Romalılara 12 - Enі Baalantı

Eni yaşamak Hristozda

¹ Onuştan, kardaşlar, yalvarêrım Allahın acıyannıınnan, getirin sizin güüdelerinizi bir diri, ayoz, beenilmiş kurban Allaha. Budur sizin hakına izmetçiliiniz.

² Bu vakıtların adetlerinä görä kendinizi kullanmayın, ama Allah fikirinizi enileyip diiştirsin, ki tanıyasınız, nedir Allahın istedii – ne ii, beenilmiş hem taman.

³ Allahın iivergisinnän, ani bana verilmiş, sizä hepsinizä deerim: düşünmeyin kendiniz için taa üstün, nekadar lääzım. Ama ii düşünün o inan ölçüsünä görä, nekadar Allah herkezinä verdi.

⁴ Nicä bizim güüdemiz birdir, ama çok ekleri var, da nicä her ekinin var kendi işi,

⁵ hep ölä biz dä, çokluk olarak, hepsimiz bir güüdä olêrız Hristozda, ayırı-ayırı biri-birimizin ekleri olarak.

⁶ Ayırı baaşışlar kablettik Allahın iivergisinä görä, ani verilmiş bizä. Kimdä var prorokluk baaşışı, onu faydalasın kendi inan ölçüsünä görä.

⁷ Kimdä var izmet baaşışı, izmet etsin. Üürediciseydi, üüretsin.

⁸ Becerärseydi girginnetmää, girginnetsin. Becerärseydi payetmää, cömertliklän payetsin, ne var onda. Önderciseydi, çalışkan olsun. Kim başkalarına yardım eder, bunu yapsın sevinçlän.

⁹ Sizin sevginiz olmasın yapınmaklan. Kötülüktän iirenin, iilää yapışın.

¹⁰ Sevin biri-birinizi kardaşçasına yalpaklıklan. Yarışmaklan biri-birinizä saygı sürün.

¹¹ Çalışkan olun, haylaz olmayın. Duhlan haşlak olun, Saabiyä izmet edin.

¹² Umutlan sevinin, zeettä saburlu olun, kendinizi duaya verin.

¹³ Payedin, ne sizdä var Allahın ayoz halkına, açan o yoklukta. Bakın musaafirci olmaa.

¹⁴ İisözleyin onnarı, kim sizi koolêêr, iisözleyin, ama betvalamayın.

¹⁵ Kim seviner, onnarlan sevinin, kim aalêêr, onnarlan aalayın.

¹⁶ Olun bir düşünmektä biri-birinizlän. Dikleşmeyin, ama kafadarlaşın onnarlan, kim aşaalanêr.

Kin çıkarmayın

¹⁷ Çevirmeyin kimseyä kötülük için kötülük, çalışın yapmaa, ne hepsi insan ii sayêr.

¹⁸ Eer varsa nasıl sizin tarafınızdan, olun barışmakta hepsi insannan.

¹⁹ Sevgili kardaşlar, kimseydän kin çıkarmayın, brakın Allahın üfkesinä, zerä yazılı: «Kin çıkarmak Benimdir, Bän ödeyecäm kötülüklär için, deer Saabi».

²⁰ Buna karşı, eer senin duşmanın aaçsaydı, doyur onu. Susuzsaydı, ver ona su. Eer bölä yaparsan, toplayacan kızgın kömür onun başına.

²¹ Kötülüktän ensenmiş olma, ama iiliklän ensä kötülüü.