Matfey 24 - Enі Baalantı

Bitki vakıdın nışannarı

¹ Açan İisus çıktı Ayoz binadan da yollandı gitmää, üürenicilär yaklaştılar Ona, göstersinnär Ayoz binanın yapılarını.

² Ama İisus dedi onnara: «Görersiniz mi hepsini bunnarı? Dooru söleerim sizä, ani kalmayacek burada taş üstündä taş, hepsi yıkılacek».

³ Açan İisus oturdu Zeytin bayırı üstündä, üürenicileri yalnız Ona yaklaştılar da dedilär: «Sölä bizä, nezaman olacek bunnar hem nesoy nışan Senin gelmeni hem zamanın bitkisini gösterecek?»

⁴ İisus cuvap etti onnara: «Bakın, birkimsey aldatmasın sizi.

⁵ Zerä çoyu gelecek Benim adıma da deyecek: „Bänim Hristos“, da çoyunu aldadaceklar.

⁶ İşideceniz cenk uultusu hem haber cenklär için. Bakın, korkmayasınız. Zerä hepsi bunnar lääzım olsun, ama bu taa diil bitkisi.

⁷ Zerä millet milletä, padişahlık padişahlaa karşı kalkacek. Kimi erlerdä olacek aaçlık, /salgınnar/ hem er tepremeleri.

⁸ Ama hepsi bunnar salt büük kahırların çeketmesi.

⁹ Ozaman zeetleyeceklär sizi hem öldüreceklär, hem Benim adım için hepsi milletlär sizdän azetmeyecek.

¹⁰ Çoyu inandan düşecek. Biri-birini sataceklar hem azetmeyeceklär biri-birindän.

¹¹ Kalkacek çok yalancı proroklar da çoyunu aldadaceklar.

¹² Zakonsuzluk zeedelenecek, onuştan çoyunda sevgi suuacek.

¹³ Ama kim bitkiyädän dayanacek, o kurtulacek.

¹⁴ Gök Padişahlıın İi Haberi bütün dünnedä nasaat olacek, şaatlık olsun hepsi milletlerä, da ozaman bitkisi gelecek.

¹⁵ Ölä ki, açan göreceniz dikili ayoz erdä iirenç işi, ani bozgunculuk yapêr, angısı için lafetti prorok Daniil, – kim okuyêr, annasın –

¹⁶ ozaman kim olacek İudeyada, kaçsın bayırlara.

¹⁷ Kim bulunacek ev üstündä, inmesin almaa bişey içyandan.

¹⁸ Kim olacek kırda, dönmesin geeri üst rubasını almaa.

¹⁹ O günnerdä vay maamul hem uşak emzirän karılara!

²⁰ Dua edin, kaçmanız razgelmesin kışın eki cumertesi.

²¹ Zerä ozaman büük zeet olacek, ani olmadı dünneyin kurulmasından büünädän hem olmayacek da.

²² Eer o vakıt kısaldılmaydı, kimsey kurtulamayaceydı, ama seçilmişlerin hatırı için o vakıt kısaldıldı.

Adam Oolunun gelmesi

²³ Ozaman eer birkimsey deyärseydi sizä: „Tä, Hristos burada!“ eki: „Hristos orada!“, inanmayın.

²⁴ Zerä peydalanacek yalancı hristoslar hem yalancı proroklar. Yapaceklar büük nışannar hem şaşmaklı işlär, aldatsınnar deyni, olarsaydı kolay, artık seçilmiş olannarı da.

²⁵ Tä, Bän vakıtça sizä haberledim.

²⁶ Ölä ki, eer deyärseydilär sizä: „Tä, O çol erdä!“, gitmeyin, eki: „Tä, O saklı içerdä!“, inanmayın.

²⁷ Zerä, nicä çimçirik çakêr günduusundan da görüner günbatısına kadar, ölä olacek Adam Oolunun gelmesi dä.

²⁸ Neredä olacek leş, orayı toplanacek leş kartalları.

²⁹ O zeet günnerindän sora hemen gün kararacek, ay vermeyecek aydınnıını, yıldızlar göktän düşeceklär, hem gökün kuvetleri sarsalanacek.

³⁰ Ozaman göktä Adam Oolunun nışanı gösterilecek. Ozaman hepsi erdeki senselelär aalayacek. Göreceklär Adam Oolunu, gelärkän gökün bulutları üstündä büük kuvetlän hem metinniklän.

³¹ O yollayacek büük boru sesinnän angillerini. Onnar toplayaceklar Onun seçilmişlerini dört taraftan, gökün bir kenarından öbür kenarınadan.

³² İncir fidanından örnek alın. Açan dalları yımışêêrlar, hem yaprakları eşererlär, bilersiniz, ani yaz yakın.

³³ Hep ölä, siz dä açan göreceniz hepsi bunnarı, biliniz, ani bu iş yakın, artık kapuda.

³⁴ Dooru söleerim sizä, ani bu boy insan geçmeyecek, hepsi bunnar tamannanmayınca.

³⁵ Er hem gök geçecek, ama Benim sözlerim hiç geçmeyecek.

Gün hem saat bilinmeer

³⁶ O günü hem o saadı kimsey bilmeer: ne gökteki angillär, ne dä Ool, ama salt Boba.

³⁷ Nicä oldu Noyun günnerindä, hep ölä olacek Adam Oolunun gelmesindä dä.

³⁸ Nicä o günnerdä potoptan ileri iyärdilär, içärdilär hem evlenärdilär o günä kadar, açan Noy girdi gemi içinä,

³⁹ da bişey şüpelenmärdilär, potop gelmeyincä da hepsini telef etmeyincä, hep ölä olacek Adam Oolunun gelmesi dä.

⁴⁰ Ozaman iki adam olacek kırda. Birisi alınacek, öbürü kalacek.

⁴¹ İki karı dermendä un üüdeceklär. Birisi alınacek, birisi kalacek.

⁴² Onuştan kuşku olun, zerä bilmeersiniz, ne günü Saabiniz gelecek.

⁴³ Biliniz, eer bileydi evin çorbacısı, nezaman hırsız gelecek, kuşku duraceydı da brakmayaceydı, evini soysun.

⁴⁴ Onuştan siz dä olun hazır, zerä Adam Oolu gelecek o saatta, açan hiç düşünmeersiniz.

İnanç hem kasavetsiz çıraklar

⁴⁵ Acaba kimdir inanç hem aarif çırak, angısını çorbacısı koydu cuvapçı kendi evindä hepsi çırakların üstünä, vakıdında doyursun onnarı deyni?

⁴⁶ Mutlu çırak, angısını çorbacısı, gelmesindä, bulacek bölä yaparkan.

⁴⁷ Dooru söleerim sizä, ani koyacek onu cuvapçı bütün kendi varlıı üstünä.

⁴⁸ Ama çırak olarsaydı fena da akılca deyärseydi: „Çorbacım oyalanêr“,

⁴⁹ da başlarsaydı düümää kafadarlarını, imää hem içmää sarfoşçularlan,

⁵⁰ çıraan çorbacısı gelecek bir gün, nezaman hiç beklämeer, hem o saatta, nezaman hiç düşünmeer,

⁵¹ çok düüyecek, onu ikiüzlülärlän bir erä koyacek. Orada olacek aalamak hem diş gıcırdatması.