Matfey 28 - Enі Baalantı

İisus diriler

¹ Cumertesi geçtiktän sora, açan aydınnanırdı haftanın ilk günü, Mariya Magdalina hem öbür Mariya geldilär görmää mezarı.

² Birdän oldu bir büük er tepremesi, zerä bir angil Saabidän indi göktän da, gelip, devirdi taşı mezarın aazından da oturdu taş üstünä.

³ Onun görümü çimçirik gibiydi. Rubaları biyazdı nicä kaar.

⁴ Bekçilär korkudan titiredilär da ölü gibi erä düştülär.

⁵ Angil dedi karılara: «Korkmayın, zerä bilerim, ani aarêêrsınız stavroza gerilmiş İisusu.

⁶ O yok burada, O dirildi, nicä sölediydi. Gelin, görün erini, neredä Saabi koyuluydu.

⁷ Da hızlı gidin, söleyin Onun üürenicilerinä, ani O dirildi ölüdän. O gider sizdän öncä Galileyaya. Orada göreceniz Onu. Tä bän sizä söledim».

Karılar görerlär Hristozu

⁸ Onnar hızlı çıktılar mezar içindän korkuylan hem büük sevinmäklän, kaçarak gittilär, haber versinnär üürenicilerinä.

⁹ Ama açan gidärdilär, sölesinnär üürenicilerinä, tä, Kendi İisus karşı çıkêr onnara da deer: «Seläm!» Onnar yaklaştılar, sarmaştılar ayaklarına da baş iilttilär Ona.

¹⁰ Ozaman İisus dedi onnara: «Korkmayın, gidin da söleyin kardaşlarıma, gitsinnär Galileyaya. Orada Beni göreceklär».

Bekçilär satın alınêr

¹¹ Açan onnar gidärdilär, kimisi bekçilerdän girdilär kasaba içinä da söledilär hepsi bu oluşlar için büük popazlara.

¹² Bunnar toplandılar aksakallarlan bireri da, annaşıp, verdilär çok para bekçilerä,

¹³ deyip onnara: «Söleyin bölä: „Onun üürenicileri geldilär gecä, da biz uyuyarkan çaldılar Onun güüdesini“.

¹⁴ Bu haber etişärseydi kullanıcının kulaana, biz onu inandıracez, da sizi beladan kurtaracez».

¹⁵ Askerlär aldılar parayı da yaptılar ölä, nicä onnarı üürettilär. İudeylerin arasında bu haber daaldı da etişti büünkü günä kadar.

İisusun bitki sımarlaması

¹⁶ Onbir üürenici gittilär Galileyaya bayırın üstünä, nereyi İisus sımarladıydı.

¹⁷ Gördülär Onu da baş iilttilär Ona, ama kimisi şüpeli kaldı.

¹⁸ İisus, yaklaşıp onnara, dedi: «Bana bütün zaabitlik verildi göktä hem erdä.

¹⁹ Gidin da hepsi milletleri Bana üürenici yapın, vaatiz edip onnarı Bobanın hem Oolun hem Ayoz Duhun adına.

²⁰ Üüredin, hepsini tamannasınnar, ne sizä sımarladım. Da biliniz, Bän olacam sizinnän her gün, zamanın bitkisinädän». /Amin./