Mark 16 - Enі Baalantı

İisus diriler

¹ Açan geçti cumertesi, Mariya Magdalina, Mariya, İakovun anası, hem Salome satın aldılar kokuluk, ki gitsinnär da yaalasınnar İisusun güüdesini.

² Çin sabaalän, haftanın ilk günü, açan gün duuardı, onnar geldilär mezara.

³ Biri-birinnän lafedärdilär: «Kim acaba aktaracek bizä mezarın aazından taşı?»

⁴ Açan kaldırdılar bakışlarını, gördülär, ani taş aktarılı bir tarafa. O pek büük taştı.

⁵ Açan girdilär mezar içinä, gördülär bir genç olanı, angısı otururdu saa tarafta, giiyimni biyaz rubaylan. Karılar korkudan daptur geldilär.

⁶ O dedi onnara: «Korkmayın! Siz aarêêrsınız Nazaretli İisusu, Angısını stavroza gerdilär. O dirildi da yok burada. Tä eri, neredä koyuluydu.

⁷ Gidin da söleyin Onun üürenicilerinä hem Petriyä, ani O gider sizdän öncä Galileyaya. Orada göreceniz Onu, nicä sölediydi sizä».

⁸ Karılar, mezardan çıkıp, kaçtılar, zerä titirärdilär hem şaşmaklan doluydular, da korkudan kimseyä bişey sölämedilär. /

İisuslan buluşmak

⁹ İisus, dirildiktän sora, haftanın ilk günü sabaalän, ilkin gösterildi Mariya Magdalinaya, angısından çıkardıydı edi fena duh.

¹⁰ Mariya gitti da söledi onnara, kim Onunnan barabardı, angıları aalardılar hem sızlardılar.

¹¹ Ama onnar, açan işittilär, ani İisus dirildi, da Mariya Onu gördü, inanmadılar.

¹² Bundan sora İisus onnardan başka ikisinä gösterildi başka türlü, açan gidärdilär bir küüyä dooru.

¹³ Onnar döndülär geeri da söledilär kalanına, ama onnarı da inanmadılar.

¹⁴ Sonda, açan sofrada iyärdilär, İisus onbir üürenicisinä gösterildi. Onnarı inansızlık hem inatlık beterinä azarladı, zerä inanmadılar onnarı, kim gördü Onu dirilmesindän sora.

İisusun son sımarlaması hem gökä kalkması

¹⁵ İisus onnara dedi: «Gidin bütün dünneyä da nasaat edin İi Haberi hepsi insana.

¹⁶ Kim inanacek da vaatiz olacek, o kurtulacek, ama kim inanmayacek, kabaatlı kalacek.

¹⁷ Butürlü nışannar inancıları geçirecek: fena duhları Benim adımnan uuradaceklar, eni dillerdä lafedeceklär,

¹⁸ yılan ellerinä alaceklar. Zihirli bişey içärseydilär, onnara zarar olmayacek. Koyaceklar ellerini hastaların üstünä, da hastalar saa olaceklar».

¹⁹ Bunnarı sölediktän sora Saabi İisus gökä alındı da Allahın saa tarafında oturdu.

²⁰ Ama onnar gittilär da hererdä nasaat ettilär. Saabi onnara yardım edärdi hem laflarını kaavilärdi nışannarlan, ani sora yapılardı. Amin./