Mark 12 - Enі Baalantı

Fena baacılar

¹ İisus başladı onnara sölemää örneklärlän: «Bir adam koydu bir baa, dolayladı aullan, kazdı er üzüm täskası için, yıvdı bir bekçi külesi, sora, baayı verip baacılara, gitti başka memleketä.

² Üzüm vakıdında yolladı bir çırak baacılara, alsın kendi payını baa berekedindän.

³ Ama baacılar tuttular onu, düüdülär da yolladılar geeri boş ellän.

⁴ Sora yolladı başka bir çırak, onun yaraladılar kafasını hem aşaaladılar.

⁵ Yolladı taa başkasını. Baacılar onu öldürdülär. Yolladı taa çoyunu, kimisini düüdülär, başkalarını öldürdülär.

⁶ Onun yanında kaldı sade bir oolu, angısını sevärdi. Bitkidä yolladı onu baacılara, deyip: „Beki oolumu kabledirlär ikramnan“.

⁷ Ama baacılar dedilär biri-birinä: „Tä çorbacının oolu, haydi öldürelim onu, da baa bizä kalacek“.

⁸ Tuttular onu, öldürdülär da attılar baadan dışarı.

⁹ Şindi ne yapacek baa çorbacısı? Gelecek da telef edecek bu baacıları, ama baayı verecek başkasına.

¹⁰ Ne, okumadınız mı bunu Ayoz Yazılarda: „Taş, ani ustalar sıbıttı, sonda etişti köşä taşı olsun.

¹¹ Bu – Saabidän, hem pek şaşmaklı iş bizim için!“»

¹² Onnar bakardılar tutsunnar İisusu, ama korkardılar insandan. Zerä annadılar, ani İisus onnar için söledi bu örnää. Sora braktılar Onu da gittilär.

Hak Allaha hem Kesara

¹³ Sora yolladılar İisusa kimisini fariseylerdän hem İrodun adamnarından, ki baksınnar Onu bir laflan tutmaa.

¹⁴ Gelip, onnar sordular İisusa: «Üüredici, biz bileriz, ani Sän dooru adamsın, kimseyä pay tutmêêrsın, zerä adamın üzünä bakmêêrsın, Allahın yolunu hakına üüredersin. Düşer mi ödemää harç Kesara osa düşmeer mi? Harç ödeyelim mi osa ödämeyelim mi?»

¹⁵ İisus tanıdı onnarın ikiüzlülüklerini da dedi onnara: «Neçin Beni deneersiniz? Getirin bir dinar, ki göreyim onu».

¹⁶ Onnar getirdilär. İisus sordu onnara: «Kimin resimi hem adı yazılı burada?» Onnar cuvap ettilär: «Kesarın».

¹⁷ Ozaman İisus dedi: «Verin Kesara ne Kesarın, ama Allaha ne Allahın». Bu cuvabına çok şaştılar.

Dirilmäk için soruş

¹⁸ Sora geldilär Ona sadukeylär, angıları deerlär, ani yok dirilmäk, da sordular:

¹⁹ «Üüredici, Moisey yazılarında dedi bizä: „Eer birkimsey, kimin yok uşaa, ölärseydi, da karısı saa kalarsaydı, onun kardaşı lääzım evlensin bu karıya da kaldırsın uşak ölmüş kardaşına tamızlık için“.

²⁰ Vardı edi kardaş. İlkinkisi evlendi, taa uşaa yokkan, öldü.

²¹ İkincisi evlendi ona, o da uşaksız öldü. Hep ölä üçüncüsü yaptı.

²² Edisi dä uşaksız öldülär. Hepsindän sora öldü karı da.

²³ Dirilmäk vakıdında, açan dirileceklär, angısının karısı o olacek? Zerä hepsi edi kardaş ona evliydi».

²⁴ İisus cuvap etti onnara: «Yanılêrsınız, zerä bilmeersiniz ne Ayoz Yazıları, ne dä Allahın kuvedini.

²⁵ Ölülär dirildiynän evlenmeyeceklär, ama olaceklar, nicä angillär göklerdä.

²⁶ Ölülerin dirilmesi için okumadınız mı Moiseyin kiyadında, neredä laf gider yanar gümä için, ne dedi Allah ona: „Bän Avraamın Allahı, İsaakın Allahı hem İakovun Allahıyım“.

²⁷ Allah – diil ölülerin Allahı, ama dirilerin. Ölä ki siz sarp yanılêrsınız».

En büük sımarlamak

²⁸ Bilgiçlerdän birisi, işidip onnarın dartışmaklarını da görüp, ani İisus islää cuvap etti, yaklaştı Ona da sordu: «Angı sımarlamak en büük?»

²⁹ İisus cuvap etti: «İlk sımarlamak var bu: „Seslä, İzrail, Saabi Allah – bizim bir Saabimiz!

³⁰ Seväsin Saabi Allahını bütün üräännän, bütün canınnan, bütün aklınnan hem bütün kuvedinnän“. Tä budur ilk sımarlamak!

³¹ İkincisi bu: „Seväsin yakın olanını, nicä kendini“. Bunnardan taa büük sımarlamak yok».

³² Bilgiç dedi Ona: «İslää, Üüredici, dooru söledin, ani var bir Allah, hem yok başka allah, Ondan kaarä.

³³ Onu sevmää bütün üreklän, bütün fikirlän, bütün canınnan, bütün kuvedinnän, hem yakın olanını sevmää, nicä kendini, bu – taa paalı, nekadar hepsi heptän yakılan hayvannar hem kurbannar».

³⁴ İisus, görüp, ani o aarifçesinä cuvap etti, ona dedi: «Diilsin sän uzak Allahın Padişahlıından». Bundan sora kimsey başka kıyışmadı sorsun Ona bişey.

Hristos – kimin oolu?

³⁵ Uzaldıp üüretmesini Ayoz bina içindä, İisus dedi: «Neçin bilgiçlär deerlär, ani Hristos – Davidin oolu?

³⁶ Kendi David, Ayoz Duhtan kullanılmış, deer: „Saabi dedi benim Çorbacıma: Otur saa tarafımda, Bän koyunca Senin duşmannarını ayaklarının altına“.

³⁷ Kendi David adlêêr Onu „Çorbacı“, ozaman nasıl O olabilir Davidin oolu?» Çok insan seslärdi İisusu mayıllıklan.

³⁸ Üürederäk onnarı, O dedi: «Korunun bilgiçlerdän, angılar severlär gezmää uzun rubaylan hem beenerlär, insan selämnesin onnarı meydannarda.

³⁹ Severlär oturmaa ilk skemnelerä sinagogalarda hem ön erlerä konak sofralarında.

⁴⁰ Onnar kemirerlär dulların evlerini, ama göstermäk için uzun dualar yapêrlar. Onnarın cezası çok aar olacek».

Dulun baaşışı

⁴¹ İisus, Ayoz bina haznası karşısında oturup, bakardı, nicä insan para haznaya koyardı. Çoyu zenginnerdän çok koyardılar.

⁴² Geldi bir dul karı da iki lepton koydu, ani yapêr bir kodrant.

⁴³ İisus topladı üürenicilerini da onnara dedi: «Dooru söleerim sizä, bu dul karı hepsindän taa çok koydu haznaya.

⁴⁴ Hepsi koydu kendi zeedeliklerindän, ama bu karı kendi yokluundan verdi hepsini, ne vardı yaşaması için».