Mark 2 - Enі Baalantı

İisus alıştırêr kötürüm adamı

¹ Birkaç gündän sora İisus enidän geldi Kapernaum kasabasına. İşidildi, ani O evdä.

² Ölä çok insan toplandı, ani kapunun dışanda artık durmaa er yoktu. İisus annadardı onnara Allahın sözünü.

³ Ona birkaç adam geldi, getireräk bir kötürüm hasta, angısını dört kişi taşıyardı.

⁴ Çünkü yaklaşamardılar Ona kalabalık beterinä, açtılar evin örtüsünü, neredä bulunurdu İisus, da indirdilär hastayı döşek üstündä.

⁵ İisus, görüp onnarın inanını, dedi kötürüm adama: «Oolum! Günahların baaşlandı».

⁶ Bilgiçlerdän kimisi, angıları oturardılar orada, kendi-kendilerinä düşünärdilär:

⁷ «Neçin bu adam Allahı bölä kötüleer? Kim, Allahtan kaarä, var nasıl günahları baaşlasın?»

⁸ İisus birdän içyandan duydu, ani onnar bölä düşünerlär, onuştan dedi onnara: «Neçin ölä düşünersiniz üreklerinizdä?

⁹ Ne taa kolay: kötürüm adama demää „Günahların baaşlandı mı“, osa demää „Kalk, al döşeeni da gez mi“?

¹⁰ Ama ki biläsiniz, ani Adam Oolunun var kuvedi er üstündä günahları baaşlasın…»,

¹¹ dönüp kötürüm adama, dedi: «Sana sımarlêêrım: kalk, al döşeeni da git evä!»

¹² Çabuk bu kötürüm adam hepsinin önündä kalktı, aldı döşeeni da çıktı dışarı. Hepsi şaşardılar, Allahı metinneyeräk, deyärdilär: «Bölä iş hiç bir sıra bilä görmedik!»

İisus çaarêr Leviyi

¹³ İisus enidän çıkıp-gitti göl boyuna, hepsi insan Onun yanına toplandı, da O onnarı üüredärdi.

¹⁴ Oradan geçärkän, gördü Leviyi, Alfeyin oolunu, ani otururdu erdä, neredä harç toplanardı, da dedi ona: «Gel Benim ardıma». Leviy kalktı da gitti Onun ardına.

¹⁵ Açan İisus Leviyin evindä konaklanardı, çok harççılar hem günahkerlär Onunnan hem üürenicilerinnän barabar sofrada bulunardılar. Bölä çok kişi vardı, ani Onun ardına gidärdilär.

¹⁶ Kimi bilgiçlär fariseylerdän gördülär, ani harççılarlan hem günahkerlärlän bilä iyer, onun için dedilär Onun üürenicilerinä: «Neçin O iyer /hem içer/ harççılarlan hem günahkerlärlän barabar?»

¹⁷ İisus, işidip bunu, cuvap etti onnara: «Doftor lääzım diil saa olannara, ama hastalara. Bän gelmedim, çaarayım dooruları, ama günahkerleri, /Allaha dönsünnär/».

Oruç için soruş

¹⁸ İoanın üürenicileri hem fariseylär oruç tutardılar. Birkaç kişi geldilär İisusa da sordular: «Neçin İoanın hem fariseylerin üürenicileri oruç tutêrlar, ama Senin üürenicilerin tutmêêrlar?»

¹⁹ Da dedi onnara İisus: «Var mı nasıl güveenin dostları oruç tutsunnar, açan güvää yannarında? Nekadar vakıt yannarında güvää, onnar oruç tutmazlar.

²⁰ Gelecek vakıt, açan güvää alınacek onnardan, ozaman, o gün, onnar oruç tutacek.

²¹ Kimsey eski rubaya eni yama yamamêêr, zerä eni yama taa pek eski rubayı yırtêr. Sonda yırtık taa büük olêr.

²² Kimsey eni şarabı eski tulumnar içinä doldurmaz, zerä eni şarap patladêr tulumnarı. Şarap döküler, tulumnar da zän olêr. Eni şarabı lääzım doldurmaa eni tulumnar içinä».

Ne düşer cumertesi yapmaa?

²³ Oldu ölä, ani bir cumertesi günü İisus ekinnär içindän geçärdi. Gidärkän yolda, Onun üürenicileri başak koparmaa başladılar.

²⁴ Fariseylär dedilär İisusa: «Ya bak, neçin onnar yapêrlar, ne düşmeer cumertesi günü?»

²⁵ İisus dedi onnara: «Okumadınız mı, ne yaptı David hem kafadarları, açan acıktılar?

²⁶ Nicä Aviafarın, baş popazın, vakıdında o girdi Allahın evinä da idi ekmeklerdän, ani Allahın önünä koyulardı, angılarını, popazlardan kaarä, kimsey düşmärdi isin. Sora verdi kafadarlarına da».

²⁷ İisus dedi onnara: «Cumertesi adam için kuruldu, ama diil adam cumertesi için.

²⁸ Ölä ki, Adam Oolu – artık cumertesinin dä Saabisi».