Matfey 3 - Enі Baalantı

İoan Vaatizedicinin nasaadı

¹ O vakıt geler İoan Vaatizedici İudeyanın çoluna da nasaat eder,

² deyip: «Dönün Allaha günahlarınızdan, zerä yaklaştı Gök Padişahlıı!»

³ İoan odur, kimin için haberlediydi prorok İsaya: «Baaranın sesi çol erdä işidiler: „Saabiyä yolu hazırlayın, yolcaazları uzladın“».

⁴ İoan giiyimniydi devä yapaasından rubaylan hem kuşanıktı deridän kayışlan. Onun imeesi – çekirgelär hem kır arı balı.

⁵ İnsannar İerusalimdän, bütün İudeyadan hem İordanın dolaylarından çıkardılar ona.

⁶ Vaatiz olardılar ondan İordan deresindä, açıklayarak kendi günahlarını.

⁷ Açan İoan gördü çok farisey hem sadukey, ani ona gelärdilär, vaatiz olsunnar deyni, o dedi onnara: «Yılan yavruları, kim üüretti sizi, kaçasınız Allahın gelär üfkesindän?

⁸ Yapın yakışıklı meyva, görünsün, ani döndünüz Allaha günahlarınızdan.

⁹ Boşuna düşünmeyin, deyip: „Bizim bobamız – Avraam“, zerä söleerim sizä, ani Allah bu taşlardan var nasıl yapsın uşak Avraama.

¹⁰ Artık nacak fidannarın kökündä saplı durêr. Herbir fidan, ani getirmeer ii meyva, kesilecek da ateşä atılacek.

¹¹ Bän sizi suylan vaatiz ederim, gösterilsin, ani döndünüz Allaha günahlarınızdan, ama bendän sora gelän – bendän taa kaavi. Bän diilim yakışıklı taşımaa Onun ayak kaplarını. O sizi Ayoz Duhlan hem ateşlän vaatiz edecek.

¹² Onun elindä kürek, O paklayacek tınazını. Boodayı toplayacek ambara, ama plävayı yakacek süünmäz ateştä».

İisus vaatiz olêr

¹³ O vakıt İisus geldi Galileyadan İordan deresinä İoana, vaatiz olsun ondan deyni.

¹⁴ İoan durgudardı Onu, deyip: «Bän lääzım Sendän vaatiz olayım, Sän sa bana gelersin?»

¹⁵ Ama İisus ona cuvap etti: «Brak şindi, zerä bölä düşer, tamannayalım hepsini, ne dooru». Ozaman İoan braktı Onu, vaatiz olsun.

¹⁶ Açan İisus vaatiz oldu da çıktı su içindän, gök açıldı da İoan gördü Allahın Duhunu, Angısı inärdi bir guguş gibi hem konardı İisusun üstünä.

¹⁷ Göktän işidildi bir ses, ani dedi: «Budur Benim sevgili Oolum, Onda Benim isleeliim».