Luka 23 - Enі Baalantı

İisus kullanıcı Pilatın önündä

¹ Ondan sora hepsi kalktılar da İisusu Pilata götürdülär.

² Başladılar Onu kabaatlandırmaa bölä laflarlan: «Biz bulduk bu Adamı, bizim insanı kızıştırarkan kalkınmaa hem durgudarkan, harç ödämesinnär Kesara. O kendini sayêr Hristos – Padişah».

³ Pilat sordu: «Sänsin mi İudeylerin Padişahı?» «Ölä, nicä söleersin», – cuvap etti İisus.

⁴ Pilat dedi büük popazlara: «Bän bulmêêrım bir dä kabaat bu adamda».

⁵ Onnar çok çalıştılar, deyip: «O kaldırêr insanı, üüreder bütün İudeyada, başlayıp Galileyadan burayı kadar».

İisus İrodun önündä

⁶ Pilat, işidip bunu, sordu: «Bu adam Galileyadan mı?»

⁷ Açan annadı, ani İisus İrodun kullanmasından, Onu İroda yolladı, angısı o günnerdä İerusalimdeydi.

⁸ İrod, görüp İisusu, pek sevindi, zerä çoktan istärdi Onu görsün, çünkü Onun için işittiydi da umutlanardı görsün Onu yaparkan bir meraklı nışan.

⁹ Koydu Ona çok soruşlar, ama İisus hiç cuvap vermedi.

¹⁰ Büük popazlar hem bilgiçlär orada durardılar da büük üfkeylän amazlardılar Onu.

¹¹ İrod kendi askerlerinnän aşaalattı hem gülmää aldı İisusu, giidirdi Onu yalabık rubaylan, sora geeri yolladı Pilata.

¹² O gündän sora İrod hem Pilat dostlaştılar biri-birinnän, ama bu günä kadar duşmannık edärdilär.

İisus hem Varavva

¹³ Pilat topladı büük popazları, öndercileri hem insanı

¹⁴ da dedi onnara: «Getirdiniz bana bu Adamı, nicä birisini, angısı kızıştırêr insanı kalkınmaa. Ama aaraştırıp hepsini sizin önünüzdä, bulmadım bu Adamda bir dä kabaat, ne siz sölediniz.

¹⁵ İrod da bulmadı, onuştan Onu geeri bizä yolladı. Görersiniz, bu Adam bişey yapmadı, ki ölümä kabaatlı olsun.

¹⁶ Onuştan düüdürdüktän sora kolverecäm Onu». /

¹⁷ Her Paskellä yortusunda Pilat lääzımdı kolversin kapanmışlardan birisini./

¹⁸ Ama hepsi onnar baardılar bir seslän: «Ölümä Onu, kolver bizä Varavvayı!»

¹⁹ Varavvayı zındana kapadıydılar kalkınmak hem adam öldürmäk beterinä, ne o yapmıştı kasaba içindä.

²⁰ Pilat enidän danıştı onnara, umutlanarak, kolversin İisusu,

²¹ ama onnar baardılar: «Ger, ger Onu stavroza!»

²² Pilat üçüncü sıra sordu: «Ne kötülük O yaptı? Bän bulmadım bir dä kabaat Onda ölüm için. Ölä ki, düüdürdüktän sora kolverecäm Onu».

²³ Onnar büük seslän baardılar hem zorladılar, ki İisus gerilsin stavroza. Onnarın /hem büük popazların/ baarmakları ensedilär.

²⁴ Pilat kararladı onnarın istediklerini tamannasın.

²⁵ Kolverdi onu, kim kapana kapalıydı kalkınmak hem adam öldürmäk için, onu, kimi istedilär, ama İisusu braktı onnarın istediinä.

İisusu gererlär stavroza

²⁶ Açan götürärdilär Onu stavroza germää, yolda durguttular bir adamı, adı Kirineli Simon, angısı kırdan gelärdi. Koydular onun omuzlarına stavrozu, ki İisusun ardına götürsün.

²⁷ İisusun ardına gidärdi bir sürü insan hem karılar, angıları aalardılar hem güüslerinä düüyärdilär.

²⁸ İisus, dönüp onnara, dedi: «İerusalimin kızları, aalamayın Benim için, ama aalayın kendiniz için hem uşaklarınız için.

²⁹ Zerä yaklaşêr vakıt, açan insan deyecek: „Ne mutlu uşaksız karılara, angıları hiç duudurmadılar hem hiç emzirmedilär!“

³⁰ Ozaman deyeceklär bayır kanaralarına: „Düşün bizim üstümüzä!“ hem bayırlara: „Örtün bizi!“

³¹ Eer bu yapılarsaydı eşil fidannan, ne olacek ozaman, açan kuruyacek?»

³² İisuslan barabar götürürdülär iki haydut, angılarını lääzımdı öldürsünnär Onunnan barabar.

³³ Etişip erä, neresinä deniler «Baş Kemii», orada stavroza gerdilär Onu hem iki haydudu: birisini saa, öbürünü sol tarafına.

³⁴ İisus deyärdi: «Boba, afet onnarı, zerä bilmeerlär, ne yapêrlar!» Attılar çetelä, payedip rubalarını biri-birinin arasında.

³⁵ İnsan durardı orada da siiredärdi. Öndercilär gülmää alardılar İisusu hem deyärdilär: «O başkalarını kurtardı; eer O Hristossaydı, Allahın Seçilmişi, ko Kendini kurtarsın!»

³⁶ Askerlär gülmää aldılar Onu. Yaklaştılar da verdilär iişi şarap,

³⁷ deyip: «Eer Sänseydin İudeylerin Padişahı, kurtar Kendini!»

³⁸ Onun başı üstündä yazılıydı /latin, urum hem çıfıt dilindä/: «İudeylerin Padişahı».

³⁹ Stavrozda gerili haydutlardan birisi kötülärdi Onu, deyip: «Eer sän Hristossaydın, kurtar Kendini hem bizi dä!»

⁴⁰ Ama öbürü azarladı onu, deyeräk: «Korkmêêrsın mı Allahtan, açan kendin dä bulunêrsın hep bu ceza altında?

⁴¹ Bizim için dooru kabledelim yaraşır cezayı kabaatımız için, ama bu Adam yapmadı bir dä kötülük».

⁴² Sora danıştı İisusa: «Saabi, aklına getir beni, açan gelecän Senin padişahlıına».

⁴³ İisus cuvap etti: «Dooru söleerim sana, büün olacan Benimnän rayda».

İisus öler

⁴⁴ Altıncı saadın dolayındaydı. Oldu büük karannık bütün memlekettä, ani tuttu üç saat, dokuzuncu saada kadar.

⁴⁵ Gün karardı, Ayoz binanın içyankı perdesi yırtıldı ortadan.

⁴⁶ İisus büük seslän baardı: «Boba, Senin elinä vererim duhumu!» Deyip bu lafları, salverdi duhunu.

⁴⁷ Asker üzbaşı, görüp, ne oldu, metinnedi Allahı, deyip: «Hakına, ani bu Adam kabaatsızdı!»

⁴⁸ Açan hepsi insan, kim geldiydilär siiretmää, gördülär, ne oldu, daalıştılar, herkezi düüyeräk kendi güüsünü.

⁴⁹ Hepsi, kim İisusu tanıyardı, hem karılar, angıları Galileyadan geldiydilär, dururdular uzakta da bakardılar, ne olêr.

İisusu gömerlär

⁵⁰ Orada vardı Sinedrion azalarından bir ii hem dooru adam, adı İosif,

⁵¹ angısı pay almadıydı onnarın neetlerindä hem yaptıklarında. Bu adam iudeylerin Arimafeya kasabasındandı, Allahın Padişahlıını beklärdi.

⁵² Bu adam gitti Pilata, İisusun güüdesini istedi.

⁵³ İndirdi Onu stavrozdan, sardı bir keten çarşaflan da koydu bir eni, oyulmuş kanara içindä mezara, neredä taa gömülmediydi kimsey.

⁵⁴ Bir cumaa günüydü, yaklaşardı cumertesi.

⁵⁵ Karılar, angıları geldiydilär İisuslan Galileyadan, gittilär İosifin ardına, gördülär mezarı hem nasıl erleştirildi İisusun güüdesi mezar içinä.

⁵⁶ Sora döndülär geeri, hazırladılar kokuları hem paalı yaaları, da cumertesi günü dinnendilär Zakona görä.