Matfey 14 - Enі Baalantı

İoan Vaatizedici öldürüler

¹ O vakıtlarda İrod kullanıcı işitti İisus için.

² Da dedi kendi izmetkerlerinä: «Bu İoan Vaatizedici! O dirildi ölüdän, onuştan yapabiler kudretli işlär».

³ İrod, tutup İoanı, baaladıydı da attıydı zındana, İrodiadanın beterinä, ani İrodun kardaşının, Filipin, karısıydı.

⁴ Zerä İoan takazaladıydı İrodu, deyeräk: «Düşmeer yaşayasın onunnan».

⁵ İrod istedi öldürsün onu, ama korkardı insandan, zerä insan sayardı İoanı prorok.

⁶ İrodun duuma günü yortusunda İrodiadanın kızı oynadı konakların önündä, da İrod pek beendi.

⁷ Onuştan İrod adadı eminnän, ani verecek ona hepsini, ne o isteyecek.

⁸ Üüredilmiş anasından kız dedi: «Ver bana bir çini içindä İoan Vaatizedicinin kafasını!»

⁹ Padişah güçlendi, ama çünkü emin ettiydi konakların önündä, sımarladı verilsin, ne kız istedi.

¹⁰ Yolladı, alsınnar İoanın kafasını zındanda,

¹¹ sora getirdilär kafasını bir çini içindä da verdilär kıza, kız da verdi anasına.

¹² İoanın üürenicileri geldilär, aldılar onun güüdesini da gömdülär. Sora gittilär da haberledilär İisusa.

Beş bin adam doyurulêr

¹³ İisus, bunu işidip, girdi bir kayık içinä da yalnız gitti oradan bir sapa erä. İnsan bunu işitti da, çıkıp kasabalardan, Onun ardına yayan gitti.

¹⁴ Açan çıktı kayık içindän, İisus gördü çok insan. Canı acıdı onnara, da alıştırdı hastaları.

¹⁵ Açan avşam oldu, Onun üürenicileri yaklaştılar da dedilär Ona: «Burası çol er, vakıt artık geç oldu. Kolver insanı, gitsinnär küülerä da satın alsınnar kendilerinä imää».

¹⁶ «Diil lääzım gitsinnär, siz verin onnara imää», – cuvap etti İisus.

¹⁷ Onnar dedilär Ona: «Burada bizdä var salt beş ekmek hem iki balık».

¹⁸ «Getirin onnarı burayı Bana», – dedi İisus.

¹⁹ Sora sımarladı insan otursun çimen üstünä. Aldı beş ekmää hem iki balıı, kaldırdı bakışını gökä, iisözledi da, kırıp ekmekleri, verdi üürenicilerinä. Üürenicilär payettilär insana.

²⁰ Hepsi idilär da doyundular, sora topladılar imäk parçalarını, oniki sepet dolu.

²¹ Hepsi, kim idi, karılardan hem uşaklardan kaarä, vardı beş bin adam.

İisus gezer su üstündä

²² Ondan sora İisus çalıştırdı üürenicilerini tez girsinnär kayık içinä da önü sora geçsinnär gölün öbür tarafına. Bu vakıtta Kendisi lääzımdı salversin insanı.

²³ Açan salverdi insanı, pindi bir bayır üstünä, ki yalnız dua etsin. Açan avşam oldu, yalnız orada bulunurdu.

²⁴ Bu vakıt kayık kenardan çok uzaktı da buuşardı dalgalarlan, zerä lüzgär karşı esärdi.

²⁵ Sabaa karşı, aydınnanaceykan, İisus geldi onnara gezeräk su üstündä.

²⁶ Açan üürenicilär gördülär Onu gezeräk su üstündä, korktular da dedilär: «Bu bir tılsım!» – da korkudan baardılar.

²⁷ Ama İisus dedi onnara: «Uslanın, bu Bänim, korkmayın!»

²⁸ «Saabi, eer Sänseydin, izin et, gideyim Sana su üstündä», – dedi Petri.

²⁹ «Gel!» – dedi İisus. Petri indi kayık içindän da başladı gitmää su üstündä İisusa dooru.

³⁰ Ama açan gördü, ani lüzgär sert, korktu da başladı batmaa, ozaman baardı: «Saabi, kurtar beni!»

³¹ Çabuk İisus uzattı elini, tuttu onu da dedi: «Az inancı, neçin ikiledin?»

³² Açan girdilär kayık içinä, lüzgär durgundu.

³³ Onnar, kim kayık içindeydi, baş iilttilär Ona da dedilär: «Hakına, ani Sän Allahın Ooluysun».

Gennisarettän hastalar saalık edenerlär

³⁴ Açan geçtilär gölü, çıktılar kenara Gennisaret erlerinä.

³⁵ O erlerdän insannar tanıdılar İisusu da yolladılar haber doz-dolaya, da insannar hepsi hastaları Ona getirärdilär.

³⁶ Hastalar yalvarardılar, braksın, diisinnär baarlem Onun rubasının eteenä. Hepsi, kim diiyärdi, saalık edenärdi.