Matfey 17 - Enі Baalantı

İisus peydalanêr metinniktä

¹ Altı gündän sora İisus aldı salt Petriyi, İakovu hem onun kardaşını, İoanı, da, götürüp, pindirdi onnarı bir üüsek bayır üstünä.

² Hemen görünüşü diişti onnarın önündä, üzü yalabıyardı gün gibi. Rubaları da ak-biyaz oldu, nicä aydınnık.

³ Birdän gösterildi onnara Moisey hem İliya, angıları lafedärdilär İisuslan.

⁴ Petri dedi İisusa: «Saabi, ii, ki buradayız. İstärseydin, yapalım üç çalmar: bir Senin için, bir Moisey için, bir dä İliya için».

⁵ Bunu sölärkän, bir aydınnıklı bulut gölgesinnän kapladı onnarı, da bulut içindän bir ses dedi: «Budur Benim sevgili Oolum, Onda Benim isleeliim».

⁶ Açan üürenicilär bunu işittilär, pek korktular da üzükoynu düştülär.

⁷ İisus, yaklaşıp, onnara diidi da dedi: «Kalkın, hiç korkmayın!»

⁸ Açan onnar baktılar, başka kimseyi görmedilär, İisustan kaarä.

⁹ Açan inärdilär bayır üstündän, İisus sımarladı onnara: «Kimseyä sölämeyin, ne gördünüz, Adam Oolu dirilmeyincä ölüdän».

¹⁰ Üürenicilär sordular Ona: «Neçin bilgiçlär deerlär, ani ilkin lääzım gelsin İliya?»

¹¹ İisus cuvap etti onnara: «Hakına, ani İliya ilkin gelecek da erleştirecek hepsini.

¹² Ama söleerim sizä, ani İliya şindän sora geldi, ama onu tanımadılar da yaptılar onunnan, ne istedilär. Hep ölä Adam Oolu da onnarın elindän zeetlenecek».

¹³ Ozaman üürenicilär annadılar, ani İisus İoan Vaatizedici için lafeder.

Çocuk fena duhtan kurtulêr

¹⁴ Açan onnar etiştilär insanın yanına, yaklaştı İisusa bir adam, diz çöküp Onun önündä, bölä yalvardı:

¹⁵ «Saabi, acı benim oolumu, zerä onu kara hastalık çok zeetleer. Çok sıra düşer ateş içinä hem su içinä.

¹⁶ Getirdim onu Senin üürenicilerinä, ama onnar alıştıramadılar onu».

¹⁷ «İnansız hem şaşırık senselä! Nekadar vakıt taa sizinnän olacam? Nekadar vakıt dayanacam sizä? Getirin onu Bana», – cuvap etti İisus.

¹⁸ İisus azarladı fena duhu, da o çocuktan çıktı. Çocuk birdän saa oldu.

¹⁹ Ozaman üürenicilär, yalnız İisusa yaklaşıp, sordular: «Neçin biz çıkaramadık fena duhu?»

²⁰ «Sizin inansızlıınızın beterinä, – cuvap etti İisus. – Dooru sizä söleerim: eer olursa sizdä inan hardal toomu gibi, da deyärseniz bu bayıra: „Diiş buradan“, o diişecek. Bişey olmayacek, ani siz yapamayasınız. /

²¹ Busoy fena duhlar çıkêrlar sade duaylan hem oruçlan/».

İisus enidän haberleer ölümünü hem dirilmesini

²² Açan onnar barabar Galileyada bulunardılar, İisus dedi onnara: «Adam Oolu verilecek insan elinä.

²³ Onu öldüreceklär, ama üçüncü günü dirilecek». Üürenicilär çok kahırlandılar.

İisus ödeer harç Ayoz bina için

²⁴ Açan etiştilär Kapernaum kasabasına, Ayoz binaya iki drahma toplayannar, gelip Petriyä, sordular: «Sizin Üürediciniz ödämeer mi harç?»

²⁵ «Ödeer», – cuvap etti Petri. Açan Petri girdi içeri, İisus ilkin lafetti: «Simon, nasıl sän sanêrsın, dünnä padişahları kimdän harç hem vergi alêrlar? Kendi oollarından mı osa yabancılardan mı?»

²⁶ «Yabancılardan», – cuvap etti Petri. İisus dedi: «Ozaman çıkêr, ani oolların yok zorları ödesinnär.

²⁷ Ama gücendirmeyelim onnarı deyni, git gölä, at balık çengelini. Al ilk balıı, ani tutulacek, aç aazını da bulacan bir statir. Al onu da ödä benim için hem kendin için».