Luka 20 - Enі Baalantı

İisusun zaabitlii

¹ Bir günü, nezaman İisus insanı Ayoz bina aulunda üüredärdi hem nasaat edärdi İi Haberi, Ona geldilär büük popazlar, bilgiçlär hem aksakallar.

² Da dedilär: «Sölä, ne zaabitliklän yapêrsın bunnarı, hem kim verdi Sana zaabitlii?»

³ İisus cuvap etti onnara: «Koyacam Bän dä sizä bir soruş, cuvap ediniz Bana.

⁴ İoanın vaatizlii göktän mi, osa insandan mı?»

⁵ Onnar biri-birinnän lafedärdi: «Eer deyärseydik: „Göktän“, O deyecek: „Öleysä, neçin onu inanmadınız?“

⁶ Ama deyärseydik: „İnsandan“, ozaman insan bizi öldürecek taşlan, zerä hepsi inanêr, ani İoan bir prorok».

⁷ Onuştan cuvap ettilär: «Bilmeeriz, neredän geler İoanın vaatizlii».

⁸ Ozaman İisus cuvap etti: «Bän dä sölämeyecäm sizä, ne zaabitliklän yapêrım bunnarı».

Fena baacılar

⁹ Sora söledi insana bu örnää: «Bir adam koydu bir baa, verdi onu baacılara, sora uzun bir vakıda gitti başka memleketä.

¹⁰ Üzüm vakıdında yolladı bir çırak baacılara, alsın payını baa berekedindän, ama baacılar düüdülär onu da boş ellän geeri yolladılar.

¹¹ Sora yolladı başka bir çıraanı. Onnar onu da düüdülär, gülmää aldılar da boş ellän geeri yolladılar.

¹² Yolladı üçüncü çıraanı. Onnar onu da yaraladılar hem baadan dışarı uurattılar.

¹³ Baayın çorbacısı düşündü: „Ne yapayım? Yollayacam benim sevgili oolumu. Beki onu ikramnan kabledirlär!“

¹⁴ Ama baacılar, görüp onu, annaştılar biri-birinnän, deyip: „Tä çorbacının oolu, öldürelim onu, da baa bizä kalacek“.

¹⁵ Çıkarıp onu baadan bir tarafa, öldürdülär. Şindi ne yapacek baa çorbacısı bu baacılarlan?

¹⁶ Gelip, telef edecek onnarı, ama baayı başka adamnara verecek». Bu lafları işidip, insan dedi: «Olmaz bu olsun!»

¹⁷ İisus, bakıp uz onnarın gözlerinä, dedi: «Ozaman nasıl annamaa bu sözleri, ani yazılı: „Taş, ani ustalar sıbıttı, sonda etişti köşä taşı olsun“?

¹⁸ Kim düşecek bu taş üstünä, ezilecek. Ama kimin üstünä taş düşecek, onu tuz-buz yapacek».

¹⁹ Büük popazlar hem bilgiçlär baktılar hemen Onu tutsunnar, ama insandan korkardılar. Zerä annadılar, ani onnar için İisus bu örnää söledi.

Hak Kesara hem Allaha

²⁰ Onuştan başladılar İisusu kollamaa. Yolladılar ardına gözçüleri, angıları yapındılar kabaatsız, bakarak tutsunnar Onu bir laflan, ki kullanıcının daavasına hem zaabitliinä versinnär.

²¹ Ona sordular: «Üüredici, bileriz, ani dooru lafedersin hem üüredersin, adamın üzünä bakmayarak, hakına Allahın yolunu üüredersin.

²² Düşer mi, ödeyelim harç Kesara osa düşmeer mi?»

²³ İisus annadı onnarın şalvirliklerini, da dedi: «/Neçin Beni deneersiniz?/

²⁴ Gösterin Bana bir dinar. Kimin resimi hem adı yazılı burada?» «Kesarın», – cuvap ettilär onnar.

²⁵ Ozaman İisus dedi: «Verin Kesara, ne Kesarın, ama Allaha, ne Allahın».

²⁶ Tutamadılar Onu laflan insanın önündä da, şaşıp Onun cuvabına, sustular.

Dirilmäk için soruş

²⁷ Kimisi sadukeylerdän, kim deer, ani yok dirilmäk, yaklaşıp İisusa, sordular:

²⁸ «Üüredici, Moisey yazılarında dedi bizä: „Eer birkimsey ölärseydi uşaksız, da karısı saa kalarsaydı, onun kardaşı evlensin bu karıya da kaldırsın uşak ölmüş kardaşına tamızlık için“.

²⁹ Vardı edi kardaş. İlkinkisi evlendi da uşaksız öldü.

³⁰ Onun karısına evlendi ikinci kardaşı, /o da öldü taa olmadıynan uşaa/.

³¹ Sora bu karıyı aldı üçüncü kardaşı. Ölä yaptı edi kardaş da uşaksız öldülär.

³² Hepsindän sora öldü karı da.

³³ Dirilmektä angısının karısı olacek bu karı? Zerä hepsi edi kardaş ona evliydi».

³⁴ İisus cuvap etti: «Bu yaşamanın oolları hem kızları evlenerlär.

³⁵ Ama kim etişecek, pay alsın gelär ömürdän hem ölülerin dirilmesindän, evlenmeyecek.

³⁶ Artık yok nasıl ölsünnär, çünkü angillerä benzeerlär. Onnar Allahın oolları, zerä ölümdän dirileceklär.

³⁷ Ama, ani ölülär dirilecek, bunu gösterdi kendi Moisey orada, neredä laf gider yanar gümä için. Orada Saabi için deer: „Avraamın Allahı, İsaakın Allahı hem İakovun Allahı“.

³⁸ Allah – ölülerin Allahı diil, ama dirilerin, zerä Allaha hepsi insan diridir».

³⁹ Bilgiçlerdän kimisi cuvap etti: «İi söledin, Üüredici!»

⁴⁰ Bundan sora kimsey kıyışamardı sorsun Ona bir dä laf.

Hristos – kimin oolu?

⁴¹ İisus sordu onnara: «Neçin deerlär, ani Hristos – Davidin Oolu?

⁴² Kendi David Psalma kiyadında deer: „Saabi dedi benim Çorbacıma: Otur saa tarafımda,

⁴³ Bän koyunca Senin duşmannarını ayakların altına“.

⁴⁴ David adlêêr Onu „Çorbacı“, ozaman nasıl O olabilir Davidin oolu?»

⁴⁵ Hepsi işittilär, nicä İisus üürenicilerinä dedi:

⁴⁶ «Korunun bilgiçlerdän, angılar severlär gezmää uzun rubaylan hem beenerlär insan selämnesin onnarı meydannarda. Severlär oturmaa ilk skemnelerä sinagogalarda hem öndeki erlerä konak sofralarında.

⁴⁷ Onnar kemirerlär dulların evlerini, ama göstermäk için uzun dualar yapêrlar. Onnarın cezası çok aar olacek».