Matfey 19 - Enі Baalantı

Düşer mi, karı-koca ayırılsınnar?

¹ Bölä lafettiktän sora İisus Galileyadan geçti da geldi İudeya erlerinä, İordanın öbür tarafına.

² Onun ardına gitti çok insan. Orada O alıştırdı hastaları.

³ Fariseylär geldilär denesinnär Onu deyni, da dedilär: «Düşer mi adam ayırılsın karısından herbir sebep beterinä?»

⁴ İisus cuvap etti onnara: «Ne, okumadınız mı, ani Yaradıcı baştan yarattı insannarı, olsunnar adam hem karı.

⁵ Da dedi: „Onuştan brakacek adam bobasını hem anasını da birleşecek karısınnan. İkisi bir güüdä olacek“.

⁶ Butakım olaceklar diil iki, ama bir güüdä. Ölä ki, ne Allah birleştirdi, insan onu ayırmasın».

⁷ Onnar sordular: «Öleysä, neçin Moisey sımarladı, koca versin karısına ayırılmak kiyadı da ayırılsın ondan?»

⁸ İisus cuvap etti onnara: «Sizin inatlıınızın beterinä izin verdi Moisey, ayırılasınız karılarınızdan, ama baştan diildi ölä.

⁹ Bän sizä deerim: herbir adam, angısı ayırılêr karısından diil hayırsızlık beterinä da evlener başkasına, orospuluk yapêr. /Kim dä evlener kocasından ayırılmış karıya, o da orospuluk yapêr/».

¹⁰ Onun üürenicileri dedilär: «Eer bölä durarsaydı işlär karı-kocaylan, ozaman taa ii hiç evlenmemää!»

¹¹ O cuvap etti onnara: «Hepsi kabledämeer bunu, ama sade onnar, kimä verili.

¹² Zerä var evnuhlar – duumaktan evnuh. Var insandan yapılı evnuhlar. Hem var evnuhlar, angıları kendi-kendilerini evnuh yaptılar Gök Padişahlıı için. Kim kabledäbiler bunu, ko kabletsin».

İisus iisözleer uşakları

¹³ Ozaman getirdilär İisusa uşakları, O koysun ellerini onnarın üstünä deyni da dua etsin onnar için, ama üürenicilär azarladılar onnarı.

¹⁴ İisus dedi: «Brakın uşakları, gelsinnär Bana, da durgutmayın onnarı, zerä Gök Padişahlıı onnarın gibileri için».

¹⁵ Ellerini onnarın üstünä koyduktan sora İisus gitti oradan.

Zenginnik hem diveç yaşamak

¹⁶ Bir adam yaklaştı İisusa da sordu Ona: «Üüredici, ne iilik yapayım, ki diveç yaşamak edeneyim?»

¹⁷ İisus cuvap etti ona: «Neçin sorêrsın Bana „ne iilik“? Salt bir Allah ii. Eer istärseydin ömürä girmää, tamanna sımarlamakları».

¹⁸ «Angılarını?» – sordu o adam. İisus cuvap etti: «Öldürmeyäsin, orospuluk yapmayasın, çalmayasın, yalancı şaat olmayasın,

¹⁹ bobanı-ananı ikramnayasın hem yakın olanını, nicä kendini, seväsin».

²⁰ Genç olan cuvap etti: «Hepsini bunnarı tamannadım /taa gençliimdän/. Ne taa bana etişmeer?»

²¹ «Eer istärseydin taman olmaa, git da sat varlıını, payet fukaaralara, da olacek haznan göktä. Sora gel da izlä Beni», – dedi İisus.

²² Açan genç olan işitti bu lafları, gücenik gitti, zerä çok zenginnii vardı.

²³ İisus dedi üürenicilerinä: «Dooru söleerim sizä, ne zor bir zengin adam Gök Padişahlıına girsin!

²⁴ Hem da söleerim sizä, ani taa ilin bir devä iinenin kulaandan geçsin, nekadar bir zengin adam Allahın Padişahlıına girsin».

²⁵ Üürenicilär, bunu işidip, çok şaştılar da dedilär: «Ozaman kim kurtulabilir?»

²⁶ İisus baktı uz onnara da dedi: «Bu insana olmaz, ama Allaha hepsi olur».

²⁷ Ozaman Petri dedi: «Tä, biz braktık hepsini da geldik Senin ardına. Bizä ne olacek?»

²⁸ İisus cuvap etti: «Dooru söleerim sizä, ani açan Adam Oolu oturacek Kendi metinniindä, çorbacılık skemnesindä, eni zamanda, siz, ani geldiniz Benim ardıma, oturacenız oniki çorbacılık skemnelerindä, daava keseräk İzrailin oniki tamızlıına.

²⁹ Hepsi, kim braktı evini yada kardaşlarını, kızkardaşlarını, bobasını, anasını, /karısını,/ uşaklarını eki merasını Benim adım için, kabledecek üz katına taa çok hem dä edenecek diveç yaşamak.

³⁰ Ama çoyu ilk olannardan bitki olacek, çoyu da bitkilerdän ilk olacek.