Matfey 4 - Enі Baalantı

Şeytan deneer İisusu

¹ Ozaman İisus Ayoz Duhlan çola götürüldü, ki diavoldan denenilmiş olsun.

² İisus kırk gün hem kırk gecä oruç tuttu da sonda acıktı.

³ Deneyici, Ona yaklaşıp, dedi: «Eer Sän Allahın Oolusaydın, sımarla bu taşlara, ekmek olsunnar».

⁴ İisus cuvap etti: «Yazılı, ani „Adam yaşamêêr salt ekmeklän, ama herbir sözlän, ani çıkêr Allahın aazından“».

⁵ Sora alêr Onu diavol ayoz kasabaya da koyêr Ayoz bina saçaana,

⁶ da deer Ona: «Eer Sän Allahın Oolusaydın, atıl erä, zerä yazılı: „Allah Kendi angillerinä sımarlayacek, Seni baksınnar“ hem „Seni kucak alaceklar, urulmayasın ayaannan bir taşa deyni“».

⁷ İisus dedi: «Hep ölä yazılı var: „Denämä senin Saabi Allahını“».

⁸ Sora diavol Onu bir pek üüsek bayır üstünä götürdü. Gösterdi Ona dünneyin hepsi padişahlıklarını hem onnarın metinniini da dedi:

⁹ «Bunnarı hepsini Sana verecäm, eer, düşüp, bana baş iildärsän».

¹⁰ Ozaman İisus cuvap etti ona: «Çekil Bendän, şeytan, zerä var yazılı: „Baş iilt Senin Saabi Allahına hem salt Ona izmet et“».

¹¹ Ozaman diavol Onu braktı. Angillär, gelip, izmet etmää İisusa başladılar.

İisus başlêêr nasaat etmää

¹² İisus açan işitti, ani İoan kapana koyuldu, döndü geeri Galileyaya.

¹³ Brakıp Nazareti, geldi da erleşti Kapernaum kasabasında, göl boyunda, Zavulon hem Neffalimin erlerindä,

¹⁴ ki tamannansın, ne haberlenmişti prorok İsayadan, angısı deer:

¹⁵ «Zavulonun hem Neffalimin erleri göl boyunda, İordan aşırı, Galileya, neredä yabancılar yaşêêrlar!

¹⁶ Karannıkta yaşayan insan gördü büük şafk. Ölüm gölgesinin memleketindä yaşayannara şafk duudu».

¹⁷ Ondan sora İisus başladı nasaat etmää hem demää: «Dönün Allaha günahlarınızdan, zerä yaklaştı Gök Padişahlıı».

İisusun ilk üürenicileri

¹⁸ Açan İisus geçärdi Galileya gölün boyundan, gördü iki kardaş: Simonu, angısına deyärdilär Petri, hem Andreyi, onun kardaşını, angıları atardı süzmeyi su içinä, çünkü onnar balıkçıydı.

¹⁹ İisus dedi onnara: «Gelin Benim ardıma, sizi insan tutannarı yapacam».

²⁰ Onnar çabuk braktı süzmeleri da gitti Onun ardına.

²¹ Gidip oradan taa ileri, gördü başka iki kardaş: İakovu, Zevedeyin oolunu, hem İoanı, onun kardaşını, angıları kendi bobalarınnan, Zevedeylän, kayık içindä süzmelerini tertiplärdi. Onnarı da çaardı.

²² Onnar çabuk braktı kayıı hem bobalarını da gitti Onun ardına.

İisus için haber daalêr

²³ İisus gezärdi bütün Galileyada hem üüredärdi insanı sinagogalarda, nasaat ederäk Gök Padişahlıı için İi Haberi. Alıştırardı hertürlü hastalıktan hem derttän insanı.

²⁴ Onun için haber daaldı bütün Siriya erlerindä. Ona getirärdilär hepsini, kim zeetlenärdi hertürlü hastalıktan, aarıdan, fena duhlardan, kara hastalıktan hem paraliç hastalıından. Onnara saalık verärdi.

²⁵ Onun ardına gidärdi çok insan Galileyadan, Dekapolistän, İerusalimdän, İudeyadan hem İordanın öbür tarafından.