Mark 13 - Enі Baalantı

Bitki vakıdın nışannarı

¹ İisus açan çıkardı Ayoz binadan, üürenicilerindän birisi dedi Ona: «Üüredici! Ya bak, ne gözäl taşlar hem ne gözäl yapılar!»

² İisus cuvap etti ona: «Görersin mi bu büük yapıları? Burada kalmayacek taş üstündä taş, hepsi yıkılacek».

³ Açan oturardı Zeytin bayırında, Ayoz binaya karşı, Petri, İakov, İoan hem Andrey, yalnızkan, Ona sordular:

⁴ «Sölä bizä, nezaman olacek bunnar, hem ne nışan gösterecek, ani bunnar hepsi tamannanacek?»

⁵ Ozaman İisus onnara annatmaa başladı da dedi: «Bakın, birkimsey aldatmasın sizi.

⁶ Zerä çoyu gelecek Benim adıma da deyecek: „Bänim Hristos“, da çoyunu aldadaceklar.

⁷ Açan işideceniz cenk uultusu hem cenklär için haber, korkmayasınız. Zerä bunnar lääzım olsun, ama bu taa diil bitkisi.

⁸ Zerä millet milletä karşı hem padişahlık padişahlaa karşı kalkacek. Kimi erlerdä olacek er tepremeleri, aaçlık /hem karışmalık/. Bunnar duuma sancıların başlantısı.

⁹ Ama siz esap alın kendinizä, zerä vereceklär sizi daavalara, düüyeceklär sinagogalarda, Benim beterimä çıkaraceklar kullanıcıların hem padişahların önünä, ki şaatlık edäsiniz onnara.

¹⁰ İlkin hepsi milletlerä lääzım nasaat edilsin İi Haber.

¹¹ Açan götüreceklär sizi, daavaya versinnär, kahırlanmayın, ne lafedeceniz. Söleyin, ne ozaman verilecek sizä, zerä lafetmeyeceniz siz, ama lafedecek Ayoz Duh.

¹² Kardaş kardaşını hem boba uşaanı ölümä verecek. Uşaklar kendi bobalarına hem analarına karşı kalkaceklar da onnarı öldüreceklär.

¹³ Benim adım için sizdän hepsi azetmeyecek, ama kim bitkiyädän dayanacek, o kurtulacek.

¹⁴ Açan göreceniz dikili, neredä düşmeer, iirenç işi, ani bozgunculuk yapêr, /angısı için lafetti prorok Daniil,/ – kim okuyêr, annasın – ozaman kim olacek İudeyada, kaçsın bayırlara.

¹⁵ Kim bulunacek ev üstündä, inmesin hem içeri girmesin bişey almaa.

¹⁶ Kim olacek kırda, dönmesin geeri üst rubasını almaa.

¹⁷ O günnerdä vay maamul hem uşak emzirän karılara!

¹⁸ Dua edin, sizin kaçmanız olmasın kışın.

¹⁹ Zerä o günnerdä ölä büük zeet olacek, ani o vakıttan, nezamandan Allah yarattı dünneyi, şindiyä kadar olmadı, ondan sora da olmayacek.

²⁰ Eer Saabi kısaltmaydı o vakıdı, kimsey kurtulamayaceydı. Ama seçilmişlerin hatırı için, angılarını seçti, Saabi o vakıdı kısalttı.

²¹ Ozaman eer birkimsey deyärseydi sizä: „Tä, Hristos burada!“ eki „Tä, Hristos orada!“, inanmayın.

²² Zerä peydalanacek yalancı hristoslar hem yalancı proroklar. Yapaceklar nışannar hem şaşmaklı işlär, aldatsınnar deyni, olarsaydı kolay, seçilmiş olannarı da.

²³ Siz korunun. Tä, Bän vakıtlan sizä hepsini haberledim.

Adam Oolunun gelmesi

²⁴ O günnerdä, o zeetlerdän sora gün kararacek, ay vermeyecek aydınnıını,

²⁵ yıldızlar göktän düşeceklär, hem gökün kuvetleri sarsalanacek.

²⁶ Ozaman göreceklär Adam Oolunu gelärkän bulutlar içindä büük kuvetlän hem metinniklän.

²⁷ Ozaman O yollayacek angillerini da toplayacek seçilmişlerini dört taraftan, erin kenarından gökün kenarınadan.

²⁸ İncir fidanından örnek alın. Açan dalları yımışêêrlar, hem yaprakları eşererlär, bilersiniz, ani yaz yakın.

²⁹ Hep ölä, siz dä açan göreceniz bunnarı olurkan, biliniz, ani bu iş yakın, artık kapuda.

³⁰ Dooru söleerim sizä, ani bu boy insan geçmeyecek, hepsi bunnar tamannanmayınca.

³¹ Gök hem er geçecek, ama Benim sözlerim geçmeyecek.

Gün hem saat bilinmeer

³² O günü hem o saadı kimsey bilmeer: ne angillär göktä, ne dä Ool, ama salt Boba.

³³ Bakın, kuşku olun, /dua edin,/ zerä bilmeersiniz, nezaman o vakıt gelecek.

³⁴ Bu – bir adam gibi, ani yola yollanêr, evini çıraklarına brakêr, herkezinä cuvapçılık hem iş verer, ama bekçiyä, kuşku beklesin, sımarlêêr.

³⁵ Onuştan kuşku olun, zerä bilmeersiniz, nezaman gelecek evin çorbacısı, beki avşamnen, beki gecä yarısı, beki horoz ötmesindä, beki sabaalän.

³⁶ Bakın, ansızdan gelip, sizi uyuyar bulmasın.

³⁷ Ne söleerim sizä, söleerim hepsinä: Kuşku olun».