Matfey 15 - Enі Baalantı

İhtärların adetleri

¹ Ozaman fariseylär hem bilgiçlär İerusalimdän geldilär İisusa da dedilär:

² «Neçin Senin üürenicilerin çiinerlär ihtärların adetlerini? Zerä imektän ileri yıkamêêrlar ellerini».

³ İisus cuvap etti onnara: «Siz neçin çiinersiniz Allahın sımarladıını sizin adetlerinizin beterinä?

⁴ Zerä Allah dedi: „İkramna bobanı hem ananı“ hem „Kim bobasını yada anasını kötüleyecek, ölümnän cezalı olsun“.

⁵ Ama siz deersiniz: „Kim deer anasına yada bobasına: Ne lääzımdı sana vereyim, baaşış Allaha verdim,

⁶ o var nicä ikramnamasın bobasını /hem anasını/“. Butürlü paasızlandırdınız Allahın sözünü kendi adetinizlän.

⁷ İkiüzlülär! Dooru prorokluk etti sizin için İsaya, açan dedi:

⁸ „Bu insan Beni ikramnêêr sade aazınnan, ama üreklerinnän uzak Bendän durêr.

⁹ Naafilä Bana baş iilderlär, zerä adam sımarlamaklarını üürederlär, sansınnar ani Allahın üüretmekleri“».

Hakına ne mındarlêêr adamı?

¹⁰ İisus çaardı insanı da dedi: «Sesleyin da annayın Beni.

¹¹ Mındarlêêr adamı diil o, ne içinä girer, ama ne aazından çıkêr, o mındarlêêr adamı».

¹² Ozaman üürenicilär yaklaştılar İisusa da dedilär: «Bilersin mi, ani bu lafları işidip, fariseylär gücendilär?»

¹³ İisus cuvap etti onnara: «Herbir rasat, ani diil koyulu Benim Gökteki Bobamdan, köktän yolunacek.

¹⁴ Brakın onnarı, onnar köörların köör güdücüleri. Açan bir köör güder başka kööru, onnar ikisi dä çukur içinä düşerlär».

¹⁵ Petri lafetti da Ona dedi: «Açıkla bizä bu örnää».

¹⁶ İisus dedi: «Ne, siz dä mi ölä zor annêêrsınız?

¹⁷ Annamêêrsınız mı, ani ne girer adamın aazından, girer şkembesinä, sora dışarı uuradılêr?

¹⁸ Ama ne adamın aazından çıkêr, o ürektän geler. Te bu mındarlêêr adamı.

¹⁹ Zerä ürektän çıkêr fena neetlär, öldürmäk, orospuluk, hayırsızlık, hırsızlık, yalancılık, kötülemäk.

²⁰ Tä ne adamı mındarlêêr, ama yıkanmadık ellän imää adamı mındarlamaz».

Hanaannı karının inanı

²¹ İisus gitti oradan, uzaklandı Tir hem Sidon erlerinä.

²² Tä bir karı hanaannıyka geldi Ona da başladı baarmaa: «Acı beni, Saabi, Davidin Oolu! Benim kızım titsi zeetlener bir fena duhtan».

²³ İisus cuvap etmedi bir dä laf. Ozaman Onun üürenicileri yaklaştılar Ona da yalvardılar: «Salver onu, zerä baarêr bizim ardımıza».

²⁴ İisus cuvap etti: «Bän yollanmışım salt İzrail milletin kayıp koyunnarına».

²⁵ Ama bu karı geldi, baş iiltti da dedi: «Saabi, yardım et bana!»

²⁶ İisus ona cuvap etti: «Diil islää almaa ekmää uşaklardan da atmaa köpeklerä».

²⁷ «Ölä, Saabi, ama köpeklär dä iyerlär kırıntıları, ani düşer çorbacılarının sofrasından», – dedi bu karı.

²⁸ Ozaman İisus cuvap etti: «O, karı, büüktür senin inanın. Olsun, nicä sän isteersin». Birdän onun kızı alıştı.

Dört bin adam doyurulêr

²⁹ İisus ayırıldı oradan da gitti Galileyaya, gölün yanına. Pindi bir bayır üstünä da oturdu orada.

³⁰ Çok insan geldi Ona orayı. Getirdilär kendilerinnän topalları, köörları, mutuları, sakatları hem çok başka hastaları, koydular onnarı Onun ayaklarına, da O onnarı alıştırdı.

³¹ İnsan şaşardı, görüp ani mutular lafederlär, sakatlar alışêrlar, topallar gezerlär, köörlar görerlär. Onuştan metinnärdilär İzrailin Allahını.

³² İisus topladı üürenicilerini da dedi: «Canım acıyêr bu insana, zerä üç gün durêrlar yanımda da yok ne isinnär. İstämeerim onnarı salvereyim aaç, aniki bayılmasınnar yolda».

³³ Üürenicileri dedilär: «Neredän alalım bukadar ekmek bu çol erdä da doyuralım bukadar insan?»

³⁴ «Kaç ekmeeniz var?» – sordu İisus. «Edi ekmek hem birkaç balık», – cuvap ettilär onnar.

³⁵ Ozaman İisus sımarladı insana, otursunnar erä.

³⁶ Aldı edi ekmää hem balıkları, şükür etti Allaha, sora kırıp verdi üürenicilerinä. Onnar da payettilär insana.

³⁷ Hepsi idilär da doyundular. Sora topladılar imäk parçalarını, edi sepet dolu.

³⁸ Onnar, ani idilär, vardı bir dört bin adam, karılardan hem uşaklardan kaarä.

³⁹ Sonda İisus braktı insanı gitsinnär, Kendisi girdi kayık içinä da geçti Magdala erlerinä.