Mark 3 - Enі Baalantı

Kuru ellän bir adam

¹ İisus enidän girdi sinagoga içinä. Orada vardı bir adam kuru ellän.

² Fariseylär gözledärdilär İisusun ardına, görsünnär deyni, alıştıracek mı bu adamı cumertesi günü, ki sora kabaatlandırsınnar Onu.

³ İisus dedi kuru ellän adama: «Kalk da çık karşıya».

⁴ Sora sordu onnara: «Ne düşer cumertesi günü yapmaa: iilik mi osa kötülük mü? Yaşamayı kurtarmaa mı osa öldürmää mi?» Onnar susardılar.

⁵ Üfkeli baktı dolayında olannara, güçleneräk onnarın üreklerin uyvaşıklıı beterinä, sora dedi o adama: «Uzat elini!» O uzattı, da eli alıştı, enidän saa oldu, nicä öbür eli.

⁶ Fariseylär çıktılar dışarı da çabuk İrodun adamnarınnan annaştılar, nesoy öldüräbilsinnär İisusu.

İisus göl yanında alıştırêr hastaları

⁷ İisus üürenicilerinnän barabar yollandı göl boyuna. Onun ardına gitti çok insan Galileyadan, İudeyadan,

⁸ İerusalimdän, İdumeyadan hem İordanın öbür tarafından. İnsannar Tir hem Sidon kasabaların tarafından, işidip, ne O yapêr, sürü-sürü gelärdilär Ona.

⁹ İisus sımarladı üürenicilerinä hazırlasınnar Ona bir kayık, ki insan sıkıştırmasın Onu.

¹⁰ Çünkü çok insan alıştırdıydı, onuştan hastalar itirişirdilär, baarlem diisinnär Ona.

¹¹ Fena duhlar, açan görärdilär Onu, düşärdilär erä Onun önündä da baarardılar: «Sän Allahın Ooluysun!»

¹² Ama O sert sımarlardı onnara, açıklamasınnar Onu başkalarına.

İisus ayırêr oniki apostol

¹³ Sora İisus pindi bayır üstünä da çaardı, kimi istedi. Onnar toplandılar Ona.

¹⁴ Onnarın içindän ayırdı onikisini, angılarına apostol dedi, ki olsunnar Onunnan, da yollasın onnarı nasaat etmää,

¹⁵ hem kuvetleri olsun /alıştırmaa hastaları hem/ koolamaa fena duhları.

¹⁶ Bunnar, kimi İisus ayırdı, oniki kişi: Simon, angısının adını koydu Petri;

¹⁷ İakov hem İoan, Zevedeyin oolları, angıların adlarını koydu Voanerges, annaması «Gök gürültü oolları»;

¹⁸ Andrey; Filip; Varfolomey; Matfey; Foma; İakov, Alfeyin oolu; Faddey; Simon Kananit

¹⁹ hem İuda İskariot, angısı İisusu sattı.

Ayoz Duha karşı günah

²⁰ İisus bundan sora evä gitti. Enidän toplandı insan ölä çokluk, ani İisuslan üürenicilerin yoktu kolayı ekmek isinnär.

²¹ Hısımnarı işittilär bunu da geldilär, alsınnar Onu, zerä onnar deyärdilär, ani O akıldan çıktı.

²² Bilgiçlär, ani geldilär İerusalimdän, deyärdilär, ani O Veelzevuldan tutulu, hem ani fena duhları çıkarêr fena duhların öndercisinin kuvedinnän.

²³ İisus topladı onnarı da lafetti örneklärlän: «Nesoy şeytan var nasıl şeytanı çıkarsın?

²⁴ Herbir padişahlık, neredä bölünmäk olêr, yok nasıl ayakça dursun.

²⁵ Herbir ev, neredä bölünmäk olêr, yok nasıl ayakça dursun.

²⁶ Hep ölä şeytan da, kendi-kendinä karşı gidärsä hem bölünmäk yaparsa, duramaz ayakça, ama bitkisi gelir.

²⁷ Kimsey yok nasıl girsin kaavi olanın evinä, ki çalsın onun varlıını, eer ilkin baalamarsaydı onu. Salt ondan sora var nasıl soysun onun evini.

²⁸ Dooru söleerim sizä, her günah, ani insan yapêr, hem her kötü laf, ani söleer, baaşlanêr.

²⁹ Ama kim kötüleer Ayoz Duhu, hiç bir sıra bilä baaşlanmayacek. O kabaatlı bir günahlan, ani divecinä kalacek».

³⁰ Bunu söledi, zerä onnar deyärdilär: «Onda var fena duh».

İisusun anası hem kardaşları

³¹ O vakıt geldilär İisusun anası hem kardaşları da, durup dışarda, yolladılar çaarsınnar Onu.

³² Çokluk oturardı Onun dolayında, açan Ona söledilär: «Bak, Senin anan hem kardaşların dışarda, seni aarêêrlar».

³³ «Kim Benim anam hem kim Benim kardaşlarım?» – cuvap etti O.

³⁴ Sora baktı Onun dolayında oturannara da dedi: «Tä, Benim anam hem kardaşlarım!

³⁵ Kim tamannêêr Allahın istediini, onnar Bana kardaş, kızkardaş hem ana».