Mark 4 - Enі Baalantı

Ekici için örnek

¹ İisus enidän başladı üüretmää insanı göl boyunda. Yanına toplandıydı ölä çok insan, ani İisus, pinip, oturdu bir kayık içinä su boyunda, ama hepsi insannar kaldılar kenarda.

² İisus başladı onnarı üüretmää örneklärlän çok işlär için. Üürederäk onnarı, İisus söledi bu örnää:

³ «Sesleyin. Tä ekici çıktı toom ekmää.

⁴ Açan ekärdi, razgeldi, ani toomnardan birazı düştü yol boyuna. Kuşlar kondular da idilär onnarı.

⁵ Başka toomnar taşlık erä düştülär, neredä az toprak vardı. Toomnar tez filizlendi, zerä toprak diildi derin.

⁶ Ama açan güneş çıktı, onnar sörpeştilär da kurudular, zerä kökleri suvadaydı.

⁷ Taa başka toomnar çalılar içinä düştülär. Çalılar büüdülär da buulttular filizleri, onnar verämedilär bereket.

⁸ Ama kalan toomnar ii topraa düştülär. Büüdülär, başak verdilär da bereket getirdilär: birisi otuz, öbürü altmış, taa öbürü üz katına».

⁹ Sora dedi onnara: «Kimin var kulaa işitmää deyni, ko işitsin!»

¹⁰ Açan İisus insandan ayırıktı, oniki üürenicisi hem kalan izleyicileri sordular Ona bu örnek için.

¹¹ O cuvap etti onnara: «Sizä verildi, annayasınız Allahın Padişahlıının saklılıını, ama kalan insana hepsi sölener örneklärlän.

¹² Ölä ki, „onnar gözlerinnän bakêrlar, ama görmeerlär; kulaklarınnan işiderlär, ama annamêêrlar, ki birtürlü dönmesinnär Allaha, da baaşlansın günahları“».

¹³ Sora sordu onnara: «Annamêêrsınız bu örnää mi? Ozaman nesoy annayacenız kalan örnekleri?

¹⁴ Ekici eker Allahın sözünü.

¹⁵ Kimi insannar benzeer toomnara, ani düşer yol boyuna, neredä o söz ekiler. Onnar sözü işittiynän, tez geler şeytan da çalêr sözü, ani ekiliydi üreklerindä.

¹⁶ Toomnar, ekilmiş taşlık erä, onnardır, angıları, sözü işidip, çabuk kablederlär sevinmäklän,

¹⁷ ama yok kökleri hem az vakıt tutunêrlar. Açan geler zorluk eki koolamak Allahın sözü için, onnar tez atılêrlar.

¹⁸ Başka toomnar, ekilmiş çalılar içinä, onnardır, kim işider sözü,

¹⁹ ama bu zamanın kahırları, zenginniin aldangaçlıı hem başka hamellär, girip onnara, buuldêrlar sözü, da onnar bereket getirämeerlär.

²⁰ Toomnar, ekilmiş ii topraa, onnardır, kim, işidip sözü, kablederlär da bereket getirerlär: birisi otuz, öbürü altmış, taa öbürü üz katına».

Şafk görünär erdä

²¹ Sora İisus dedi onnara: «Şafkı getirerlär, ki koysunnar küp altına osa pat altına mı? Diil mi koysunnar deyni kandillik üstünä?

²² Yok bişey örtülü, ani açılmasın, hem yok bişey saklı, ani üzä çıkmasın.

²³ Kimin var kulaa, işitmää deyni, ko işitsin».

²⁴ Hem dedi onnara: «Bakın, ne işidersiniz. Ne ölçüylän ölçeceniz, o ölçüylän Allahtan ölçülmüş olacenız, salt taa zeedelenmiş.

²⁵ Zerä kimdä var, ona taa çok verilecek, ama kimdä yok, ondan alınacek, neyi dä var».

Filiz salverän toom için örnek

²⁶ Sora dedi: «Allahın Padişahlıı benzeer ona, nicä bir adam eker toom tarlasına.

²⁷ Gecä uyuyêr, gündüz uyanık durêr, ama toom filiz salverer, büümää başlêêr. Netürlü bu olêr, adam hiç bilmeer.

²⁸ Toprak kendiliindän bereket verer: ilkin bir eşil filiz, sora başak, bitkidä başak dolu teneylän.

²⁹ Açan bereket olgun olêr, işä hiç oyalanmayarak, oraa koyêr, zerä geldi biçmäk vakıdı».

Hardal toomu için örnek

³⁰ Sora dedi: «Neylän benzedelim Allahın Padişahlıını, ne örneklän açıklayalım onu?

³¹ O benzeer hardal toomuna, ani, ekildiynän toprak içinä, taa küçük hepsi toomnardan er üstündä.

³² Ama ekildiktän sora büüyer da olêr taa büük hepsi eşilliklerdän. Onun dalları büüyer ölä, ki gök kuşları var nicä yuvalarını yapsınnar onun gölgesindä».

³³ İisus bunun gibi çok örneklärlän nasaat etti Allahın sözünü onnara, nekadar onnar annayabildilär.

³⁴ Lafetmärdi örneksiz. Sora, açan kalardı yalnız üürenicilerinnän, hepsini açıklardı.

İisus boranı uslandırêr

³⁵ O günü avşamnen İisus dedi onnara: «Geçelim gölün öbür tarafına».

³⁶ Üürenicilär, salverip insanı, götürdülär Onu kayıklan, angısında O bulunurdu. Onunnan bilä vardı başka kayıklar da.

³⁷ Başladı esmää bir büük boran, dalgalar fırladardı su kayık içinä, da kayık dolardı suylan.

³⁸ Ama İisus kayıın geerisindä uyuyardı, yastık başı altında. Üürenicilär uyandırdılar Onu da dedilär: «Üüredici, ne Senin yok kasavetin, ani biz kaybeleriz?»

³⁹ O kalktı, azarladı lüzgeri da gölä dedi: «Sus, da işidilmesin sesin!» Lüzgär durdu da büük usluluk oldu.

⁴⁰ Sora dedi üürenicilerinä: «Neçin ölä korkaksınız? Ne, sizdä taa yok mu inan?»

⁴¹ Onnarı bastı bir büük korku. Biri-birinnän lafedärdilär: «Kimdir Bu, Angısını lüzgär hem dalgalar sesleerlär?»