Mark 9 - Enі Baalantı

¹ O dedi onnara: «Dooru söleerim sizä, ani kimisi burada durannardan ölmeyecek, görmeyincä Allahın Padişahlıını kudretliklän geleräk».

İisus peydalanêr metinniktä

² Altı gündän sora İisus aldı Petriyi, İakovu hem İoanı da salt onnarı pindirdi bir üüsek bayır üstünä. Orada İisusun görünüşü diişti onnarın gözleri önündä.

³ Onun rubaları oldular ak-yalabık, kaar gibi. Yoktur kolay bu erdä bir çamaşırcı bölä biyazladabilsin.

⁴ Onnara peydalandı İliya hem Moisey, lafa durarak İisuslan.

⁵ Petri dedi İisusa: «Üüredici, ii, ki buradayız. Yapalım üç bordey: bir Sana, bir Moiseyä, bir dä İliyaya».

⁶ Başka bilmärdi ne lafetsin, zerä korktuydular.

⁷ Geldi bir bulut da gölgesinnän kapladı onnarı. Bulut içindän işidildi bir ses, angısı deyärdi: «Budur Benim sevgili Oolum, Onu sesleyin!»

⁸ Üürenicilär birdän baktılar dolaya, başka kimseyi görmedilär, İisustan kaarä.

⁹ Açan inärdilär bayır üstündän, İisus sımarladı, sölämesinnär kimseyä, ne gördülär, Adam Oolu dirilmeyincä ölüdän.

¹⁰ Onnar bu sımarlamayı tamannadılar, ama biri-birinä sordular: «Nesoy annamaa „dirilmeyincä ölüdän“?»

¹¹ Sora İisusa sordular: «Neçin bilgiçlär deerlär, ani ilkin lääzım gelsin İliya?»

¹² İisus onnara cuvap etti: «Hakına, ani İliya ilkin gelecek da erleştirecek hepsini. Ama nasıl yazılı Adam Oolu için, ki lääzım çok zeetlensin hem paasızlandırılmış olsun?

¹³ Ama söleerim sizä, ani İliya şindän sora geldi, onunnan yaptılar ne istedilär, nicä onun için vardı yazılı».

Çocuk fena duhtan kurtulêr

¹⁴ Açan etiştilär öbür üürenicilerä, gördülär çok insan onnarın dolayında hem bilgiçleri, angıları çekişärdilär onnarlan.

¹⁵ Açan insannar gördülär İisusu, şaştılar da kaçarak karşı çıktılar, selämnesinnär Onu.

¹⁶ O sordu onnara: «Ne dartışêrsınız onnarlan?»

¹⁷ Birisi insan içindän cuvap etti: «Üüredici, getirdim Sana oolumu, angısı tutulu bir mutuluk duhundan.

¹⁸ Neredä onu tutêr, urêr erä, da çocuun aazından köpük çıkêr, o dişlerini gıcırdadêr da kaskatı kalêr. Yalvardım, Senin üürenicilerin çıkarsınnar fena duhu, ama çıkaramadılar».

¹⁹ «İnansız senselä! – dedi İisus. – Nekadar vakıt taa sizinnän olacam? Nekadar vakıt dayanacam sizä? Getirin onu Bana».

²⁰ Getirdilär onu İisusa. Açan duh gördü İisusu, hemen kuvetlän sarsaladı çocuu. Çocuk düştü erä da yuvarlanardı, köpük aazında.

²¹ İisus sordu onun bobasına: «Nezamandan bölä olêr?» «Küçüklüündän, – cuvap etti o. –

²² Çok sıra duh atêr onu ateşä hem su içinä, öldürsün deyni. Eer yapabilärseydin bişey, acı da yardım et bizä!»

²³ İisus cuvap etti: «Yapabilärseydin mi? Hepsi var nicä olsun onnar için, kim inanêr».

²⁴ Ozaman çocuun bobası baardı /yaşlan gözlerindä/: «İnanêrım, Saabi, yardım et bana, enseyim inansızlıımı!»

²⁵ Açan İisus gördü, ani insan kaçışıp-toplaşêr, azarladı fena duhu da dedi: «Mutu hem saar duh, Bän sımarlêêrım sana: çık dışarı bu çocuktan da başka girmä ona».

²⁶ Fena duh, baararak hem kuvetlän sarsalayarak çocuu, çıktı. Çocuk oldu ölü gibi, da çoyu sandı, ani öldü.

²⁷ Ama İisus, tutup elindän, kaldırdı onu, da o kalktı ayakça.

²⁸ İisus, açan girdi içeri, üürenicileri yalnızkan sordular Ona: «Neçin biz çıkaramadık fena duhu?»

²⁹ «Bu soylar uuradılêrlar sade duaylan /hem oruçlan/», – cuvap etti İisus.

İisus enidän haberleer ölümünü hem dirilmesini

³⁰ Çıkıp oradan, geçtilär Galileyadan. İisus istämärdi, kimsey bilsin bunu.

³¹ Zerä, üüredip üürenicilerini, deyärdi onnara: «Adam Oolu verilecek insanın elinä. Onu öldüreceklär, ama üç gündän sora dirilecek».

³² Ama üürenicileri annamardılar bu lafları, sormaa da korkardılar.

Kim en büük?

³³ Geldilär Kapernaum kasabasına, da açan İisus girdi içeri, sordu onnara: «Ne iş için lafedärdiniz biri-birinizlän yolda?»

³⁴ Onnar susardılar, zerä yolda çekiştiydilär, angısı en büük olacek.

³⁵ Ozaman İisus oturdu, topladı onikisini da dedi onnara: «Eer birkimsey istärseydi olsun ilk, lääzım olsun en bitki hem hepsinä izmetçi!»

³⁶ Aldı bir uşak, koydu onnarın arasına, kucaklayıp onu, dedi:

³⁷ «Kim kableder birisini bu uşaklardan Benim adıma, o Beni kableder. Kim dä kableder Beni, kableder diil Beni, ama Onu, Kim Beni yolladı».

Kim diil karşı bizä, o bizimnän

³⁸ İoan dedi İisusa: «Üüredici, biz gördük bir adam, ani uuradardı fena duhları Senin adına, da durguttuk onu, zerä o gezmeer bizimnän».

³⁹ «Durgutmayın, zerä kim yapêr kudretli işlär Benim adıma, yok nasıl tez başlasın Beni kötülemää, – dedi İisus. –

⁴⁰ Kim diil karşı sizä, o sizinnän.

⁴¹ Hem kim /Benim adıma/ verecek bir çölmek su sizä, zerä siz Hristozun üürenicileriysiniz, dooru söleerim sizä, ani ödeksiz kalmayacek.

Günaha düşürmeyin başkasını

⁴² Ama birkimsey günaha düşürärsä birini bu küçüklerdän, ani Bana inanêrlar, ona taa islää, baalasınnar boynusuna bir büük dermen taşı da atsınnar deniz içinä.

⁴³ Eer elin seni günaha düşürärsä, kes onu. Taa islää, çolak ömürä giräsin, nekadar iki ellän cendemä gidäsin, süünmäz ateşä, /

⁴⁴ neredä onnarın kurtları ölmeerlär, hem ateş süünmeer/.

⁴⁵ Eer ayaan seni günaha düşürärsä, kes onu. Taa islää, bir ayaklan ömürä giräsin, nekadar iki ayaklan cendemä atılasın, /süünmäz ateşä,

⁴⁶ neredä onnarın kurtları ölmeerlär, hem ateş süünmeer/.

⁴⁷ Eer gözün seni günaha düşürärsä, çıkar onu. Taa islää sana, giräsin bir gözlän Allahın Padişahlıına, nekadar iki gözlän atılasın cendemä,

⁴⁸ neredä onnarın kurtları ölmeerlär, hem ateş süünmeer.

⁴⁹ Herbir adamın üstünä ateş döküler, /nicä kurbanın üstünä tuz döküler/.

⁵⁰ Tuz iidir, ama eer tuz dadını kaybedärseydi, nasıl onu enidän tuzlu yapasınız? Sizdä tuz olsun, hem barışmakta yaşayın».