Matfey 27 - Enі Baalantı

İisusu götürerlär kullanıcı Pilata

¹ Açan sabaa oldu, büük popazlar hem halk aksakalları annaştılar İisusu öldürsünnär.

² Baalayıp Onu, götürdülär da verdilär kullanıcı Pontiy Pilata.

İuda asılêr

³ Açan İuda, ani sattı İisusu, annadı, ani İisusu daavaya verdilär, pişman oldu. Getirdi geeri otuz gümüşü da verdi büük popazlara hem aksakallara.

⁴ O dedi: «Günaha girdim, zerä kabaatsız adam kanı sattım». «Bizä ne? Sän kendin bak», – cuvap etti onnar.

⁵ İuda attı gümüşleri Ayoz bina içinä, sora gitti da asıldı.

⁶ Büük popazlar topladılar gümüşleri da dedilär: «Düşmär koymaa bu parayı Ayoz binanın haznasına, zerä bu kan parası».

⁷ Annaştılar bu paraylan çölmekçinin tarlasını satın alsınnar, mezar eri olsun, yabancıları gömmää deyni.

⁸ Onuştan büünkü günä kadar bu tarlanın adı: «Kan tarlası».

⁹ Ozaman tamannandı, ne haberlediydi prorok İeremiya, angısı deer: «Aldılar otuz gümüşü, paa kuruşunu, ani İzrail oolları kurdu Onun için,

¹⁰ da verdilär çölmekçinin tarlası için, nicä bana Saabi söledi».

İisus Pilatın önündä

¹¹ İisus çıktı kullanıcının önünä, angısı sordu Ona: «Sänsin mi İudeylerin Padişahı?» «Ölä, nicä söleersin», – cuvap etti İisus.

¹² Ama büük popazların hem aksakalların amazlarına hiç cuvap etmedi.

¹³ Ozaman Pilat dedi Ona: «Ne, işitmeersin mi, nekadar çok kabaatlandırêrlar Seni?»

¹⁴ İisus ona hiç bir dä laf cuvap etmedi. Kullanıcı buna pek şaştı.

İisus hem Varavva

¹⁵ Her Paskellä yortusunda kullanıcı, adetinä görä, kolverärdi kapancılardan birisini, kimi insan istärdi.

¹⁶ O vakıt kapalıydı bir anılmış adam, adı Varavva.

¹⁷ Açan hepsi topluydular, Pilat sordu onnara: «Kimi isteersiniz kolvereyim? Varavvayı mı osa İisusu mu, Angısına dener Hristos?»

¹⁸ Zerä bilärdi, ani haseetlik beterinä verdilär İisusu onun elinä.

¹⁹ Açan Pilat taa oturardı daava skemnesindä, onun karısı yolladı ona, sölesinnär: «Bak yapmayasın bişey bu dooru adama. Bu gecä çok zeet çektim, açan Onu düşümdä gördüm».

²⁰ Büük popazlar hem aksakallar kızıştırdılar insanı istesinnär Varavvayı, ama İisusu öldürsünnär.

²¹ Kullanıcı sordu onnara: «Angısını onnarın ikisindän kolvereyim?» «Varavvayı!» – baardılar onnar.

²² Pilat dedi onnara: «Ne yapayım İisuslan, Angısına dener Hristos?» «Gerilmiş olsun stavroza!» – baardılar onnar.

²³ Kullanıcı dedi: «E ne kötülük yaptı?» Ama onnar çekettilär taa pek baarmaa: «Gerilmiş olsun stavroza!»

²⁴ Açan Pilat gördü, ani bişey yapamêêr, buna karşı, kalabalık debreşer, aldı su, yıkadı ellerini insanın önündä da dedi: «Bän diilim kabaatlı bu dooru Adamın kanı için. Bakın kendiniz!»

²⁵ Hepsi insan cuvap etti: «Onun kanı düşsün bizim üstümüzä hem bizim uşaklarımızın üstünä».

Askerlär gülmää alêrlar İisusu

²⁶ Ozaman Pilat kolverdi Varavvayı, ama İisusu kamçılayıp, verdi, ki gersinnär stavroza.

²⁷ Sora kullanıcının askerleri götürdülär İisusu Pretoriuma. Onun dolayına toplandılar hepsi askerlär.

²⁸ Soyundurdular Onun rubalarını da giidirdilär kırmızı üst ruba.

²⁹ Ördülär tikenni çalıdan bir feneţ da koydular Onun başına, sora verdilär bir sopa saa elinä. Diz çökürdülär önündä da, gülmää alıp, deyärdilär: «Seläm Sana, İudeylerin Padişahı!»

³⁰ Tükürürdülär Onun üstünä, sora alıp sopayı, kafasına ururdular.

³¹ Gülmää aldıktan sora soyundurdular kırmızı üst rubayı, giidirdilär Kendi rubalarını da götürdülär Onu, stavroza germää.

İisusu gererlär stavroza

³² Kasabadan çıkarkan, karşı geldilär kirineli bir adamnan, adı Simon. Onu zorladılar, götürsün İisusun stavrozunu.

³³ Açan etiştilär o erä, ani adı Golgofa, annaması «baş kemii eri»,

³⁴ verdilär içsin şarap, karışık acı bişeylän, ama İisus, dadıp, istämedi içsin.

³⁵ Gerdiktän sora, attılar çetelä da payettilär Onun rubalarını.

³⁶ Sora oturdular da yanında bekçilik edärdilär.

³⁷ Başı üstündä taktılar kabaatını, yazılı: «İisus – İudeylerin Padişahı».

³⁸ Onunnan barabar stavroza gerdilär iki haydut: birisini saa, öbürünü dä sol tarafına.

³⁹ Oradan geçennär kötülärdilär Onu da, başlarını sallayarak, deyärdilär:

⁴⁰ «Sän, ani yıkêrsın Ayoz binayı da üç gündä enidän yapêrsın, eer Sän Allahın Oolusaydın, kurtar Kendini da in erä stavrozdan!»

⁴¹ Hep ölä büük popazlar, bilgiçlär hem aksakallar /fariseylärlän barabar/ gülmää alardılar Onu da deyärdilär:

⁴² «O başkalarını kurtardı, ama Kendini kurtaramêêr! Eer O İzrailin padişahıysa, insin erä stavrozdan, da biz inanacez Ona!

⁴³ Umutlanardı Allaha, ko şindi kurtarsın Onu Allah, eer Onu sevärsä. Zerä O Kendi deyärdi: „Bän Allahın Ooluyum!“»

⁴⁴ Haydutlar, ani geriliydilär Onunnan, hep ölä kötülärdilär Onu.

İisus öler

⁴⁵ Altıncı saattan dokuzuncu saada kadar oldu karannık bütün memlekettä.

⁴⁶ Dokuzuncu saadın dolayında İisus baardı büük seslän: «Eli! Eli! Lema şevaktani?» Annaması: «Allahım! Allahım! Neçin Beni braktın?»

⁴⁷ Orada durannardan kimisi, işidip bu lafları, dedilär: «O çaarêr İliyayı!»

⁴⁸ Birisi kaçtı, çabuk aldı bir sünker, bandırdı onu iişi şarap içinä da, takıp bir sopaya, verdi, içsin.

⁴⁹ Ama kalanı deyärdilär: «Durun, bakalım, gelecek mi İliya, kurtarsın Onu?»

⁵⁰ İisus enidän baardı büük seslän da verdi duhunu.

Ayoz binanın perdesi yırtılêr

⁵¹ Birdän Ayoz binanın içindä perdä yırtıldı iki parçaya, yukardan aşaa kadar. Er tepredi, taşlar çatladılar,

⁵² mezarlar açıldılar. Çok ayozların güüdeleri, ani öldüydülär, dirildilär

⁵³ da, mezarlar içindän çıkıp, Onun dirilmesindän sora girdilär ayoz kasabaya da çoyuna gösterildilär.

⁵⁴ Asker üzbaşı hem askerlär, ani bekçilik edärdilär İisusun yanında, açan gördülär er tepremesini hem hepsini, ne oldu, pek korktular da dedilär: «Hakına, O Allahın Ooluydu!»

⁵⁵ Orada vardı çok karı, angıları uzaktan siiredärdilär, hem angıları Galileyadan gittiydilär İisusun ardına, izmet ederäk Ona.

⁵⁶ Onnarın arasında Mariya Magdalina hem Mariya, İakovun hem İosifin anaları, hem Zevedeyin oolların anaları.

İisusu gömerlär

⁵⁷ Avşamnen geldi bir zengin adam, adı İosif, Arimafeya kasabasından, hep İisusun üürenicilerindän.

⁵⁸ Gitti Pilata da istedi İisusun güüdesini. Pilat izin etti, versinnär ona.

⁵⁹ İosif aldı güüdeyi da sardı biyaz keten çarşaflan,

⁶⁰ erleştirdi Onu kendi mezarı içinä, angısını oymuştu kanarada. Sora devirdi bir büük taş mezarın kapusuna da gitti.

⁶¹ Oradaydı Mariya Magdalina hem öbür Mariya. Onnar otururdular mezara karşı.

Bekçilär mezarda

⁶² Ertesi günü, cumaa günündän sora, büük popazlar hem fariseylär toplandılar Pilatın önünä da dedilär:

⁶³ «Çorbacı, biz aklımıza getirdik, ani o aldadıcı, taa yaşarkan, dedi: „Üçüncü günü dirilecäm“.

⁶⁴ Onuştan sımarla, beklenilsin mezar üçüncü günä kadar, ki birtürlü gelmesinnär Onun üürenicileri gecä da çalmasınnar güüdesini, sora demesinnär insana, ani dirildi ölüdän. Bu son yalan olacek taa kötü ilkinkisindän».

⁶⁵ Pilat dedi: «Var bir bölük bekçiniz, gidin da koruyun mezarı, nicä bilersiniz».

⁶⁶ Onnar gittilär da korudular mezarı bekçilärlän, mühürleyip taşı.