Matfey 1 - Enі Baalantı

İisusun senselesi

¹ İisus Hristozun, Davidin oolunun hem Avraamın oolunun senselesi budur:

² Avraamdan duuma İsaak. İsaaktan duuma İakov. İakovdan duuma İuda hem onun kardaşları.

³ İudadan duuma Fares hem Zara, angıların anası Famar. Farestän duuma Esrom. Esromdan duuma Aram.

⁴ Aramdan duuma Aminadav. Aminadavdan duuma Naasson. Naassondan duuma Salmon.

⁵ Salmondan duuma Vooz, Voozun anası Raav. Voozdan duuma Ovid, angısının anası Ruf. Ovidtän duuma İessey.

⁶ İesseydän duuma padişah David. Davidtän duuma Solomon, angısı Uriyanın dulundan duudu.

⁷ Solomondan duuma Rovoam. Rovoamdan duuma Aviya. Aviyadan duuma Asa.

⁸ Asadan duuma İosafat. İosafattan duuma İoram. İoramdan duuma Oziya.

⁹ Oziyadan duuma İoafam. İoafamdan duuma Ahaz. Ahazdan duuma Ezekiya.

¹⁰ Ezekiyadan duuma Manassiya. Manassiyadan duuma Amon. Amondan duuma İosiya.

¹¹ İosiyadan duuma İehoniya hem onun kardaşları, taa İzrail milleti geçmediynän Vavilon esirliinä.

¹² Vavilona geçtiktän sora: İehoniyadan duuma Salafiil. Salafiildän duuma Zorovavel.

¹³ Zorovaveldän duuma Aviud. Aviudtan duuma Eliakim. Eliakimdän duuma Azor.

¹⁴ Azordan duuma Sadok. Sadoktan duuma Ahim. Ahimdän duuma Eliud.

¹⁵ Eliudtan duuma Eleazar. Eleazardan duuma Matfan. Matfandan duuma İakov.

¹⁶ İakovdan duuma İosif, Mariyanın kocası. Mariyadan duuma İisus, Angısına dener Hristos.

¹⁷ Ölä ki, Avraamdan Davidä kadar ondört evlat boyu; Davidtän Vavilon esirliinä kadar ondört evlat boyu; Vavilon esirliindän Hristoza kadar hep ondört evlat boyu.

İisusun duuması

¹⁸ İisus Hristozun duuması bölä oldu: açan Onun anası Mariya İosiflän yavklu olduydu, ama taa yaşamardılar barabar, annaşıldı, ani Mariya Ayoz Duhtan gebä kaldı.

¹⁹ Onun yavklusu İosif, çünkü dooru bir adamdı da istämärdi utandırsın Mariyayı aalemin önündä, kararladı saklıdan ondan atılmaa.

²⁰ Bunu düşünärkän, Saabidän bir angil düşündä ona göründü da dedi: «İosif, Davidin oolu! Korkma Mariyayı kendinä karı almaa, zerä onun gebä kalması Ayoz Duhtan.

²¹ Mariya bir ool duuduracek. Onun adını İisus koyacan, zerä O Kendi insanını günahlarından kurtaracek».

²² Bunnar hepsi oldu, ki tamannansın, ne Saabi söledi proroklan, angısı deer:

²³ «Tä kız gebä kalacek da bir ool duuduracek. Onun adını koyaceklar „Emmanuil“, annaması „Allah bizimnän“».

²⁴ Açan İosif uyandı, yaptı nicä Saabinin angili sımarladı, da Mariyayı karı kendinä kabletti.

²⁵ Ama onunnan birleşmedi, taa Mariya duudurmayınca oolunu, da duuan uşaan adını İisus koydu.