Matfey 13 - Enі Baalantı

Ekici için örnek

¹ O günü İisus çıktı evdän da gidip otururdu göl boyunda.

² Çok insan toplandı Ona, ölä ani lääzım oldu girsin da otursun bir kayık içindä, ama insan kaldı kenarda.

³ O lafetti onnara örneklärlän çok işlär için da dedi: «Tä ekici çıktı toom ekmää.

⁴ Açan ekärdi, toomnardan birazı düştü yol boyuna. Kuşlar kondular da idilär onnarı.

⁵ Başka toomnar taşlık erlerä düştülär, neredä az toprak vardı. Toomnar tez filizlendilär, zerä toprak diildi derin.

⁶ Ama açan güneş çıktı, onnar sörpeştilär da kurudular, zerä kökleri suvadaydı.

⁷ Taa başka toomnar çalılar içinä düştülär. Çalılar büüdülär da buulttular filizleri.

⁸ Ama kalan toomnar ii topraa düştülär da bereket getirdilär: birisi üz, başkası altmış, taa başkası otuz katına.

⁹ Kimin var kulaa /işitmää deyni/, ko işitsin».

¹⁰ Üürenicilär yaklaştılar da dedilär Ona: «Neçin lafedersin onnara örneklän?»

¹¹ İisus cuvap etti: «Çünkü sizä verildi, annayasınız Gök Padişahlıın saklılıklarını, ama onnara verilmedi.

¹² Zerä kimdä var, ona taa çok verilecek hem zeedelenecek, ama kimdä yok, ondan alınacek, neyi dä var.

¹³ Onun için onnara lafederim örneklärlän. Zerä, onnar bakarkan, görmeerlär, seslärkän, işitmeerlär hem annamêêrlar.

¹⁴ Onnarlan tamannanêr prorok İsayanın sözleri, angısı dedi: „İşideceniz kulaklarınızlan, ama annamayacenız. Bakacenız gözlerinizlän, ama görämeyeceniz.

¹⁵ Zerä bu halkın ürekleri uyvaşık oldu. Kulaklarından aar işiderlär, gözlerini kapadılar, ki gözleri görmesin, kulakları işitmesin hem ürekleri annamasın. Başka türlü Bana döneceydilär, da Bän onnarı alıştıraceydım“.

¹⁶ Mutlu sizin gözleriniz, ani görerlär, hem kulaklarınız, ani işiderlär!

¹⁷ Dooru söleerim sizä, ani çoyu proroklardan hem dooru adamnardan istedilär görmää, ne siz görersiniz, hem işitmää, ne siz işidersiniz, ama görmedilär hem işitmedilär.

¹⁸ Sesleyin da annayın, ne annaması var bu örnään ekici için.

¹⁹ Kim Gök Padişahlıı için sözü işider da annamêêr, ona şeytan geler da toomu onun üreendän çalêr. Bunnar o toomnar, ani düştülär yol boyuna.

²⁰ Toomnar, ekilmiş taşlık erlerä, onnardır, kim, işidip sözü, kableder sevinmäklän,

²¹ ama kökleşämeerlär hem az vakıt tutunêrlar. Açan geler zorluk eki koolamak Allahın sözü için, onnar tez atılêrlar.

²² Toomnar, ekilmiş çalılar içinä, onnardır, kim işider sözü, ama bu zamanın kahırları hem zenginnik aldangaçlıı buuldêrlar, da onnar bereket getirämeerlär.

²³ Toomnar, ekilmiş ii topraa, onnardır, kim, işidip sözü, annêêr da bereket getirer: bir toom üz, başkası altmış, taa başkası otuz katına».

Booday hem ayırık otu

²⁴ İisus söledi taa bir örnek da dedi: «Gök Padişahlıı benzeer bir adama, angısı ekti ii toomnarı kendi tarlasına.

²⁵ Ama açan insan uyuyardı, geldi onun duşmanı da ekti ayırık toomu boodaylar içinä, sora gitti.

²⁶ Açan peydalandı booday filizleri da başak salverdi, üzä çıktı ayırık otları da.

²⁷ Ev çorbacısının çırakları geldilär da dedilär: „Çorbacı, ekmedin mi sän islää toomnarı senin tarlana? Neredän çıktı bu ayırık otları?“

²⁸ O dedi onnara: „Bunu bir duşman yaptı“. Ozaman çıraklar dedilär: „İstärseydin, gidelim da onnarı yolalım?“

²⁹ „Olmaz, zerä yolarkan ayırık otlarını, yolmayasınız birerdä boodayları da.

³⁰ Brakın, barabar büüsünnär biçmäk vakıdına kadar. Biçmäk vakıdı deyecäm orakçılara: ilkin yolun ayırık otlarını da demet onnarı baalayın, ateşä yakmaa deyni. Ama boodayı toplayın benim ambarıma“».

Hardal toomu hem hamur mayası

³¹ İisus söledi bir başka örnek: «Gök Padişahlıı benzeer hardal toomuna, ani adam eker kendi tarlasına.

³² Bu toom, makar, ani taa küçük hepsi toomnardan, ama açan büüyer, eşilliklerdän taa üüsek, bir aaç gibi, olêr ölä, ki kuşlar konêrlar onun dallarına da yuva yapêrlar».

³³ Başka bir örnek söledi: «Gök Padişahlıı benzeer bir parça hamur mayasına, ani alêr bir karı da karıştırêr üç ölçü unnan, bütün hamuru kabartsın».

³⁴ İisus hepsini bunnarı insana örneklän sölärdi. Bişey örneksiz onnara sölämärdi,

³⁵ tamannansın deyni, ne sölediydi prorok: «Lafedecäm örneklärlän, dünnä kurulmasından saklı işleri annadacam».

Ayırık toomun açıklaması

³⁶ Ondan sora İisus salverdi insanı da girdi bir ev içinä. Onun üürenicileri yaklaştılar Ona da dedilär: «Açıkla bizä bu örnää ayırık toomu için».

³⁷ O dedi onnara: «Ekici ii toomu – Adam Oolu.

³⁸ Tarla – dünnä. İi toom – Gök Padişahlıın oolları. Ayırık toomnar – yaramazın oolları.

³⁹ Duşman, ayırık toomunu ekän – diavol. Biçmäk vakıdı – zaman bitkisi. Orakçılar – angillär.

⁴⁰ Nicä ayırık otu yolunêr da atılêr ateşä, ölä olacek zaman bitkisindä dä.

⁴¹ Adam Oolu yollayacek Kendi angillerini da toplayaceklar Onun Padişahlıından hepsini, ne günaha düşürer hem kim zakonsuzluk yapêr,

⁴² da kızgın fırına atılaceklar, neredä aalamak hem diş gıcırdatması.

⁴³ Ozaman dooru olannar şafk edeceklär, gün gibi, Bobanın Padişahlıında. Kimin var kulaa /işitmää deyni/, ko işitsin!

Saklı hazna hem sedef

⁴⁴ Gök Padişahlıı benzeer bir haznaya, ani gömülü bir tarlada. Bir adam, ani bulêr onu, enidän saklêêr da sevinmektän gidip satêr bütün varlıını da o tarlayı satın alêr.

⁴⁵ Hem da Gök Padişahlıı benzeer bir bezirgenä, ani aarêêr gözäl sedef.

⁴⁶ Açan pek paalı sedef bulêr, gider da satêr, neyi var, da satın alêr sedefi.

Balıkçılık

⁴⁷ Hem da Gök Padişahlıı benzeer bir süzmeyä, ani salvererlär su içinä balık tutmaa deyni, ani tutêr hertürlü balık.

⁴⁸ Açan dolêr süzmä balıklan, balıkçılar çıkarêrlar kenara da oturup ayırêrlar kaplar içinä ii balıkları, ama inmäz balıkları sıbıdêrlar.

⁴⁹ Hep ölä olacek dünneyin bitkisindä dä. Angillär çıkaceklar da ayıraceklar kötüleri dooruların içindän.

⁵⁰ Kötüleri ataceklar yanar fırına, neredä olacek aalamak hem diş gıcırdatması».

⁵¹ «Şindi annadınız mı hepsi bu işleri?» – sordu İisus. «Annadık», – cuvap etti onnar.

⁵² O dedi onnara: «Onuştan herbir bilgiç, angısı üürendi, ne lääzım Gök Padişahlıı için, benzeer bir ev çorbacısına, angısı çıkarêr haznasından hem eni, hem eski işlär».

İisus paasızlanêr Kendi memleketindä

⁵³ İisus, açan durgundu lafetmää örneklän, gitti oradan.

⁵⁴ Geldi Kendi memleketinä da başladı üüretmää insanı sinagogada. İnsan şaşardı da deyärdi: «Neredän Onda var bu aariflik hem kudretli işlär?

⁵⁵ Diil mi O dülgerin oolu? Mariya diil mi Onun anası? İakov, İosif, Simon hem İuda diil mi Onun kardaşları?

⁵⁶ Hem diil mi Onun hepsi kızkardaşları bizim aramızda? Neredän hepsi bu işlär var Onda?»

⁵⁷ Bu beterä İisus için şüpeyä düştülär. İisus dedi onnara: «Bir dä prorok diil paasızlandırılmış ölä, nicä kendi memleketindä hem kendi evindä».

⁵⁸ İisus orada yapmadı çok kudretli işlär, onnarın inansızlıı beterinä.