Matfey 20 - Enі Baalantı

Baada işçilär için örnek

¹ Zerä Gök Padişahlıı benzeer bir çorbacı adama, ani çin sabaalän çıktı, kendi baasına işçi tutsun.

² İşçilärlän annaştı, ödesin birär dinar gündä, sora yolladı onnarı kendi baasına.

³ Çıkıp bir üçüncü saatta, başka haylak durannarı gördü meydanda.

⁴ Sora dedi onnara: „Siz dä gidin benim baayımda işlemää. Ne düşer, ödeyecäm sizä“. Onnar gittilär.

⁵ Enidän çıktı bir altıncı hem dokuzuncu saatta, hep ölä yaptı.

⁶ Bitkidä, onbirinci saada yakın, buldu başka haylak durannarı da dedi onnara: „Neçin burada bütün gün haylak durêrsınız?“

⁷ Onnar cuvap ettilär: „Çünkü bizi kimsey işä almadı“. O dedi: „Siz dä gidin benim baayıma /da ne düşer kabledeceniz/“.

⁸ Avşamnen baayın çorbacısı dedi kendi haznatarına: „Çaar işçileri da ödä, çekedip bitkilerindän ilkinkilerinädän“.

⁹ Onnar, ani gittilär işä onbirinci saatta, gelip kablettilär birär dinar.

¹⁰ İlkinkileri, geldiynän, esap ettilär, ani kabledeceklär taa çok. Ama onnar da kablettilär hep birär dinar.

¹¹ Açan kablettilär parayı, başladılar baayın çorbacısına karşı mırıldanmaa.

¹² Da deyärdilär: „Sonda olannar işledilär sade bir saat, ama ödeklän sän yaptın onnarı bizimnän bir. Biz sa geçirdik bütün günün kızgınnıın aarlıını“.

¹³ Çorbacı onnarın birisinä cuvap etti: „Dostum, bän seni hiç yalandırmadım. Annaşmadın mı benimnän bir dinara?

¹⁴ Al, ne senin, da git. Bän isteerim bu sondakı insana da ödeyim hep ölä, nicä sana.

¹⁵ Dooruluum yok mu kendi paramnan yapayım, ne isteerim? Osa sän kıskanêrsın, ani bän ii ürekliyim?“

¹⁶ Ölä ki, sondakılar ilk olacek, ilklär da bitki olacek. /Zerä çok çaarılmış, ama az seçilmiş/».

İisus üçüncü sıra haberleer ölümünü hem dirilmesini

¹⁷ Açan gidärdilär İerusalimä, İisus yolda aldı bir tarafa oniki üürenicisini da dedi onnara:

¹⁸ «Tä, biz gideriz İerusalimä. Adam Oolu verilecek büük popazların hem bilgiçlerin elinä. Ona daava kesilecek ölümä,

¹⁹ da Onu yabancıların elinä vereceklär, ki gülmää alsınnar, kamçıylan düüsünnär da stavroza gersinnär, ama O üçüncü günü dirilecek».

Bir ananın istemesi

²⁰ Ozaman Zevedeyin oolların anaları yaklaştı İisusa oollarınnan barabar, baş iiltti da nesä yalvarardı Ona.

²¹ İisus sordu: «Ne isteersin?» «Sımarla, ki Senin Padişahlıında benim bu iki oolum otursunnar birisi Senin saa tarafında, birisi dä sol tarafında», – cuvap etti bu ana.

²² Ozaman İisus dedi: «Bilmeersiniz, ne isteersiniz. Var mı nicä siz içäsiniz o çölmektän, ani Bän içecäm /hem vaatiz olasınız o vaatizliklän, ani Bän olacam/?» «Var nicä», – cuvap etti onnar.

²³ İisus dedi: «Hakına, ani içeceniz Benim çölmeemdän /hem vaatiz olacenız o vaatizliklän, ani Bän olêrım/. Ama Bendän tutunmêêr, izin vereyim oturmaa saa eki sol tarafımda. Bu verilecek onnara, kimä hazırlanmış Bobamdan».

²⁴ Kalan on üürenicilär, işidip bunu, üfkelendilär bu iki kardaşa.

²⁵ İisus çaardı onnarı da dedi: «Bilersiniz, ani milletlerin öndercileri çorbacılık ederlär onnarın üstünä hem büükleri zaabitlik ederlär.

²⁶ Ama sizin aranızda bölä olmasın. Kim sizdän isteer büük olsun, o izmetkär olsun kalanına.

²⁷ Kim sizdän isteer ilk olsun, o çırak olsun öbürlerä.

²⁸ Zerä Adam Oolu gelmedi, ki Ona izmet etsinnär, ama Kendi izmet etsin insana hem versin yaşamasını çoyun erinä, ki kurtarabilsin onnarı».

İki köör İerihon kasabasında

²⁹ Açan çıkardılar İerihon kasabasından, çok insan gitti İisusun ardına.

³⁰ Tä, yol boyunda oturardı iki köör adam. Onnar açan işittilär, ani İisus geçer oradan, başladılar baarmaa: «Saabi, Davidin Oolu, acı bizi!»

³¹ İnsan takazaladı onnarı, sussunnar deyni, ama onnar taa pek baarardılar: «Saabi, Davidin Oolu, acı bizi!»

³² İisus durgundu, çaardı onnarı da sordu: «Ne isteersiniz yapayım sizä?»

³³ «Saabi, açılsın gözlerimiz!» – dedi onnar.

³⁴ İisusun canı acıdı, da diidi onnarın gözlerinä. Köör olannar çabuk görmäk edendilär. Onnar gittilär Onun ardına.