Luka 3 - Enі Baalantı

İoan Vaatizedicinin nasaadı

¹ Padişah Tiveriy Kesarın onbeşinci çorbacılık yılında Pontiy Pilat kullanıcıydı İudeyada. İrod Galileyanın kullanıcısıydı. Filip, İrodun kardaşı, kullanıcıydı İtureya hem Trahonit erlerindä. Lisaniy kullanıcıydı Avilini erlerindä.

² Annan hem Kayafa baş popazdılar. O vakıt Allah lafetti İoana, Zahariyanın ooluna, angısı yaşardı çollukta.

³ İoan gitti İordan suyun dolay erlerinä, nasaat ederäk, ani insan lääzım dönsün günahlarından Allaha hem vaatiz olsun, ki baaşlanmak edensin.

⁴ Bu oldu, nicä yazılıydı prorok İsayanın kiyadında: «Baaranın sesi çol erdä işidiler: „Saabiyä yolu hazırlayın, yolcaazları uzladın.

⁵ Herbir oyuk doldurulsun, üüseklik alçaldılsın, iiri yollar uzladılsın hem çukurlu yollar düzledilsin.

⁶ Hepsi insan annasın Allahtan kurtulmayı“».

⁷ İoan danıştı insannara, angıları gelärdi, vaatiz olsunnar, onnara deyip: «Yılan yavruları, kim üüretti sizi, kaçasınız Allahın gelär üfkesindän?

⁸ Yapınız yakışıklı meyva, görünsün, ani döndünüz Allaha günahlarınızdan, da boşuna düşünmeyin, deyip: „Bizim bobamız – Avraam“, zerä söleerim sizä, ani Allah bu taşlardan var nasıl yapsın uşak Avraama.

⁹ Artık nacak fidanın kökündä saplı durêr. Herbir fidan, ani getirmeer ii meyva, kesilecek da ateşä atılacek».

¹⁰ İnsannar sorardılar: «E biz ne yapalım?»

¹¹ O cuvap etti: «Kimdä var iki ruba, paylaşsın onunnan, kimdä hiç yok, hep ölä yapsın o da, kimdä imeelik var».

¹² Geldi harççılar, vaatiz olsunnar deyni, da sordular: «Üüredici, biz ne yapalım?»

¹³ O cuvap etti: «İstämeyin taa zeedä harç ondan kaarä, ne sizä sımarlanmış».

¹⁴ Askerlerdän kimisi sordular: «E biz ne yapalım?» O cuvap etti: «Kimseydän bişey almayın korkutmaklan, kimseyi yalan laflarlan kabaatlandırmayın, şükür olun ödeenizä».

¹⁵ İnsan, çünkü beklärdi, gelsin Hristos, hepsi düşünärdi İoan için: «Acaba, O diil mi Hristos?»

¹⁶ İoan cuvap etti hepsinä: «Bän sizi suylan vaatiz ederim, ama benim ardıma geler O, Kim taa kaavi bendän. Bän diilim yakışıklı çözmää Onun ayak kaplarının tasmalarını. O sizi Ayoz Duhlan hem ateşlän vaatiz edecek.

¹⁷ Onun elindä kürek, O paklayacek tınazını. Boodayı toplayacek ambara, ama plävayı yakacek süünmäz ateştä».

İoan kapanda

¹⁸ Butürlü nasaat edärdi İoan İi Haberi hem verärdi çok başka nasaatlar da.

¹⁹ İoan takazaladı İrod beyi o beterä, ani o aldı kendinä kendi kardaşının Filipin karısını, İrodiadayı, hem hepsi başka kötü işleri için dä.

²⁰ Bunun için İrod kapadı İoanı zındana.

İisus vaatiz olêr

²¹ Hepsi insandan sora İisus da vaatiz oldu. O dua edärkän, açıldı gök,

²² Ayoz Duh indi, görünär guguş teni gibi, Onun üstünä. Göktän işidildi bir ses, ani dedi: «Sänsin Benim sevgili Oolum, Sendä Benim isleeliim».

İisusun senselesi

²³ Açan İisus çeketti insanı üüretmää, O bir otuz yaşındaydı. Nicä insan sayardı, O İosifin oolu, İlinin oolu,

²⁴ Matfatın oolu, Leviyin oolu, Melhiyin oolu, Yannayın oolu, İosifin oolu,

²⁵ Mattafiyanın oolu, Amosun oolu, Naumun oolu, Esliyin oolu, Naggeyin oolu,

²⁶ Maafın oolu, Mattafiyanın oolu, Semeyin oolu, İosihin oolu, İodanın oolu,

²⁷ İoananın oolu, Risanın oolu, Zorovavelin oolu, Salafiilin oolu, Niriyin oolu,

²⁸ Melhiyin oolu, Addiyin oolu, Kosamın oolu, Elmadamın oolu, İrin oolu,

²⁹ İisusun oolu, Eliezerin oolu, İorimin oolu, Matfatın oolu, Leviyin oolu,

³⁰ Simeonun oolu, İudanın oolu, İosifin oolu, İonamın oolu, Eliakimin oolu,

³¹ Meleanın oolu, Mennanın oolu, Mattafanın oolu, Nafanın oolu, Davidin oolu.

³² İesseyin oolu, Ovidin oolu, Voozun oolu, Salanın oolu, Naassonun oolu.

³³ Aminadavın oolu, Adminin oolu, Arniyin oolu, Esromun oolu, Faresin oolu, İudanın oolu,

³⁴ İakovun oolu, İsaakın oolu, Avraamın oolu, Faranın oolu, Nahorun oolu,

³⁵ Seruhun oolu, Ragavın oolu, Falekin oolu, Everin oolu, Salanın oolu,

³⁶ Kainanın oolu, Arfaksadın oolu, Simin oolu, Noyun oolu, Lamehın oolu,

³⁷ Mafusalanın oolu, Enohun oolu, İaretin oolu, Maleleilin oolu, Kainanın oolu,

³⁸ Enosun oolu, Sifin oolu, Adamın oolu, Allahın oolu.