Luka 6 - Enі Baalantı

Ne düşer cumertesi yapmaa

¹ Bir cumertesi günü razgeldi, ki İisus geçsin ekinnär içindän. Onun üürenicileri koparardılar başaklardan, falayıp ellerindä, iyärdilär.

² Fariseylerdän kimileri dedilär: «Neçin cumertesi günü yapêrsınız, ne düşmeer?»

³ İisus cuvap etti onnara: «Okumadınız mı, ne yaptı David hem kafadarları, açan acıktılar?

⁴ Girdi Allahın evinä, aldı ekmekleri, ani Allahın önünä koyulardı, idi hem verdi kafadarlarına, bakmayarak, ani, popazlardan kaarä, kimsey düşmärdi isin bu ekmeklerdän?»

⁵ Hem taa dedi onnara: «Adam Oolu – cumertesinin Saabisi».

Kuru ellän bir adam

⁶ Başka bir cumertesi oldu, İisus girdi bir sinagoga içinä da üüredärdi insanı. Orada bulundu bir adam, angısının saa eli kurumuştu.

⁷ Bilgiçlär hem fariseylär bakardılar İisusun ardına, görsünnär, alıştıracek mı cumertesi günü, ki olsun neylän kabaatlandırsınnar Onu.

⁸ Ama İisus bilärdi onnarın neetlerini, onuştan dedi o kuru ellän adama: «Kalk ayakça da çık karşıya». Bu adam kalktı ayakça.

⁹ İisus dedi onnara: «Sorêrım sizä, ne düşer cumertesi günü yapmaa: iilik mi osa kötülük mü, yaşamayı kurtarmaa mı osa telef etmää mi?» Onnar susardılar.

¹⁰ Baktı hepsinä da sora bu adama dedi: «Uzat elini!» Açan o uzattı, eli enidän saa oldu.

¹¹ Fariseylär kudururdular üfkedän. Onnar lafettilär biri-birinnän, ne yapsınnar İisuslan.

İisus ayırêr oniki apostol

¹² O günnerdä İisus pindi bir bayır üstünä, dua etmää deyni, da bütün geceyi geçirdi dua ederäk Allaha.

¹³ Açan aydınnandı, çaardı üürenicilerini, seçti onnardan oniki kişi, angılarını adladı apostol. Tä onnarın adları:

¹⁴ Simon, angısının adını İisus koydu Petri; Andrey, onun kardaşı; İakov; İoan; Filip; Varfolomey;

¹⁵ Matfey; Foma; İakov, Alfeyin oolu; Simon, adlanmış Zilot;

¹⁶ İuda, İakovun oolu hem İuda İskariot, angısı sattı İisusu.

Hastalar alıştırıldılar

¹⁷ Sora İisus gitti onnarlan barabar da durgundu bir düzlüktä, neredä vardı çok Onun üürenicilerindän hem çokluk insan, toplu bütün İudeyadan, İerusalimdän, Tir hem Sidon kasabaların dolayından, ani deniz boyunda bulunêrlar.

¹⁸ Onnar geldilär Onu seslesinnär, hastalıklarından alışsınnar hem fena duhlardan zeetli olannar kurtulsunnar.

¹⁹ Hepsi insan bakardı diisin Ona, zerä Ondan çıkardı bir büük kuvet da hepsini alıştırardı.

Mutluluklar

²⁰ Ozaman çevirdi İisus bakışını üürenicilerinä da dedi: «Mutlu duhtan fukaara olannara, zerä sizin Gök Padişahlıı!

²¹ Mutlu sizä, şindi aaç olannar, zerä siz doyunacenız! Mutlu sizä, ani şindi aalêêrsınız, zerä siz güleceniz!

²² Mutlu sizä, açan sizdän insan azetmeer, sinagogadan çıkarêr, fena lafeder hem kötüleer sizin adınızı Adam Oolunun beterinä!

²³ Sevinin o gündä hem şennenin, zerä büüktür sizin ödeeniz göktä. Hep butürlü yaptılar onnarın bobaları proroklarlan.

²⁴ Ama vay sizä, zengin olannar, zerä siz burada oldunuz sefalıkta!

²⁵ Vay sizä, ani toksunuz şindi, zerä siz acıkacenız. Vay sizä, ani büün gülersiniz, zerä siz aalayacenız hem sızlayacenız!

²⁶ Vay sizä, açan sizin için insan lafeder islää, zerä hep bölä yapardı onnarın bobaları yalancı proroklarlan!

Sevin duşmannarınızı

²⁷ Ama sizä, sesleyennerä, deerim: sevin duşmannarınızı, yapın iilik onnara, kim sizdän azetmeer.

²⁸ İisözleyin onnarı, kim sizi betvalêêr. Dua ediniz onnar için, kim sizi gücendirer.

²⁹ Urarsaydı birkimsey senin bir yanaana, çevir ona öbür yanaanı da. Zorlan alarsaydı birkimsey üst rubanı, brak, alsın gölmeeni dä.

³⁰ Kim isteer sendän, ver ona, hem kim zorlan alêr sendän, geeri istämä ondan.

³¹ Nesoy isteersiniz, insan sizinnän götürsün kendini, ölä götürünüz siz dä kendinizi insannan.

³² Eer sevärseydiniz salt onnarı, kim sizi sever, ne şükürlük sizä? Günahkerlär dä severlär onnarı sevenneri.

³³ Eer yaparsaydınız iilik onnara, kim sizä iilik yapêr, ne şükürlük sizä? Hep bölä günahkerlär dä yapêrlar.

³⁴ Eer verärseydiniz ödünç onnara, kimdän umutlanêrsınız geeri almaa, ne şükürlük sizä? Günahkerlär dä vererlär ödünç günahkerlerä, ki sora hep okadar geeri alsınnar.

³⁵ Ama siz duşmannarınızı sevin, iilik onnara yapın. Verin ödünç, düşünmeyeräk geeri bişey almaa. Ozaman büük ödek olacek sizä. Siz olacenız Pek üüsek Allahın oolları, zerä O iilik yapêr onnara da, kim şükür etmeer hem fenalık yapêr.

³⁶ Olun acıyan, nicä sizin Bobanız acıyan.

Maanalamayın başkasını

³⁷ Daava kesmeyin, Allah da sizä daava kesmeyecek. Maanalamayın, Allah da sizi maanalamayacek. Afedin, Allah da sizi afedecek.

³⁸ Verin, Allah da sizä verecek çalkanmış, basılmış hem tepelenmiş, cömertli hem koynunuza dökülü. Zerä, ne ölçüylän ölçeceniz, o ölçüylän Allahtan ölçülü olacenız».

³⁹ Söledi sora bir örnek: «Var mı nasıl bir köör yolu göstersin başka kööra? Acaba, düşmeyeceklär mi ikisi dä kuyu içinä?

⁴⁰ Üürenici diil taa büük üüredicisindän. Ama cümlä üürenmenin bitkisindä var nasıl etişsin üüredicisini.

⁴¹ Neçin görersin kıymıı senin kardaşın gözündä, ama kendi gözündä kazıı esap almêêrsın?

⁴² Nasıl sän deyäsin kardaşına: „Kardaş, brak, çıkarayım kıymıı senin gözündän“, açan kendi gözündä kazık durêr? İkiüzlü, ilkin çıkar kazıı kendi gözündän da sora açık görecän, nasıl çıkarmaa kıymıı kardaşının gözündän.

Fidannar hem meyvalar

⁴³ İi fidan yok nasıl yapsın yaban meyvası. Hep ölä yaban fidanı da yok nasıl yapsın ii meyva.

⁴⁴ Zerä herbir fidan tanınêr meyvasından. Kimsey toplamêêr incir tikenni gümedän eki üzüm salkımı çalıdan.

⁴⁵ İi adam çıkarêr ii işlär ii ürään haznasından. Kötü adam çıkarêr kötü işlär kötü ürään haznasından. Zerä adamın aazı lafeder ürään taşkınnıından.

İki türlü temel

⁴⁶ Neçin deersiniz: „Saabi, Saabi“, ama yapmêêrsınız, ne söleerim Bän?

⁴⁷ Annadacam sizä, kimä benzeer adam, angısı sesleer hem tamannêêr Benim sözümü.

⁴⁸ O benzeer bir adama, angısı yaptı bir ev. İlkin, kazıp derin, temelini erleştirdi taş üstünä. Açan üüştü selli sular ev üstünä, ev kımıldamadı, zerä kaavi yıvılmıştı.

⁴⁹ Ama kim işider da tamannamêêr, o benzeer adama, angısı yaptı evini er üstündä, temelsiz. Açan sellär üüştülär, osaat ev yıkıldı. Onun yıkılması titsi oldu».