Mark 5 - Enі Baalantı

İisus koolêêr fena duhları Gadarada

¹ Onnar etiştilär gölün öbür tarafına, Gadara erlerinä.

² Açan İisus indi kayık içindän, mezar laamnarından Ona karşı çıktı bir adam, tutulu fena duhtan.

³ Bu adam yaşardı mezar laamnarı içindä. Kimsey artık onu sincirlärlän dä baalayamardı.

⁴ Çok sıra baalardılar onu sincirlärlän hem bukaalarlan, ama sincirleri koparardı, bukaaları kırardı. Kimsey onu uslandıramardı.

⁵ Herzaman, gecä-gündüz, mezar laamnarında hem bayırlar üstündä, baarardı hem taşlarlan kendi-kendini yaralardı.

⁶ O uzaktan gördü İisusu, kaçarak geldi da baş iiltti Onun önündä,

⁷ baararak keskin seslän: «Neyin var Senin benimnän, İisus, Pek üüsek Allahın Oolu? Yalvarêrım Sana Allahın adınnan: zeetlämä beni!»

⁸ Bölä dedi, zerä İisus sımarladı: «Fena duh, çık dışarı bu adamdan!»

⁹ Sora sordu: «Nesoy senin adın?» O cuvap etti: «Benim adım Legion, zerä biz çoklukuz».

¹⁰ Pek yalvarmaa başladı İisusa, koolamasın onnarı oradan.

¹¹ Bayır yamacında bir büük sürü domuz otlardı.

¹² Fena duhlar yalvardılar: «Brak bizi, girelim domuzlar içinä».

¹³ İisus braktı, girsinnär. Fena duhlar çıktılar bu adamdan da girdilär domuzlar içinä. Bütün sürü hızlandı dik yamaçtan da atladı göl içinä. Yakın iki bin domuz buuldu göl içindä.

¹⁴ Domuzçular kaçtılar da haberledilär kasabada hem dolay küülerdä. İnsan çıktı görsün, ne oldu.

¹⁵ Geldilär İisusa da gördülär fena duhtan tutulu adamı, angısının içindä vardı bir legion fena duh, oturarak giiyimni hem aklı başında. Hepsini bir korku aldı.

¹⁶ Onnar, kim bu oluşu gördülär, söledilär insana hepsini, ne oldu fena duhtan tutulu adamnan hem domuzlarlan.

¹⁷ Ozaman insan başladı yalvarmaa, ki İisus gitsin onnarın erlerindän.

¹⁸ Açan İisus girärdi kayık içinä, adam, ani öncä fena duhtan tutuluydu, yalvardı İisusa, alsın onu Kendisinnän.

¹⁹ Ama İisus kayıl olmadı da dedi: «Git evä da sölä kendikilerinä hepsini, ne Saabi yaptı sana hem nesoy acıdı seni».

²⁰ O gitti da başladı Dekapolistä sölemää hepsini, ne yaptı İisus ona. Hepsi şaşardılar.

Kız diriler, hasta karı alışêr

²¹ Açan İisus kayıklan karşı tarafa döndü, göl boyunda çok insan toplandı Onun dolayına.

²² Geldi Ona sinagogadan bir önderci, adı İair. Görüp İisusu, düştü Onun ayaklarına

²³ da pek yalvardı: «Benim kızım ölüm döşeendä. Yalvarêrım, gel da koy ellerini onun üstünä, ki saa olsun da yaşasın».

²⁴ İisus gitti onunnan. Onun ardına gidärdi çok insan da her taraftan sıkışardılar.

²⁵ Orada vardı bir karı, ani oniki yıldan beeri zeetlenärdi kan akmasından.

²⁶ O çok savaşmıştı çok doftorların elindän, harcamıştı hepsini varlıını, ama hiç fayda olmadı, buna karşı, hastalıı olmuştu taa zor.

²⁷ O, işidip İisus için, yaklaştı geeridän, insan içindän, da diidi rubasına.

²⁸ Zerä düşünärdi: «Sade diisäm Onun rubalarına, alışacam».

²⁹ Açan diidi, birdän kan akması durdu. O duydu, ani güüdesi alıştı hastalıktan.

³⁰ İisus duydu, ani bir kuvet Ondan çıktı, döndü insana dooru da sordu: «Kim diidi Benim rubama?»

³¹ Üürenicileri cuvap ettilär: «Görmeersin mi, nicä insan her taraftan sıkıştırêr? Sän dä sorêrsın: „Kim diidi Bana?“»

³² Ama O bakınardı dolaya, görsün deyni, kim diidi Ona.

³³ Bu karı korkudan titirärdi, zerä bilärdi, ne oldu onunnan. O yaklaştı da düştü Onun ayaklarına, sora annattı işin aslısını.

³⁴ İisus dedi ona: «Kızım! Senin inanın seni alıştırdı, git usluluklan da saa ol senin hastalıından».

³⁵ İisus taa lafedärkän, evdän geldilär da sinagoga öndercisinä dedilär: «Kızın öldü, naafilä savaştırma Üürediciyi».

³⁶ İisus, esaba koymayarak bu lafları, dedi sinagoga öndercisinä: «Korkma, sade inan».

³⁷ O brakmadı, kimsey gitsin Onun ardına, salt Petriyi, İakovu hem İoanı, İakovun kardaşını.

³⁸ Gelip sinagoga öndercisinin evinä, gördü orada kalabalık, büük seslän aalamak hem sıralamak.

³⁹ Girip orayı, dedi onnara: «Neçin şamata yapêrsınız hem aalêêrsınız? Kız ölmedi, ama uyuyêr».

⁴⁰ Onnar gülmää aldılar Onu. Ama O uurattı hepsini dışarı, aldı kızın bobasını, anasını hem onnarı, kim Onunnandı, da girdi orayı, neredä kız yatardı.

⁴¹ İisus tuttu kızı elindän da dedi ona: «Talifá kumí», annaması: «Kız, deerim sana, kalk».

⁴² Kız çabuk kalktı da başladı gezinmää. O oniki yaşındaydı. Hepsi görennär şaş-beş kaldı.

⁴³ İisus sıkıdan sımarladı onnara, kimseyä bunu sölämesinnär, sora dedi, versinnär kıza imää.