Matfey 22 - Enі Baalantı

Padişah düünü

¹ İisus, enidän lafedip, onnara örneklärlän söledi:

² «Gök Padişahlıı benzär bir padişaha, angısı yaptı düün kendi ooluna.

³ Yolladı çıraklarını, çaarılmışları düünä teklif etsinnär, ama onnar istämedilär gelmää.

⁴ Sora enidän yolladı başka çıraklarını, deyip: „Söleyin çaarılmışlara: Sofra hazır, kurulu, öküzlerim hem besli hayvannarım kesili, hepsi hazır, gelin düünä!“

⁵ Ama onnar esaba almadılar. Birisi gitti tarlasını bakmaa, başkası gitti alış-veriş yapmaa.

⁶ Taa başkaları tuttular çırakları, gülmää alıp, öldürdülär onnarı.

⁷ Açan işitti bunu padişah, üfkelendi, yolladı askerlerini da telef etti bu öldürücüleri, yaktı onnarın kasabalarını.

⁸ Sora dedi çıraklarına: „Düün hazır, ama çaarılmışlar diil yakışık gelmää.

⁹ Gidin yol çatırıklarına, çaarınız düünä hepsini, kimi bulacenız“.

¹⁰ Kullar gittilär sokaklara, topladılar hepsini, kimi buldular: iileri hem kötüleri. Düün eri doldu konakçılarlan.

¹¹ Padişah girdi, görsün konakçıları, da gördü orada bir adam, ani diildi düün rubasınnan giiyimni.

¹² „Ba dost, – dedi ona çorbacı, – nesoy sän düün rubasız burayı giräbildin?“ O adam susardı.

¹³ Ozaman padişah dedi kendi izmetkerlerinä: „Baalayın onun ellerini hem ayaklarını da atın onu dışankı karannaa. Orada olacek aalamak hem diş gıcırdatması“.

¹⁴ Zerä çok çaarılmış, ama az seçilmiş».

Hak Kesara hem Allaha

¹⁵ Ozaman fariseylär gidip annaştılar, nesoy tutsunnar İisusu laflan.

¹⁶ Yolladılar Ona kendi üürenicilerini, İrodun adamnarınnan barabar, desinnär: «Üüredici, biz bileriz, ani dooru adamsın, Allahın yolunu hakına üüredersin, kimseyä pay tutmêêrsın, zerä adam üzünä bakmêêrsın.

¹⁷ Ölä ki, sölä bizä, nesoy sayêrsın, düşer mi ödemää harç Kesara osa düşmeer mi?»

¹⁸ Ama İisus, bileräk onnarın kötü neetlerini, dedi: «Neçin Beni deneersiniz, ikiüzlülär?

¹⁹ Gösterin Bana parayı, neylän ödener harç!» Onnar getirdilär Ona bir dinar.

²⁰ İisus sordu onnara: «Kimin resimi hem adı yazılı burada?»

²¹ «Kesarın», – cuvap etti onnar. Ozaman İisus dedi: «Verin Kesara ne Kesarın, ama Allaha ne Allahın».

²² Şaştılar bu laflara da, Onu brakıp, gittilär.

Soruş dirilmäk için

²³ Hep o günü İisusa geldi sadukeylär, angıları deerlär, ani yok dirilmäk, da sordular:

²⁴ «Üüredici, Moisey dedi: „Eer birkimsey ölärseydi taa uşaa olmadıynan, onun kardaşı lääzım evlensin bu karıya da kaldırsın uşak ölmüş kardaşına tamızlık için“.

²⁵ Vardı bizdä edi kardaş. İlkinkisi evlendi da öldü. Çünkü yoktu uşaa, kendi karısını braktı kardaşına.

²⁶ Hep ölä oldu ikincisinnän dä, üçüncüsünnän dä, edincisinädän.

²⁷ Hepsindän sora öldü karı da.

²⁸ Dirilmektä angısının bu edisindän karısı o olacek? Zerä hepsi yaşadı onunnan».

²⁹ İisus cuvap etti onnara: «Yanılêrsınız, zerä bilmeersiniz ne Ayoz Yazıları, ne da Allahın kuvedini.

³⁰ Zerä ölülär dirildiynän evlenmeyeceklär, ama olaceklar, nicä Allahın angilleri göktä.

³¹ Ölülerin dirilmesi için okumadınız mı, ne Allah sizä deer:

³² „Bän Avraamın Allahı, İsaakın Allahı hem İakovun Allahıyım“. Allah – diil ölülerin Allahı, ama dirilerin».

³³ İnsannar, ani seslärdilär, şaştılar İisusun üüretmesinä.

En büük sımarlamak

³⁴ Fariseylär, açan işittilär, ani İisus susturdu sadukeyleri, toplandılar bireri.

³⁵ Onnardan bir zakon üüredicisi, İisusu denesin deyni, koydu ona bölä bir soruş:

³⁶ «Üüredici, angı sımarlamak en büük Zakonda?»

³⁷ İisus cuvap etti: «„Seväsin Saabi Allahını bütün üräännän, bütün canınnan hem bütün aklınnan“.

³⁸ Budur ilk hem en büük sımarlamak.

³⁹ İkincisi buna benzär: „Seväsin yakın olanını, nicä kendini“.

⁴⁰ Bu iki sımarlamakta tutunêr bütün Zakon hem proroklar».

Hristos – kimin oolu?

⁴¹ Açan topluydular fariseylär birerdä, İisus sordu onnara:

⁴² «Ne düşünersiniz siz Hristos için? Kimin oolu O?» «Davidin», – cuvap etti onnar.

⁴³ İisus deer onnara: «Öleysä, neçin David, Allahın Duhundan kullanılmış, adlêêr Onu „Çorbacı“, deyip:

⁴⁴ „Saabi dedi benim Çorbacıma: Otur saa tarafımda, Bän koyunca Senin duşmannarını ayakların altına“.

⁴⁵ Çünkü David adlêêr Onu „Çorbacı“, nesoy O olabilir Davidin oolu?»

⁴⁶ Kimsey cuvap edämedi Ona bir dä laf. O gündän sora artık kimsey kıyışmadı bişey sorsun Ona.