın olanına. Ölä ki, sevgi – Ayoz Zakonu tamannamak.

¹¹ Yapın bunu, bileräk, ne vakıtta yaşêêrız. Geldi artık zaman uykudan uyanmaa, zerä şindi bizä kurtulmak taa yakın, nekadar ozaman, açan inanmaa başladık.

¹² Gecä ilerlemiş, gündüz yaklaşêr. Onuştan brakılalım o işlerdän, ne karannıkta yapılêr, da alalım silähları, ani gündüz kullanılêr.

¹³ Yakışıklı yaşayalım, nicä gündüz aydınnıında lääzım. Olmasın ayıp iilenmeklär, sarfoşçuluk, orospuluk hem başka utanç işlär. Aranızda kavga hem kıskançlık olmasın.

¹⁴ Saabi İisus Hristos sizi korusun, siläh gibi. Bakmayın tamannamaa tenin istediklerini.