Romalılara 10 - Enі Baalantı

¹ Kardaşlar, üreemin istedii hem duam Allaha budur: izraillilär kurtulsunnar.

² Doorusunu söleyim, onnarda çalışmak var Allah için, ama diil aarifçesinä.

³ Zerä annamêêrlar, nicä Allah insanı dooru sayêr, hem bakêrlar kendi-kendilerini doorulaa çıkarmaa, onuştan kayıl olmadılar Allahın dooruluuna.

⁴ Zerä Hristos – Zakonun bitkisi, ki herkezi, kim inanêr, dooruluk edensin.

⁵ Moisey bölä yazdı Zakondan dooru sayılmak için: «Kim Zakonun sımarlamaklarını tamannayacek, o yaşayacek».

⁶ Ama inannan dooru sayılmak için bölä dener: «Demä kendi-kendinä: „Kim gökä kalkacek?“, ki Hristozu indirsin,

⁷ eki: „Kim dipsizlää inecek?“, ki Hristozu ölüdän kaldırsın».

⁸ Ne dener? «Allahın sözü yakın sana, senin aazında hem üreendä». Bu sözü, ani inan için, biz nasaat ederiz.

⁹ Eer aazından açık sölärseydin «İisus Saabidir» hem ürektän inanarsaydın, ani Allah ölüdän Onu diriltti, ozaman kurtulacan.

¹⁰ Zerä kim ürektän inanêr, o dooruluk edener, hem kim aazından şaatlık eder, o kurtulmak edener.

¹¹ Nicä Ayoz Yazı deer: «Kim Ona inanar, utanmış kalmaz».

¹² Yok ayırmak iudeylerin hem urumnarın arasında, zerä hepsinin Saabisi birdir. O herkezinä cömert, kim Onu çaarêr.

¹³ Zerä: «Kim Saabinin adını çaaracek, o kurtulacek».

¹⁴ Ama nesoy var nasıl çaarsınnar Onu, Kimä inanmadılar? Nesoy var nasıl inansınnar Ona, Kimin için işitmedilär? Nesoy var nasıl işitsinnär, eer kimsey nasaat etmärsä?

¹⁵ Nesoy var nasıl nasaat etsinnär, eer yollanmış diilseydilär? Nicä yazılı: «Ne yakışıklı ayakları onnarın, kimnär /usluluk hem/ İi Haberi nasaat ederlär!»

¹⁶ Ama hepsi İi Haberi seslämedi. Nicä İsaya deer: «Saabi, kim inandı bizim haberi?»

¹⁷ Ölä ki, inan geler haberi işitmektän, işitmäk tä olêr, eer Hristos için nasaat edilirsä.

¹⁸ Ama şindi sorêrım: ne, işitmedilär mi? Elbetki, işittilär. «Onnarın sesleri işidildi bütün er üstündä, hem lafları etişti erin kenarlarına da».

¹⁹ Enidän sorêrım: «Ne, İzrail bilmärdi mi bunnarı?» Aslı, ani bilärdi, zerä ilkin Moisey dedi: «Allah deer: Bän debreştirecäm sizdä bir kıskançlık o insannarlan, angılar millet sayılmaz, kızdıracam sizi bir annamaz halklan».

²⁰ Sora İsaya kıyışmaklan deer: «Allah deer: Beni buldular onnar, kim aaramardı, Bän onnara açıldım, kim Beni sormardı».

²¹ Ama İzrail için deer: «Bütün gün uzattım ellerimi bir seslämeyän hem karşı duran halka».