Romalılara 11 - Enі Baalantı

Allah brakmadı Kendi insanını

¹ Şindi sorêrım: Acaba Allah Kendi insanından atıldı mı? Olmaz! Bän kendim izrailliyim, Avraamın senselesindän, Veniaminin tamızlıından.

² Allah üzünü çevirmedi Kendi insanından, angısını baştan bilirdi. Ne, bilmeersiniz mi, ne dener Ayoz Yazıda prorok İliya için, nicä o aalaşêr Allaha İzraildän? O deer:

³ «Saabi, Senin proroklarını öldürdülär, kurbannıklarını yıktılar, kaldım salt bän yalnız, benim dä yaşamamı bakêrlar alsınnar».

⁴ Ama ne cuvap eder Allah? «Korudum edi bin adam, angıları diz çökmedilär Vaalın önündä».

⁵ Hep ölä büünkü vakıtta da kaldı az kişi, ani seçilmiş Allahın iivergisinnän.

⁶ Ama eer bu Onun iivergisinnän olmuşsaydı, artık onnarın yaptıklarınnan diil. Başka türlü iivergi artık iivergi diil.

⁷ Ne deyecez? İzrail edenmedi, ne aarardı, ama seçilennär edendilär. Kalannar inatlaştılar,

⁸ nicä yazılı: «Allah verdi bir uyvaşıklık duhu onnara, ki gözlerinnän görmesinnär, kulaklarınnan işitmesinnär büünkü günä kadar».

⁹ David deer: «Onnarın sofraları arkan hem tuzak gibi olsun, yada nicä bir kapkan cezalık için onnara.

¹⁰ Gözleri kararsın, görmesinnär deyni, hem arkaları herzaman kamburlansın».

¹¹ Şindi sorêrım: iudeylär kösteklendilär, heptän düşsünnär deyni mi? Olmaz! Ama onnarın sürçmekleri kurtulmak getirdi başka milletlerä, ki butakım iudeylerdä debreşsin kıskançlık.

¹² Eer onnarın sürçmekleri dünneyä zenginnikseydi, hem küçülmekleri başka milletleri zenginnettiseydi, bütünnükleri nekadar taa büük bir zenginnik getirecek!

¹³ Danışêrım sizä, başka milletlerä: nicä apostol, ani başka milletlerä yollanmış, bän kendi izmetçiliimi metinni sayêrım,

¹⁴ ki debreştireyim kıskançlık benim senselemdä da kurtarabileyim baarlem kimisini.

¹⁵ Eer onnarın atılmalarınnan dünnä Allahlan barıştıysa, kabledilmeleri, ölümdän yaşamaa geçmektän başka, ne olur?

¹⁶ Eer ayozsaydı hamurun ilk parçası, ozaman bütün hamur ayoz. Eer kökü ayozsaydı, dalları da ayoz.

¹⁷ Zeytin fidanından kimi dallar kesildi, da sän, yaban zeytin fidanından filiz, haşlandın onnarın erinä. Aslı zeytin fidanın semiz kökündän suyu çekersin.

¹⁸ Öleysä, üünmä kesilmiş dalların önündä. Eer üünärseydin, unutma, ani tutmêêrsın sän kökü, ama kök tutêr seni.

¹⁹ Sän deersin: «Dallar kesildilär, ki bän haşlanayım».

²⁰ Dooru. Onnar kesildilär inansızlık beterinä, ama sän inannan ayakça durêrsın. Onuştan şişkinnenmä, ama kork!

²¹ Zerä Allah kıydı hakına fidanın dallarını, onuştan kıyar seni dä.

²² Esap al Allahın iiliini hem kıyaklıını: kıyaklık onnar için, kim düştü, iilik senin için, sade tutunarsaydın Allahın iiliindän, başka türlü sän dä kesilirsin.

²³ Eer onnar da kalmarsaydılar inansızlıkta, enidän hakına fidana haşlanaceklar, zerä Allahın var kuvedi enidän geeri onnarı haşlasın.

²⁴ Eer sän kesilmişseydin yaban fidandan da, olmayarak hakına, haşlanmışsaydın ii zeytin fidanına, nekadar taa kolay olur, haşlanılsın kendi dalları zeytin fidanına!

²⁵ Kardaşlar, istämeerim, ani bu saklı işi bilmeyäsiniz. Bu sizi koruyacek, kendinizi aarif sayasınız. İzrail bir parça vakıda inatlaştı, başka milletlerdän inancıların sayısı tamannanınca.

²⁶ Bitkidä bütün İzrail kurtulacek, nicä yazılı: «Kurtarıcı Siondan gelecek, İakovun soyundan allahsızlıı uzaklaştıracek.

²⁷ Budur baalantım, ani onnarlan yapacam, açan onnarın günahlarını silecäm».

²⁸ İi Haberä karşı durup, onnar Allaha duşman oldular, da bu ii oldu sizin için. Ama çünkü Allah onnarı seçti, onnar Allahın sevilmişleri onnarın bobaların hatırı için.

²⁹ Zerä Allah kararını diiştirmäz onnar için, kimi çaarêr hem kimä baaşışlarını verär.

³⁰ Nicä siz vakıdın birindä seslämärdiniz Allahı, ama onnarın seslämemeklerin beterinä acıyannık edendiniz Allahtan,

³¹ hep ölä, nicä sizä acıyannık gösterildi, onnar da şindi seslämeerlär, ki onnar da acıyannık edensinnär.

³² Zerä Allah yaptı hepsi insanı nicä kapana düşmüş seslämemekleri beterinä, ki hepsini acısın.

³³ Bakın, ne derindir Allahın zenginnii, aariflii hem bilgiçlii! Nekadar kenarsız Onun kararları hem tanınmadık Onun yolları!

³⁴ «Acaba kim tanıyabilir Allahın fikirini, hem kim var nasıl Onun nasaatçısı olsun?

³⁵ Kim Allaha bişey verdi, ki sora ödek geeri istesin?»

³⁶ Hepsi Ondan kuruldu, Onun kuvedinnän korunêr hem Onun için var. Ona metinnik daymalardan daymalara! Amin.