Mark 15 - Enі Baalantı

İisus kullanıcı Pilatın önündä

¹ Çin-sabaalän büük popazlar, aksakallar, bilgiçlär hem bütün Sinedrion toplanıp-annaştılar, baalayıp İisusu, götürdülär da verdilär Pilata.

² Pilat sordu Ona: «Sänsin mi İudeylerin Padişahı?» İisus cuvap etti: «Ölä, nicä söleersin».

³ Büük popazlar çok türlü kabaatlardılar Onu.

⁴ Pilat enidän sordu: «Neçin cuvap etmeersin? Bak, nekadar çok kabaatlandırêrlar Seni».

⁵ Ama İisus artık hiç cuvap etmedi, bu beterä Pilat pek şaştı.

İisus hem Varavva

⁶ Her Paskellä yortusunda Pilat kolverärdi bir kapancıyı kapandan, kimi insan istärdi.

⁷ Ozaman kapanda birisi kapalıydı, adı Varavva, öbür kalkıntıcılarlan, ani barabar kalkıntıda adam öldürdüydülär.

⁸ İnsan kalktı da başladı yalvarmaa Pilata, yapsın, nicä herzaman yapardı Paskellä yortusunda.

⁹ Pilat sordu onnara: «İsteersiniz mi, kolvereyim sizä İudeylerin Padişahını?»

¹⁰ Zerä bilärdi, ani büük popazlar Onu haseetliktän daavaya verdiydilär.

¹¹ Ama büük popazlar debeştirärdilär insanı, istesinnär, ki kolversin Varavvayı, ama diil İisusu.

¹² Pilat enidän sordu onnara: «Öleysä, ne yapayım Onunnan, Kimä deersiniz İudeylerin Padişahı?»

¹³ Onnar enidän baardılar: «Ger Onu stavroza!»

¹⁴ «E ne kötülük yaptı?» – sordu Pilat. Ama onnar çekettilär taa pek baarmaa: «Ger Onu stavroza!»

¹⁵ Pilat, bakarak beendirsin kendini insana, kolverdi Varavvayı, ama İisusu kamçılayıp, verdi, stavroza gersinnär.

Askerlär gülmää alêrlar İisusu

¹⁶ Askerlär götürdülär İisusu kullanıcının binasına, başka laflan, Pretoriuma, da orayı topladılar bütün polku.

¹⁷ Giidirdilär Onu ergivan rubaylan, ördülär tikenni çalıdan bir feneţ da koydular Onun başına.

¹⁸ Sora başladılar selämnemää Onu da demää: «Seläm Sana, İudeylerin Padişahı!»

¹⁹ Düüdülär sopaylan başına, tükürdülär da, diz çöküp, baş iildärdilär Ona.

²⁰ Gülmää aldıktan sora, soyundurdular ergivan rubayı, giidirdilär Kendi rubalarını da götürdülär Onu, stavroza gersinnär.

İisusu gererlär stavroza

²¹ Oradan geçän birisini, adı Kirineli Simon, Aleksandrunun hem Rufun bobası, angısı gelärdi kırdan, zorladılar, götürsün İisusun stavrozunu.

²² Götürdülär İisusu o erä, ani adı Golgofa, annaması «baş kemii eri».

²³ Verdilär, içsin şarap, karışık smirnaylan, ama O istämedi.

²⁴ Sora Onu stavroza gerdilär da payettilär rubalarını, atıp çetelä, ki bilsinnär, kimä ne düşecek.

²⁵ Açan gerdilär Onu, dokuzuncu saattı.

²⁶ Başı üstündä yazılıydı Onun kabaatı: «İudeylerin Padişahı».

²⁷ Onunnan barabar stavroza gerdilär iki haydut: birisini saa, öbürünü sol tarafına. /

²⁸ Butakım tamannandı Ayoz Yazı, ani deer: «Koydular Onu zakonsuzların sayısına»./

²⁹ Oradan geçennär kötülärdilär Onu da, başlarını sallayarak, deyärdilär: «Sän, ani yıkêrsın Ayoz binayı da üç gündä enidän yapêrsın,

³⁰ kurtar Kendini, in erä stavrozdan!»

³¹ Hep ölä büük popazlar hem bilgiçlär gülmää alardılar Onu, deyip biri-birinä: «O başkalarını kurtardı, ama Kendini kurtaramêêr!

³² Hristos, İzrailin Padişahı, insin erä stavrozdan, görelim da inanalım». İisuslan stavroza gerili olannar da kötülärdilär Onu.

İisus öler

³³ Bütün memlekettä altıncı saattan dokuzuncu saada kadar oldu karannık.

³⁴ Dokuzuncu saatta İisus büük seslän baardı: «Elohi! Elohi! Lema şevaktani?» Annaması: «Allahım! Allahım! Neçin Beni braktın?»

³⁵ Kimisi orada olannardan, işidip bu lafları, dedilär: «Tä, O İliyayı çaarêr».

³⁶ Birisi gitti kaçarak, bandırdı bir sünker iişi şaraba da, takıp bir sopaya, verdi içsin, deyip: «Durun, bakalım, gelecek mi İliya, indirsin Onu».

³⁷ İisus pek baardı da verdi duhunu.

³⁸ Ayoz binanın içindä perdä yırtıldı iki parçaya, yukardan aşaa kadar.

³⁹ Asker üzbaşı, angısı İisusun önündä durardı, açan gördü, ani bölä /baarıp/ duhunu verdi, dedi: «Hakına, bu Adam Allahın Ooluydu!»

⁴⁰ Onnardan başka orada vardı karılar, ani uzaktan-uzaa siiredärdilär: Mariya Magdalina, Mariya, küçük İakovun hem İosifin anası, hem Salome,

⁴¹ angıları gidärdilär İisusun ardına, açan Galileyadaydı, da izmet edärdilär Ona, hem çok başka karılar da, angıları geldiydilär Onunnan barabar İerusalimä.

İisusu gömerlär

⁴² O gün cumaa günüydü, açan lääzımdı hazırlansınnar cumertesi için. Artık avşam olurdu.

⁴³ Onuştan geldi İosif, Arimafeya kasabasından, Sinedrionun geçimni bir eki, angısı beklärdi Allahın Padişahlıını. O kıyışıp gitti Pilata da istedi İisusun güüdesini.

⁴⁴ Pilat şaştı, ani İisus bukadar tez öldü. O çaardı asker üzbaşını da sordu: «Çoktan mı öldü?»

⁴⁵ Açan annadı üzbaşından işin aslısını, izin etti, İosif alsın İisusun güüdesini.

⁴⁶ İosif satın aldı ketendän bir çarşaf, indirdi erä güüdeyi, sardı keten çarşaflan da koydu mezar içinä, ani oyuluydu kanarada, sora yuvarladı bir taş mezarın aazına.

⁴⁷ Mariya Magdalina hem Mariya, İosifin anası, gördülär, nereyi güüdä koyuldu.