Mark 6 - Enі Baalantı

İisus paasızlanêr Kendi memleketindä

¹ İisus oradan gitti da geldi Kendi memleketinä. Üürenicilär gittilär Onun ardına.

² Cumertesi günü İisus başladı üüretmää sinagogada. Çoyu, ani seslärdilär Onu, şaşmaklan sorardılar: «Neredän hepsi bunnar var Onda? Nesoy aariflik verili Ona? Nesoy Onun ellerindän olêr bu kudretli işlär?

³ Diil mi O dülger, Mariyanın oolu, İakovun, İosifin, İudanın hem Simonun kardaşı? Diil mi Onun kızkardaşları bizim aramızda?» Bu beterä İisus için şüpeyä düştülär.

⁴ İisus dedi onnara: «Bir dä prorok diil paasızlandırılmış ölä, nicä kendi memleketindä, kendi hısımnarında hem kendi evindä».

⁵ Yapamadı orada bir dä kudretli iş, sade nekadar birkaç hastayı, koyup ellerini, alıştırdı.

⁶ O şaşardı onnarın inansızlıına. Sora gitti dolay küülerä da orada üüredärdi.

⁷ Çaardı Kendinä oniki üürenicisini da başladı yollamaa ikişär-ikişär. Verdi onnara zaabitlik fena duhların üstünä

⁸ da sımarladı onnara: «Bişey almayın yol için, sopadan kaarä. Almayın ne ekmek, ne hiybä, ne dä para.

⁹ Ayaklarınıza giiyin sandali, sırtınıza giimeyin iki kat ruba».

¹⁰ Sora dedi: «Angı evä gireceniz, o evdä kalın, oradan gidincä.

¹¹ Eer bir erdä insan sizi kabletmärseydi eki seslämärseydi, çıkıp oradan, artık tozları da ayaklarınızdan silkin, azar gibi onnara karşı. Dooru söleerim sizä: daava günündä Sodoma hem Gomorraya olacek taa ilin, nekadar o kasabaya».

¹² Onnar gittilär da nasaat ettilär, ani insan dönsün günahlarından Allaha.

¹³ Çok fena duhları uurattılar hem çok hastaları alıştırardılar, yaalayıp zeytin yaayınnan.

İoan Vaatizedicinin ölümü

¹⁴ Padişah İrod işitti İisus için, zerä Onun adı hererdä anılardı. Kimisi deyärdi: «İoan Vaatizedici ölüdän dirildi, onuştan yapabiler kudretli işlär».

¹⁵ Başkaları deyärdilär: «O İliya», taa başkası deyärdi: «O bir prorok, evel vakıttan proroklardan biri gibi».

¹⁶ Bunu sesleyip, İrod dedi: «Bu – İoan, angısının kafasını aldım. O dirildi ölüdän».

¹⁷ Zerä İrod kendisi yolladıydı, tutsunnar da kapasınnar İoanı zındana, İrodiadanın beterinä, angısı Filipin, İrodun kardaşının, karısıydı, ama İrod ona evlenmişti.

¹⁸ İoan deyärdi ona: «Düşmeer yaşayasın senin kardaşının karısınnan».

¹⁹ Onuştan İrodiada kin güdärdi İoana da bakardı öldürtmää onu, ama yoktu kolaylıı.

²⁰ İrod korkardı İoandan, ama koruyardı onu, zerä bilärdi, ani o dooru hem ayoz bir adam. Onu seslärkän, hiç bilmärdi, ne yapsın, ama hep okadar mayıllıklan seslärdi onu.

²¹ Bir uygun gün oldu, açan İrod kendi duumak günün yortusunda yaptı konuş öndercilerinä, asker zaabitlerinä hem Galileyadan büüklerä.

²² İrodiadanın kızı girdi da oynadı. Beendirdi kendini İroda hem konaklara. Ozaman padişah dedi kıza: «İstä bendän, ne istärseydin, da bän verecäm sana».

²³ Baalandı eminnän: «Ne dä istärseydin bendän, verecäm sana, artık istärseydin padişahlıımın yarısını da».

²⁴ Kız çıktı dışarı da sordu kendi anasına: «Ne isteyim?» O cuvap etti: «İstä İoan Vaatizedicinin kafasını».

²⁵ Kız çabuk gitti padişaha da dedi: «İsteerim, şindi veräsin bana bir çini içindä İoan Vaatizedicinin kafasını!»

²⁶ Padişah çok güçlendi, ama atılmaa istämedi, zerä emin ettiydi konakların önündä.

²⁷ Yolladı bir cellat asker da sımarladı, getirsin İoanın kafasını.

²⁸ Asker gitti da aldı İoanın kafasını, getirdi bir çini içindä da verdi kıza, kız da verdi kendi anasına.

²⁹ Açan İoanın üürenicileri işittilär bunu, gelip, aldılar onun güüdesini da mezar içinä koydular.

Beş bin adam doyurulêr

³⁰ Apostollar döndülär geeri İisusa da annattılar Ona hepsini, ne yaptılar hem nicä üürettilär insanı.

³¹ İisus dedi: «Gelin Benimnän bir sapa erä yalnız da dinnenin biraz». Zerä vardı çokluk, ani gelärdilär hem gidärdilär, da onnarın yoktu kolaylıkları artık ekmek isinnär.

³² Gittilär kayıklan bir sapa erä, ki olsunnar yalnız.

³³ İnsan gördü onnarı gidärkän da tanıdı. Herbir kasabadan kaçtılar orayı yayan da etiştilär onnarın önneri sora.

³⁴ Açan çıktı kayık içindän, İisus gördü çok insan. Canı acıdı onnara, zerä onnar nicä güdücüsüz koyunnardı. Başladı onnarı üüretmää hertürlü işlär.

³⁵ Çünkü vakıt hayli geçmişti, üürenicilär yaklaştılar İisusa da dedilär: «Burası çol er, vakıt şindän sora geç.

³⁶ Kolver insanı, gitsinnär dolay küülerä hem kırdakı evlerä da satın alsınnar kendilerinä bişey imää, /zerä yok ne isinnär/».

³⁷ «Siz verin onnara imää», – dedi İisus. Ama üürenicilär cuvap ettilär: «Var mı nicä ikiüz dinarlan gidelim da satın alalım ekmek, ki doyurabilelim onnarı?»

³⁸ İisus sordu onnara: «Ya gidin da bakın, kaç ekmek sizdä var?» Annadıktan sora cuvap ettilär: «Var beş ekmek hem iki balık».

³⁹ Ozaman sımarladı, oturtsunnar hepsini bölük-bölük eşil çimen üstünä.

⁴⁰ İnsan oturdu erä sıra-sıra ellişär hem üzär kişi bir sırada.

⁴¹ İisus aldı beş ekmää hem iki balıı, kaldırdı bakışını gökä, iisözledi da kırıp ekmekleri, verdi üürenicilerinä, ki onnar payetsinnär insana. İki balıı da böldü hepsinä.

⁴² Hepsi idi da doyundu.

⁴³ Topladılar oniki sepet, dolu ekmek parçasınnan hem ne balıklardan kaldıydı.

⁴⁴ Hepsi, kim idi, vardı beş bin adam.

İisus gezer su üstündä

⁴⁵ İisus çalıştırdı üürenicilerini, tez girsinnär kayık içinä da önü sora geçsinnär gölün öbür tarafına, Vifsaida kasabasına. Bu vakıt Kendisi lääzımdı salversin insanı.

⁴⁶ Açan söledi insana «kal saalıcaklan», gitti bir bayır üstünä, ki dua etsin.

⁴⁷ Açan avşam oldu, kayık gölün ortasındaydı, ama İisus yalnız bulunardı kenarda.

⁴⁸ Gördü, ani onnar savaşêrlar kürek çekeräk, zerä lüzgär karşı esärdi. Onuştan gecenin dördüncü bekçiliindä İisus geldi onnara, gideräk su üstündä, da geçmää istedi onnarın yanından.

⁴⁹ Onnar, görüp Onu gideräk su üstündä, Onu bir tılsım sandılar da keskin seslän baardılar.

⁵⁰ Zerä hepsi, görüp Onu, korktular. Ozaman İisus dedi onnara: «Uslanın, bu Bänim, korkmayın!»

⁵¹ Sora, gelip onnara, pindi kayık içinä, da lüzgär durgundu. Onnar sarp çok şaştılar.

⁵² Çünkü ürekleri uyvaşıktı, onnar annamadıydılar ekmeklärlän meraklı işi.

Gennisaret erindä

⁵³ Suyu geçtiynän, onnar etiştilär kenara, Gennisaret erinä.

⁵⁴ Açan çıktılar kayık içindän, kenarda insan hemen tanıdı İisusu.

⁵⁵ Kaçtılar hepsi dolay erlerä da hererdä, neredä işittilär Onun için, başladılar getirmää yataklar üstündä hastaları orayı, neredä O bulunurdu.

⁵⁶ Angı kasabalara, küülerä hem kırdakı evlerä girärdi İisus, hererdä çıkarırdılar meydannara hastaları da yalvarardılar, braksın, ki diisinnär baarlem Onun rubasına. Hepsi, kim Ona diiyärdi, alışardı.