Luka 24 - Enі Baalantı

İisus diriler

¹ Haftanın ilk günündä, çin sabaalän, bu karılar /hem başkaları da onnarlan barabar/ geldilär mezarı görmää. Getirdilär kokulu yaaları, ani hazırladıydılar.

² Buldular taşı, mezardan bir tarafa aktarılmış.

³ Girdilär içyanına, ama Saabi İisusun güüdesini bulmadılar.

⁴ Açan bilmärdilär, ne yapsınnar, birdän gösterildi onnara iki adam, giiyimni yalabık rubaylan.

⁵ Karılar korktular da erädän baş iilttilär, ama bu adamnar dedilär: «Neçin aarêêrsınız diriyi ölülerin arasında?

⁶ O yok burada, dirildi. Aklınıza getirin, ne sölediydi, açan taa Galileyadaydı.

⁷ O demişti: „Adam Oolu günahkerlerin elinä verilecek, stavroza gerilecek da üçüncü günü dirilecek“».

⁸ Bu karılar aklına getirdilär İisusun laflarını.

⁹ Dönüp mezardan, hepsini bunnarı onbir apostola hem kalan insana söledilär.

¹⁰ Kim bu haberi getirdi, bunnardı: Mariya Magdalina, İoana, Mariya, İakovun anası, hem kalanı, kim onnarlan barabardı.

¹¹ Onnarın lafları apostollara göründü bir masal gibi, onuştan inanmardılar.

¹² Ama Petri kalktı da kaçtı mezara. Etiştiynän, iildi da baktı içyanına, ama keten çarşaflardan kaarä bişey görmedi. Ondan sora döndü geeri, şaşarak buna, ne oldu.

İisus Emmaus yolunda

¹³ O günü iki üürenici gidärdi bir küüyä, ani adı Emmaus, İerusalimdän altmış stadi uzaklıı.

¹⁴ Onnar lafedärdi biri-birinnän hepsi için, ne oldu.

¹⁵ Onnar lafedärkän hem soruşarkan, İisus Kendi yaklaştı onnara, da barabar gittilär.

¹⁶ Onnarın gözleri kapalıydı, ki tanımasınnar Onu.

¹⁷ İisus sordu: «Siz, gidärkän, ne lafedersiniz?» Onnar bir kahırlı üzlän durdular.

¹⁸ Onnardan birisi, adı Kleopa, dedi Ona: «Acaba, sän yalnız mıysın İerusalimdä yabancılardan, kim bilmeer, ne oldu burada bu günnerdä?»

¹⁹ «Ne oldu?» – sordu İisus. Onnar cuvap ettilär: «Hepsi bunnar oldu İisuslan Nazarettän, Angısı bir büük proroktu lafında hem işindä, Allahın hem bütün insanın önündä.

²⁰ Ama bizim büük popazlar hem öndercilär daava kestilär ölümä da stavroza gerdilär Onu.

²¹ Ama biz umutlanardık, ani O kurtaracek İzraili. Da tä büün üçüncü gün, nicä bu oldu.

²² Bundan kaarä, birkaç karı aramızdan şaşmaya bizi koydular. Onnar, çin-sabaalän mezara gidip,

²³ Onun güüdesini bulmadılar. Sora, gelip bizä, söledilär, ani angilleri görmüşlär. Angillär onnara demiş, ani İisus dirildi.

²⁴ Kimisi bizdän gittilär mezara da gördülär, ani hepsi bunnar ölä, nicä karılar söledilär, ama Onu görmedilär».

²⁵ «Ne fikirsizsiniz siz! – cuvap etti İisus. – Ne zor inanêrsınız prorokların sölediklerini!

²⁶ Düşmeer mi, Hristos bölä zeetlensin, sora metinniinä etişsin?»

²⁷ Sora başladı Moiseydän hem hepsi proroklardan annatmaa, ne yazılı Onun için Ayoz Yazılarda.

²⁸ Yaklaşıp küüyä, nereyi gidärdilär, İisus yapıldı, ani isteer gitmää taa ileri.

²⁹ Ama onnar yalvardılar Ona da dedilär: «Kal bizimnän. Gün kauşêr, gecä olêr». O girdi, onnarlan kaldı.

³⁰ Sofraya oturduktan sora İisus aldı ekmää, iisözledi, kırdı da verdi üürenicilerä.

³¹ Ozaman açıldı gözleri, da tanıdılar Onu, ama O görünmäz oldu.

³² Onnar deyärdilär biri-birinä: «Acaba, yanmardı mı üreemiz, açan O bizä yolda sölärdi hem annadardı Ayoz Yazıları?»

³³ Onnar hiç oyalanmadılar, kalkıp, geeri İerusalimä döndülär. Orada buldular onbir apostolu hem başka üürenicileri, birerdä toplu,

³⁴ angıları sölärdilär biri-birinä: «Hakına, Saabi dirildi, gösterildi Simona».

³⁵ Ozaman bu iki üürenici söledilär, ne oldu onnarlan yolda, hem nasıl tanıdılar İisusu, ekmää kırarkan.

İisus gösteriler üürenicilerinä

³⁶ Bölä onnar lafedärkän, İisus Kendisi peydalandı aralarında da dedi: «Usluluk sizä!»

³⁷ Onnar korktular hem şaştılar, sanıp, ani görerlär bir duh.

³⁸ Ama O dedi: «Neçin kahırlanêrsınız hem neçin ikileersiniz üreenizdä?

³⁹ Bakın Benim ellerimä hem ayaklarıma. Bän Kendimim, diiyin da bakın, zerä duhun yok eti, ne dä kemii, nicä görersiniz Bendä».

⁴⁰ Açan dedi bu lafları, gösterdi onnara Kendi ellerini hem ayaklarını.

⁴¹ Onnar sevinmektän hem şaşmaktan inanamardılar kendi gözlerini. Ozaman İisus dedi: «Var mı sizdä burada bişey imää?»

⁴² Onnar verdilär Ona bir parça pişmiş balık /hem bir parça gömeç balı/.

⁴³ O aldı da idi onnarın önündä.

⁴⁴ Sora dedi: «Ne sölediydim sizä, açan taa bulunardım sizinnän, ani hepsi, ne var yazılı Moiseyin Zakonunda, prorokların kiyatlarında hem Psalmalarda Benim için, lääzım tamannansın».

⁴⁵ Ozaman açtı onnarın fikirlerini, annasınnar Ayoz Yazıları.

⁴⁶ İisus dedi: «Bölä yazılı, ani lääzım zeetlensin Hristos, ama üçüncü günü dirilsin ölüdän.

⁴⁷ Başlayıp İerusalim kasabasından, lääzım nasaat olsun Onun adınnan hepsi milletlerä, ki pişman olsunnar günahlarından hem baaşlamak kabletsinnär.

⁴⁸ Siz şaatsınız hepsi bu işlerä.

⁴⁹ Bän yollayacam sizä ne adanmış Benim Bobamdan. Siz kalın kasaba içindä, kuvet kabledincä yukardan».

İisus gökä kalkêr

⁵⁰ İisus çıkardı onnarı İerusalimdän Vifaniya küüyünä dooru. Kaldırdı ellerini da iisözledi onnarı.

⁵¹ Açan iisözlärdi onnarı, ayırıldı onnardan da kalktı gökä.

⁵² Onnar baş iilttilär Ona, sora döndülär İerusalimä büük sevinmäklän.

⁵³ Herzaman gidip Ayoz binaya, Allahı metinnärdilär. /Amin./