Romalılara 1 - Enі Baalantı

Seläm

¹ Bän, Pavli, İisus Hristozun çıraa, çaarılmış apostol olmaa, seçilmiş Allahın İi Haberini annatmaa, seläm yollêêrım.

² Allah öncä adadı bu İi Haberi prorokların aazınnan Ayoz Yazılarda.

³ Bu İi Haber – Kendi Oolu, Saabimiz İisus Hristos için, ani tencesinä duudu Davidin senselesindän,

⁴ ama Kendi ayoz duhunnan, kuvetlän belli oldu, ani O Allahın Oolu, zerä ölümdän dirildi.

⁵ Ondan biz kablettik iivergi, apostol olalım Onun adınnan, ki Ona inansınnar hem seslesinnär hepsi milletlerdän insannar,

⁶ angıların arasında siz dä bulunêrsınız, ani çaarıldınız İisus Hristozdan.

⁷ Hepsinizä, Romada olannara, sevilmiş Allahtan, çaarılmış ayoz olmaa – iivergi hem usluluk sizä bizim Boba Allahtan hem Saabi İisus Hristozdan!

Pavli isteer gelsin Roma kasabasına

⁸ Hepsindän öncä şükür ederim benim Allahıma İisus Hristos adınnan hepsiniz için, zerä haber sizin inan için daalêr bütün dünnedä.

⁹ Bana şaattır Allah, Angısına izmet ederim bütün üräämnän, annadarak İi Haberi Onun Oolu için, ani sizi durmamayca, herzaman anêrım benim dualarımda.

¹⁰ Yalvarêrım, ki Allahın istedii olursa, bitkidä olsun kolaylıım, geleyim sizä.

¹¹ Zerä pek isteerim göreyim sizi hem sizinnän paylaşayım bir baaşış Duhtan sizin kaavilenmeniz için,

¹² doorusu, ki bän aranızdaykan, havezlenelim biri-birimizin inanınnan – sizin inanızlan bän, benim inanımnan da siz.

¹³ İstämeerim, kardaşlar, ki bilgisiz kalasınız. Çok sıra neetlendim geleyim sizä, ama şindiyä kadar kösteklär bana karşı çıktı. İsteerim sizdä dä faydalı bir iş yapayım, nicä başka milletlerdä.

¹⁴ Bän borçluyum urumnara hem varvarlara, bilgiçlerä hem bilgisizlerä.

¹⁵ Tä neçin bän ölä büük çalışmaklan nasaat ederim İi Haberi sizä dä, ani yaşêêrsınız Roma kasabasında.

Dooruluk inannan

¹⁶ Zerä bän utanmêêrım /Hristozun/ İi Haberindän. O bir kuvet Allahtan, ki kurtarsın hepsini, kim inanêr, ilkin iudeyleri, sora urumnarı da.

¹⁷ Zerä İi Haberdä açılêr, nicä Allah insannarı dooru sayêr. Dooru sayılmak baştan bitkiyä kadar inannan olêr, nicä dä yazılı: «Dooru olan inannan yaşayacek».

Hepsi günahker

¹⁸ Zerä göktän Allahın üfkesi açılêr insannarın herbir allahsızlıına hem haksızlıına, angıları kendi kötülüklerinnän aslılıı bastırêrlar.

¹⁹ Çünkü ne var nicä Allah için bilmää, onnara açık, zerä Kendi Allah onnara açtı.

²⁰ Allahın görümsüzlüü – Onun sonsuz kuvedi hem allahlıı – açık görüner dünneyin kurulmasından, zerä bunnar açılêr Onun yaradılmış işlerindän. Ölä ki, onnar cuvapsız kalır.

²¹ Onnar Allahı tanıyêrlar, ama nicä düşer, metinnämedilär hem şükür etmedilär Onu, verildilär boş düşünmeklerä, da onun için onnarın annamaz üreklerinä karannık bastı.

²² Sayarak kendilerini aarif, akılsız oldular.

²³ Ölümsüz Allahı metinnemäk erinä idollara döndülär, angıları benzeerlär ölümnü insannara, kuşlara, dört bacaklı hayvannara hem sürünennerä.

²⁴ Onuştan Allah onnarı braktı, üreklerinin havezlerinnän mındarlansınnar, ki biri-birilerin güüdelerini aşaalatsınnar.

²⁵ Onnar Allahın aslılıını yalana diiştirdilär. Yaradıcının erinä yaradılmış işlerä izmet ettilär hem baş iilttilär. Allaha metinnik divecä kadar! Amin.

²⁶ Bu beterä Allah braktı onnarı kendi ayıp havezlerinä. Onnarın karıları, sırasınca birleşmäk erinä, diil dooru istediklerinä verildilär.

²⁷ Hep ölä erkeklär, brakıp sırasınca birleşmää karıylan, biri-birinä tutuştular. Erkeklär erkeklärlän ayıplık yaptılar hem kendi güüdelerinä cezayı kablettilär, ne düşer onnarın şaşırıklıı için.

²⁸ Çünkü Allahı tanımakta fayda görmedilär, Allah onnarı faydasız fikirlerinä braktı, yapsınnar, ne diil lääzım.

²⁹ Ölä ki, onnar doldular hertürlü kötülüklän, /orospuluklan,/ fenalıklan, tamahlıklan, kinniklän. Doldular kıskançlıklan, öldürmäklän, kavgaylan, yalannarlan, kötü neetlärlän.

³⁰ Onnar fitleyici, maanacı, Allahı sevmeyän, kalın üzlü, hodul, kabarık, kötü yapıcı, ana-bobayı seslämeyici,

³¹ annamayan, lafını tutmayan, sevgisiz, /uzlaşmayan,/ acıyansız insannardır.

³² Onnar bilerlär Allahın dooru kararını, ani bölä yapannar lääzım kayıp olsunnar. Ama onnar diil sade kendileri yapsınnar, ama başka yapannarı da metederlär.