Luka 18 - Enі Baalantı

Dul karı hem inansız daavacı

¹ İisus söledi üürenicilerinä bir örnek, ki göstersin, ani lääzım herzaman dua etmää da hiç brakılmamaa:

² «Bir kasabada vardı bir daavacı, angısı Allahtan korkmardı, insandan da utanmardı.

³ O kasabada vardı bir dul karı, angısı sık gelärdi ona da yalvarardı: „Yap dooruluk bana benim karşı duranımnan“.

⁴ O uzun vakıt istämedi dooruluk yapmaa, ama sonda kendi-kendinä dedi: „Allahtan korkmêêrım, insandan utanmêêrım.

⁵ Ama, çünkü bu dul karı beni raada brakmêêr, ona dooruluk yapacam, ki, dayma gelip, kafamı düümesin“».

⁶ Sora Saabi ekledi: «İşidersiniz mi, ne deer diil dooru daavacı?

⁷ Acaba Allah yapmayacek mı dooruluk seçilmişlerinä, kim Ona yalvarêr gecä-gündüz? Çok mu onnarı bekledecek?

⁸ Söleerim sizä, tezdä yapacek dooruluk onnara. Ama Adam Oolu gelmesindä, erdä inan bulacek mı?»

Harççı hem farisey

⁹ Söledi taa bir örnek onnara, kim kendinä umutlanêr hem kendini dooru sayêr, da başkasını aşaalandırêr.

¹⁰ «İki kişi gittilär Ayoz binaya dua etmää: birisi farisey, öbürü harççı.

¹¹ Farisey ayakça durardı da bölä dua edärdi kendi-kendinä: „Allahım, şükür ederim sana, ani diilim kalan insan gibi: hırsız, kelepirci, orospu, eki nicä bu harççı.

¹² Bän iki sıra haftada oruç tutêrım, vererim onuncu payını bütün gelirimdän“.

¹³ Ama harççı durardı uzakta, kıyışmardı baarlem gözlerini gökä kaldırsın. O düüyärdi güüsünä da deyärdi: „Acı Beni, günahkeri, Allahım!“

¹⁴ Dooru söleerim sizä, bu harççı Allahın gözündä taa dooru gitti evä, nekadar farisey. Zerä kim kendini üüseklendirer, o aşaalandırılacek, kim kendini aşaalandırêr, o üüseklendirilecek».

İisus iisözleer uşakları

¹⁵ Getirärdilär İisusa uşakları, ki diisin onnara, ama üürenicilär, görüp bunu, azarlardılar onnarı.

¹⁶ İisus çaardı uşakları Kendinä da dedi: «Brakın uşakları gelsinnär Bana da durgutmayın onnarı, zerä Allahın Padişahlıı onnarın gibileri için.

¹⁷ Dooru söleerim sizä: kim kabletmeyecek Allahın Padişahlıını bir uşak gibi, o orayı hiç girmeyecek».

Zenginnik hem diveç yaşamak

¹⁸ Bir önderci sordu İisusa: «İi Üüredici, ne lääzım yapayım, ki diveç yaşamak edeneyim?»

¹⁹ «Neçin deersin Bana ii? Kimsey diil ii yalnız Allahtan kaarä, – cuvap etti İisus. –

²⁰ Bilersin mi sımarlamakları? Orospuluk yapmayasın, öldürmeyäsin, çalmayasın, yalancı şaat olmayasın, bobanı hem ananı ikramnayasın».

²¹ «Hepsi bunnarı tamannadım taa gençliimdän», – cuvap etti bu adam.

²² İisus, işidip bu lafları, dedi: «Sana salt bir iş etişmeer: sat varlıını, payet fukaaralara, da olacek haznan göktä. Sora gel da izlä Beni».

²³ O, işidip bu lafları, pek gücendi, zerä büük varlıı vardı.

²⁴ İisus, görüp, ani pek gücendi, dedi: «Ne zor girsin Allahın Padişahlıına zengin olannar!

²⁵ Taa ilin bir devä iinenin kulaandan geçsin, nekadar bir zengin adam Allahın Padişahlıına girsin».

²⁶ Onnar, angıları seslärdilär, dedilär: «Kim acaba kurtulabilir?»

²⁷ İisus cuvap etti: «Ne insana olmaz, Allaha olur».

²⁸ Ozaman Petri dedi: «Bak, biz braktık hepsini da geldik Senin ardına».

²⁹ İisus ona dedi: «Doorusunu söleerim sizä, hepsi, kim braktı evini, karısını, kardaşlarını, anasını, bobasını eki uşaklarını Allahın Padişahlıı için,

³⁰ kabledecek çok taa zeedä bu ömürdä hem gelär ömürdä diveç yaşamak».

İisus üçüncü sıra haberleer ölümünü hem dirilmesini

³¹ İisus, alıp bir tarafa oniki üürenicisini, dedi onnara: «Tä, biz gideriz İerusalimä. Hepsi, ne yazılı proroklardan Adam Oolu için, tamannanacek.

³² Zerä Adam Oolu verilecek yabancıların ellerinä. Onu gülmää alaceklar, süüyeceklär hem tüküreceklär üzünä.

³³ Onu kamçıylan düüyeceklär da öldüreceklär, ama O üçüncü günü dirilecek».

³⁴ Onnar annamadılar bişey bu laflardan, zerä bu laflar onnar için kapalıydı. Onnar annayamadılar, ne O söledi.

Bir köör İerihon kasabasında

³⁵ Açan yaklaşardı İisus İerihon kasabasına, bir köör oturardı yol boyunda, dileneräk.

³⁶ İşidip, ani yoldan insan geçer, sordu: «Ne olêr?»

³⁷ Ona söledilär: «Nazaretli İisus geçer».

³⁸ Ozaman o baardı: «İisus, Davidin Oolu, acı beni!»

³⁹ Onnar, kim gidärdi öndä, azarlardılar onu, sussun, ama o taa pek baarardı: «Davidin Oolu, acı beni!»

⁴⁰ İisus durgundu, sımarladı getirsinnär köör adamı. Açan o yaklaştı, İisus sordu:

⁴¹ «Ne isteersin sana yapayım?» O cuvap etti: «Saabi! Görmäk edeneyim».

⁴² İisus dedi: «Gör, senin inanın seni kurtardı».

⁴³ Köör adam çabuk görmää başladı da gitti İisusun ardına, Allahı metederäk. Hepsi insan, göreräk, ne oldu, metinnedilär Allahı.