Luka 21 - Enі Baalantı

Dul karının baaşışı

¹ İisus siiredärdi, nicä zengin adamnar baaşış koyêrlar Ayoz binanın haznasına.

² Gördü bir fukaara dul karıyı, angısı koydu iki lepta.

³ İisus dedi: «Dooru söleerim sizä, ani bu fukaara dul taa çok koydu hepsindän.

⁴ Hepsi koydu kendi bolluklarından, ama bu karı kendi yokluundan verdi hepsini, ne vardı onda yaşamak için».

Bitki vakıdın nışannarı

⁵ Açan kimisi lafedärdi Ayoz bina için, angısı gözäl donaktı käämil taşlarlan hem baaşışlarlan, İisus dedi:

⁶ «Gelecek vakıt, burada kalmayacek taş üstündä taş, hepsi yıkılacek».

⁷ Üürenicilär İisusa sordular: «Üüredici, nezaman bunnar olacek hem nesoy nışan gösterecek bunnarın yaklaşmasını?»

⁸ İisus cuvap etti: «Bakın, aldanmayasınız. Zerä çoyu gelecek Benim adıma da deyecek: „Bänim Hristos“ yada: „Vakıt geldi“. Siz gitmeyin onnarın ardına.

⁹ Açan işideceniz cenklär için hem kalkınmaklar için, korkmayın. Zerä ilkin hepsi bunnar lääzım olsun, ama bitkisi tez gelmeyecek».

¹⁰ Ondan sora İisus dedi: «Millet milletä, padişahlık padişahlaa karşı kalkacek.

¹¹ Kimi erlerdä büük er tepremeleri, aaçlık, salgınnar, başka titsi işlär hem büük nışannar göktä olacek.

¹² Hepsindän öncä sizi tutaceklar hem koolayaceklar. Vereceklär sinagogalara hem zındannara, çıkaraceklar sizi padişahların hem kullanıcıların önünä Benim adım için.

¹³ Bu işlär olacek, ki şaatlık edäsiniz Benim için.

¹⁴ Bunu ii aklınızda tutun: düşünmeyin, nasıl dooruluunuzu çıkarmaa.

¹⁵ Zerä sizä aariflik lafınıza verecäm, da duşmannarınız sizä karşı duramayacek hem bişey deyämeyecek.

¹⁶ Onnarın ellerinä sizi vereceklär kendi ananız, bobanız, kardaşlarınız, hısımnarınız hem dostlarınız. Kimisini sizdän öldüreceklär.

¹⁷ Benim adım için sizdän hepsi azetmeyecek,

¹⁸ ama bir dä saç başınızdan kaybelmeyecek.

¹⁹ Dayanmaklan siz kendinizi kurtaracenız.

²⁰ Açan göreceniz İerusalimi, dolaylanmış askerlärlän, biläsiniz, ani onun daalması yaklaştı.

²¹ Ozaman, kim olacek İudeyada, bayırlara kaçsın. Kim bulunacek İerusalim içindä, çıksın oradan. Kim olacek kırda, girmesin kasabaya.

²² Bunnar ceza günneri olacek, ki tamannansın hepsi, ne yazılı.

²³ O günnerdä vay maamul hem uşak emzirän karılara! Zerä er üstündä bir büük sıkıntılık olacek, Allahın üfkesi bu insan üstünä gelecek.

²⁴ Onnar kılıçtan ölecek, esirlää hertürlü milletlerä götürülecek. İerusalim yabancı milletlärlän çiinenmiş olacek, ozamana kadar, nezaman milletlerin vakıtları tamannanacek.

Adam Oolunun gelmesi

²⁵ Gündä, ayda hem yıldızlarda nışannar olacek. Er üstündä sıkıntılık milletlerin arasında olacek. Onnar bilmeyeceklär, ne yapsınnar denizin dalgaları uultusundan.

²⁶ İnsan bayılacek korkudan, belaları bekleyeräk, ne dünnä üstünä gelecek, zerä gökün kuvetleri sarsalanacek.

²⁷ Ozaman göreceklär Adam Oolunu bulut içindä gelärkän büük kuvetlän hem metinniklän.

²⁸ Açan bunnar başlayacek olmaa, ozaman doorulun hem kaldırın bakışınızı yukarı, zerä sizin kurtulmanız yaklaştı».

²⁹ Sora bir örnek söledi onnara: «Bakın incir fidanına hem kalan fidannara.

³⁰ Açan görersiniz onnarı eşerärkän, bilersiniz, ani yaz yakın.

³¹ Hep ölä, siz dä açan göreceniz bunnarı olurkan, bilin, ani Allahın Padişahlıı yaklaşêr.

³² Dooru söleerim sizä, ani bu boy insan geçmeyecek, hepsi bunnar tamannanmayınca.

³³ Er hem gök geçecek, ama Benim sözlerim hiç geçmeyecek.

Kuşku olun

³⁴ Kendi-kendinizä esap alın, ki birtürlü aarlaşmasın ürekleriniz hoburluktan, içkiciliktän hem yaşamak kahırlarından, da o gün gelmesin ap-ansızdan sizin üstünüzä.

³⁵ O gün arkan gibi gelecek bu erdä hepsi yaşayannarın üstünä.

³⁶ Herzaman olun açıkgöz hem dua edin, ki kurtulabiläsiniz hepsi bunnardan, ne olacek, da Adam Oolunun önünä çıkabiläsiniz».

³⁷ Gündüz İisus üüredärdi Ayoz bina içindä, ama avşamnen gecelemää gidärdi Zeytin bayırına.

³⁸ İnsan çin sabaalendän Ayoz binaya gelärdi, ki seslesin Onu.