Mark 1 - Enі Baalantı

İoan Vaatizedici

¹ İisus Hristozun, Allahın Oolunun, İi Haberi başlantısı.

² Nicä yazılı prorok İsayanın kiyadında: «Tä, Bän yollêêrım habercimi Senin önün sora, angısı hazırlayacek yol Sana».

³ «Baaranın sesi çol erdä işidiler: „Saabiyä yolu hazırlayın, yolcaazları uzladın“».

⁴ İoan geldi, çol erdä vaatiz ederäk hem nasaat ederäk, ani insan lääzım dönsün günahlarından Allaha hem vaatiz olsun, ki baaşlamak edensinnär.

⁵ Bütün İudeya erlerindän, İerusalim kasabasından gelärdilär da hepsi vaatiz olardılar ondan İordan deresindä, kendi günahlarını açıklayarak.

⁶ İoan giiyimniydi devä yapaasından rubaylan, kuşanıktı deridän kayışlan, iyärdi çekirgä hem kır arı balı.

⁷ İoan nasaat edärdi: «Benim ardıma geler O, Kim taa kaavi bendän. Bän diilim yakışıklı iilip çözmää Onun ayak kaplarının tasmalarını.

⁸ Bän sizi suylan vaatiz ettim, ama O sizi Ayoz Duhlan vaatiz edecek».

İisus vaatiz olêr, şeytandan denener

⁹ O vakıt Galileyadan, Nazaret kasabasından, geldi İisus, da İoan vaatiz etti Onu İordan deresindä.

¹⁰ Su içindän çıkarak, O hemen gördü, nicä gök açıldı, da Ayoz Duh, bir guguş gibi, Onun üstünä kondu.

¹¹ Göklerdän bir ses işidildi: «Sänsin Benim sevgili Oolum, Sendä Benim isleeliim».

¹² Bundan sora Duh İisusu çol erä çabuk götürdü.

¹³ Çolda O kırk gün bulundu, neredä şeytandan denenmiş oldu. Canavarlar arasında bulunurdu, da angillär Ona izmet edärdilär.

İisusun ilk üürenicileri

¹⁴ Açan İoanı kapadılar, İisus geldi Galileyaya, nasaat ederäk İi Haberi Allahın Padişahlıı için.

¹⁵ Da deyärdi: «Vakıt tamannandı, Allahın Padişahlıı yaklaştı. Günahlarınızdan Allaha dönün hem İi Haberi inanın».

¹⁶ Geçip Galileya gölün boyundan, İisus gördü Simonu hem Andreyi, onun kardaşını. Onnar su içinä süzmeleri atardılar, zerä balıkçıydılar.

¹⁷ İisus onnara dedi: «Gelin Benim ardıma, sizi insan tutan yapacam».

¹⁸ Onnar çabuk süzmelerini braktılar da Onun ardına yollandılar.

¹⁹ Gidip biraz ileri, İisus gördü Zevedeyin oolunu, İakovu, hem kardaşını İoanı, angıları kayık içindä süzmelerini tertiplärdilär.

²⁰ İisus hemen çaardı onnarı. Onnar bobalarını, Zevedeyi, kayıkta işçilärlän braktılar da kendileri İisusun ardına gittilär.

Sinagogada fena duhlu adam alıştırılêr

²¹ Kapernaum kasabasına geldilär. Tezdä, cumertesi günü, İisus sinagoga içinä girdi, üüretmää insanı başladı.

²² Onun üüretmesinä şaşardılar, zerä üüredärdi onnarı nicä bir adam, angısında var zaabitlik, diil nicä bilgiçlär.

²³ Taman o vakıt onnarın sinagogasının içindä bulunardı bir adam, angısı fena duhlan tutulmuş. O başladı baarmaa:

²⁴ «Ne isteersin bizdän, Nazaretli İisus? Geldin bizi kaybetmää mi? Bilerim, kimsin Sän, Sän Allahın Ayozuysun!»

²⁵ Ama İisus takazaladı onu da dedi: «Sus da çık bu adamdan!»

²⁶ Ozaman fena duh adamı sarsaladı da sora, bir keskin seslän baarıp, ondan çıktı.

²⁷ Hepsi şaş kaldılar da biri-birinä sorardılar: «Nedir bu? Nesoy eni üüretmäktir bu? O artık fena duhlara zaabitliklän sımarlêêr, da onnar Onu sesleer!»

²⁸ Galileyanın bütün dolayında İisus için hereri haber çabuk daaldı.

İisus Petrinin kaynanasını alıştırêr

²⁹ İisus İakovlan hem İoannan sinagogadan çıktı, Simonun hem Andreyin evinä gitti.

³⁰ Simonun kaynanası patta sıtmadan hasta yatardı. Bunun için İisusa çabuk haber verildi.

³¹ İisus, yaklaşıp, tuttu onu elindän da yardım etti, kalksın. Sıtma onu braktı, da karı izmet etmää onnara başladı.

³² Avşamnen, gün kauşmasında, hepsi hastaları hem fena duhtan tutulmuşları İisusa getirärdilär.

³³ Kapu önündä insan bütün kasabadan toplandı.

³⁴ Hertürlü hastalıklardan O çok insan alıştırardı. Çıkarardı çok fena duhları da brakmardı sölesinnär, zerä onnar bilirdilär, ani O Hristos.

³⁵ Ertesi günü çin-sabaalän İisus kalktı da, çıkıp evdän, bir sapa erä gitti, neredä dua edärdi.

³⁶ Simon hem kim onunnandı, gittilär İisusu aaramaa.

³⁷ Açan buldular, dedilär Ona: «Hepsi Seni aarêêr».

³⁸ O cuvap etti onnara: «Gidelim dolay küülerä /hem kasabalara/, ki orada da nasaat edeyim, zerä bunun için çıkıp-geldim».

³⁹ Gitti, nasaat etsin bütün Galileyanın sinagogalarında da fena duhları çıkarsın.

Lepralı hasta paklanêr

⁴⁰ İisusa geldi bir lepralı adam, diz çöktü Onun önündä da yalvardı: «Eer istärseydin, var nasıl beni paklayasın».

⁴¹ İisusun canı acıdı da, uzadıp elini, diidi ona da dedi: «İsteerim, paklan!»

⁴² Birdän lepra onu braktı, da bu adam paklandı.

⁴³ İisus tez yollandırdı onu da sıkıdan sımarladı:

⁴⁴ «Bak, sölämeyäsin kimseyä, ama git da gösteril popaza. Kendi paklanman için getir ne Moisey sıraladı, ki şaatlık olsun insana».

⁴⁵ Bu adam sa, çıkıp oradan, başladı sölemää hem haber vermää bunun için hererdä. Ölä, ani sora İisus hiç bir kasabaya açıkta girämärdi. O dışanda, sapa erlerdä durardı, da insan her taraftan Ona gelärdi.