Luka 2 - Enі Baalantı

İisusun duuması

¹ O vakıtta Kesar Avgusttan verildi sımarlamak, ki bütün Roma padişahlıında hepsi insan yazılsınnar.

² Bu yazılmak ilk sıra oldu kullanıcı Kviriniyin vakıdında, angısı kullanardı Siriyada.

³ Herkezi gitti yazılsın kendi duumak kasabasında.

⁴ İosif, padişah Davidin senselesindändi, yollandı Galileyadan, Nazaret kasabasından, gitmää İudeyaya, Vifleem kasabasına, Davidin duuma erinä.

⁵ Gitti, ki yazılsın Mariyaylan, yavklu olmuşunnan, angısı maamuldu.

⁶ Açan onnar etiştilär orayı, Mariyanın vakıdı geldi, ki duudursun.

⁷ O duudurdu ilk Oolunu, sardı plänalarlan da yattırdı ahır içinä, zerä konaklık evindä bulunmadı er onnara.

Vifleemdän güdücülär

⁸ Orada yakın güdücülär koyunnarlan kırda bulunardılar. Onnar gecä beklärdilär sürülerini.

⁹ Birdän gösterildi onnara bir angil Saabidän. Doz-dolaya Saabinin metinnii şafk etti. Onnar pek korktular.

¹⁰ Angil dedi: «Korkmayın, bän getirerim sizä bir ii haber, ani bir büük sevinmäk olacek hepsi insana.

¹¹ Büün sizä Davidin kasabasında duudu Kurtarıcı, Saabi Hristos.

¹² Tä nışan, angısından tanıyacenız: bulacenız bir Uşak sarılı plänalarlan, Angısı yatêr ahır içindä».

¹³ Birdän bu angilä eklendi çok başka angillär. Hepsi onnar metinnärdilär Allahı butürlü laflarlan:

¹⁴ «Metinnik Allaha üüsek göklerdä! Erdä usluluk Allahı beendirän insana!»

¹⁵ Açan angillär kalktılar gökä, güdücülär dedilär biri-birinä: «Gidelim Vifleem kasabasına da bakalım, ne oldu orada, ne haberledi bizä Saabi».

¹⁶ Onnar hızlı yollandılar Vifleemä, buldular Mariyayı İosiflän hem Uşaa ahır içindä.

¹⁷ Görüp bunu, güdücülär hepsini söledilär, ne angil onnara haberlediydi Uşak için.

¹⁸ Hepsi, kim işitti bu lafları güdücülerdän, pek şaştı.

¹⁹ Mariya esaba aldı hepsi bu lafları da herzaman düşünärdi onnar için.

²⁰ Güdücülär döndülär geeri, sevineräk hem metinneyeräk Allahı, zerä gördülär hem işittilär hepsini ölä, nicä haberlendiydi onnara.

İisusu getirdilär Ayoz bina içinä

²¹ Sekiz gündän sora, açan geldi vakıt Uşaa kesiklik yapılsın, Onun adını koydular İisus, nicä angil sölediydi, taa Mariya gebä kalmadıynan.

²² Açan tamannandı vakıt paklanmak için Moiseyin Zakonuna görä, İosif hem Mariya götürdülär Uşaa İerusalimä, çıksın Saabinin önünä deyni,

²³ nicä var yazılı Saabinin Zakonunda: «Herbir ilk duumuş çocuk Saabiyä adanmış olsun».

²⁴ Onnar lääzımdı getirsinnär kurban iki guguş yada iki guguş yavrusu, nicä var sımarlanmış Saabinin Zakonunda.

Simeon iisözleer İisusu

²⁵ İerusalimdä vardı bir adam, adı Simeon. O bir dooru hem kabaatsız adamdı, angısı beklärdi İzrailin kurtulmasını. Onda Ayoz Duh vardı.

²⁶ Ayoz Duhtan ona verildiydi haber, ani o ölmeyecek görmeyincä Saabinin Hristozunu.

²⁷ Simeon, kullanılmış Ayoz Duhtan, geldi Ayoz binaya. Da açan İosif hem Mariya getirdilär Uşaa, ki tamannasınnar Zakonun sımarladıını,

²⁸ Simeon aldı Onu kucak, iisözledi Allahı da dedi:

²⁹ «Saabi, şindi salver usluluklan Senin çıraanı, nicä Sän adadın,

³⁰ zerä gördü benim gözlerim Senin kurtulmanı,

³¹ angısını Sän hazırladın hepsi milletlerin gözleri önündä,

³² aydınnatsın milletlerä deyni hem ikram yapsın İzrail insanına».

³³ Onun bobası hem anası şaştılar bu laflara, ne Uşak için işittilär.

³⁴ Simeon iisözledi onnarı da dedi anasına, Mariyaya: «Bu Uşak sıralanmış çoyun düşmesi için hem çoyun kalkması için İzraildä. O – bir nışan Allahtan, ani debreştirecek karşılık insan içindä,

³⁵ çok insanın saklı neetleri açılsın deyni, senin ürään dä kılıçlan saplanmış olacek».

³⁶ Burada bulunardı bir karı, prorok Anna, Fanuelin kızı, Asirin tamızlıından. O pek ihtärdı. Kocasınnan yaşamıştı salt edi yıl.

³⁷ Kalmıştı dul da şindi seksän dört yaşındaydı. Anna hiç ayırılmardı Ayoz binadan, gecä-gündüz izmet edärdi Allaha oruçlan hem duaylan.

³⁸ Bu zaman Anna, gelip, başladı metinnemää Allahı hem sölemää İisus için hepsinä, kim beklärdi İerusalimin kurtulmasını.

İisus Nazaret kasabasında

³⁹ Ondan sora, açan tamannadılar hepsini, ne sıralanmıştı Saabinin Zakonundan, İosif hem Mariya döndülär Galileyaya, kendi kasabalarına, Nazaretä.

⁴⁰ Ama Uşak büüyärdi, kaavilenärdi hem aariflenärdi gün-gündän. Allahtan hayır Onun üstündeydi.

Uşak İisus gitti Ayoz binaya

⁴¹ İisusun bobası hem anası her yılın Paskellä yortusunda gidärdilär İerusalimä.

⁴² Açan İisus tamannadı oniki yaşını, gitti adetä görä onnarlan yortuya.

⁴³ Açan geçti yortu günneri, da onnar dönärdilär geeri evä, İisus kaldı İerusalimdä, ama bobası hem anası bunu bilmedilär.

⁴⁴ Sandılar, ani O kafadarlarınnan barabar yolda. Açan gittilär bir günnük yol, çekettilär aaramaa Onu hısımnarın hem kafadarların arasında,

⁴⁵ ama bulamadılar. İosif hem Mariya döndülär geeri İerusalimä, aarasınnar onu deyni.

⁴⁶ Üçüncü günü buldular Onu Ayoz bina içindä. O, üüredicilerin arasında oturup, seslärdi hem soruş koyardı.

⁴⁷ Hepsi, kim seslärdi Onu, şaşardı Onun aarifliinä hem cuvaplarına.

⁴⁸ Bobası hem anası, açan gördülär Onu, daptur geldilär. Ozaman anası dedi: «Oolum, neçin bunu yaptın bizä? Boban hem bän kahırlan aarêêrız Seni».

⁴⁹ O dedi: «Neçin Beni aaradınız? Ne, bilmeersiniz mi, ani Bän lääzım olayım Benim Bobamın evindä?»

⁵⁰ Ama onnar annamadılar Onun laflarını.

⁵¹ Sora O döndü onnarlan barabar geeri Nazaretä da sesledi onnarı. Anası hepsi bunnarı tuttu aklında.

⁵² İisus boylan büüyärdi, aariflenärdi da gittikçä Kendini beendirärdi Allaha hem insana.