Matfey 23 - Enі Baalantı

Azar bilgiçlerä hem fariseylerä

¹ Sora İisus danıştı insana hem Kendi üürenicilerinä

² da dedi: «Bilgiçlär hem fariseylär oturêrlar Moiseyin erindä.

³ Onuştan hepsini, ne söleerlär sizä, koruyun hem yapın. Ama ne yapêrlar, siz yapmayın. Zerä onnar söleerlär, ama yapmêêrlar.

⁴ Baalêêrlar aar üklär, ani zor götürmää. Koyêrlar insanın sırtına, ama kendileri baarlem parmaannan kımıldatmêêrlar.

⁵ Hepsini insana göstermäk için yapêrlar. Dua paçkalarını büüldeerlär, ruba eteklerini uzun püsküllärlän yapêrlar.

⁶ Severlär oturmaa öndeki erä konak sofralarında hem ilk skemnelerä sinagogalarda.

⁷ Beenerlär, insan seläm versin onnara meydannarda da desinnär: „Üüredici!“

⁸ Ama siz kendinizä „Üüredici“ sölettirmeyin, zerä sizdä bir üüredici – Hristos, ama siz hepsiniz kardaşsınız.

⁹ Bu erdä kimseyä demeyin „Boba“, zerä sizin birdir Bobanız, ani göktä bulunêr.

¹⁰ Kimseyä demeyin „Önderci“, zerä birdir sizdä Önderci – Hristos.

¹¹ Sizin aranızda en büüyü sizä izmetkär olsun.

¹² Kim kendini üüseklendirer, o aşaalandırılacek, kim kendini aşaalandırêr, o üüseklendirilecek.

¹³ Vay sizä, bilgiçlär hem fariseylär, ikiüzlülär! Zerä siz kapêêrsınız insana Gök Padişahlıını. Kendiniz girmeersiniz, kim dä girmää isteer, brakmêêrsınız. /

¹⁴ Vay sizä, bilgiçlär hem fariseylär, ikiüzlülär! Siz kemirersiniz dulların evlerini, ama göstermäk için uzun dualar yapêrsınız. Onuştan cezanız çok aar olacek./

¹⁵ Vay sizä, bilgiçlär hem fariseylär, ikiüzlülär! Zerä siz dolanêrsınız eri hem denizi, ki çeviräsiniz baarlem birisini dininizä, da çevirip, yapêrsınız onu bir cendem adamı, iki kat taa fena sizdän.

¹⁶ Vay sizä köör öndercilär, ani deersiniz: „Eer emin edärseydi birkimsey Ayoz binaylan, diil bişey. Ama emin edärseydi Ayoz binanın altınınnan, o baalı emininnän“.

¹⁷ Fikirsizlär hem köörlar, ne taa büük? Altın mı osa Ayoz bina mı, ani ayozlêêr altını?

¹⁸ Hem deersiniz: „Eer birkimsey emin edirseydi kurbannıklan, diil bişey, ama emin edirseydi kurbannan, ani kurbannık üstündä, o baalı emininnän“.

¹⁹ /Fikirsizlär hem/ köörlar! Ne taa büük, kurban mı, osa kurbannık mı, ani kurbanı ayozlêêr?

²⁰ Ölä ki, kim emin eder kurbannıklan, o emin eder hepsinnän, ne var onun üstündä.

²¹ Kim emin eder Ayoz binaylan, o emin eder Ayoz binaylan hem Onunnan, Kim orada yaşêêr.

²² Hem kim emin eder göklän, emin eder Allahın çorbacılık skemnesinnän hem skemnedä Oturannan.

²³ Vay sizä, bilgiçlär hem fariseylär, ikiüzlülär! Zerä siz verersiniz onuncu payını naanedän, marardan hem kimyondan, ama brakêrsınız tamannanmadık Zakondan en paalı işleri: dooruluu, acıyannıı hem inanı. Bunnarı lääzım yapasınız, kalanını da brakmayasınız!

²⁴ Köör öndercilär, ani sivri sinää süzersiniz, ama deveyi yudêrsınız!

²⁵ Vay sizä, bilgiçlär hem fariseylär, ikiüzlülär! Siz yıkêêrsınız çölmään hem çanaan dışansını, ama içyansı dolu hırsızlıklan hem tamahlıklan.

²⁶ Köör farisey! İlkin pakla çölmään /hem çanaan/ içyansını, sora pak olacek dışansı da.

²⁷ Vay sizä, fariseylär hem bilgiçlär, ikiüzlülär! Zerä siz nicä kireçli mezarlar, ani dışandan görünerlär gözäl, ama içyandan dolu ölülerin kemiklerinnän hem hertürlü mındarlıklan.

²⁸ Hep ölä siz dä dışandan gösterilersiniz insanın önündä dooru, ama içyandan doluysunuz ikiüzlülüklän hem zakonsuzluklan.

²⁹ Vay sizä, bilgiçlär hem fariseylär, ikiüzlülär! Zerä siz düzersiniz prorokların mezarlarını hem donadêrsınız dooru adamnarın anılmak taşlarını.

³⁰ Siz deersiniz: „Eer biz yaşayaydık bizim dedelerin vakıdında, kayıl olmayaceydık prorokların kanını dökmää“.

³¹ Butakım siz kendi-kendinizä karşı şaatlık edersiniz, ani siz prorok öldürücülerin oollarıysınız.

³² Haydi, bitirin, ne bobalarınız çekettirdi.

³³ Yılannar, zihirli yılan yavruları! Nesoy kurtulacenız cendemin cezasından?

³⁴ Onun için, tä, yollêêrım sizä prorokları, aarifleri hem bilgiçleri. Kimisini öldüreceniz da stavroza gereceniz, başkalarını düüyeceniz sizin sinagogalarda hem koolayacenız onnarı kasabadan kasabaya.

³⁵ Ölä ki, siz cuvap edeceniz hepsi dooru olannarın kannarı için, ani döküldü bu erdä, kabaatsız Avelin kanından, Varahiyanın oolunun, Zahariyanın kanınadan, angısını öldürdünüz Ayoz bina hem kurbannık arasında.

³⁶ Dooru söleerim sizä, ani hepsi bunnar için bu boy insan cuvap edecek.

İerusalim için aalayış

³⁷ İerusalim, İerusalim, ani öldürersin prorokları hem taşlan düüyersin sana yollanılmışları! Kaç sıra istedim toplayım senin uşaklarını, nicä kloçka toplêêr piliçlerini kanatları altına, ama siz istämediniz!

³⁸ Tä, eviniz sizä boş brakılêr.

³⁹ Söleerim sizä, ani büündän ötää görmeyeceniz Beni, demeyincä: „İisözlenmiş olsun, Kim geler Saabinin adına!“»