Luka 17 - Enі Baalantı

Günaha düşürmeyin başkasını

¹ İisus dedi üürenicilerinä: «Yok nicä günaha sokan denemeklär gelmesin, ama vay ona, kimdän geler!

² Taa ii olur, onun boynusuna bir dermen taşı assınnar da onu deniz içinä atsınnar, nekadar birisini bu en küçüklerdän günaha soksun.

³ Esap alın kendi-kendinizä! Eer senin kardaşın sana karşı günah yaparsaydı, git da azarla onu. Eer pişman olarsaydı, afet onu.

⁴ Eer o günaha girärseydi sana karşı edi sıra gündä da edi sıra gelärseydi, deyip: „Pişman olêrım“, afedäsin onu».

⁵ Ozaman apostollar dedilär Saabiyä: «Zeedelä bizim inanımızı!»

⁶ Saabi dedi: «Eer sizdä olursa inan bir hardal toomu gibi, da deyärseydiniz bu dut fidanına: „Buradan çık köklän da deniz içinä diiş!“ – o sesleyecek.

⁷ Kim sizdän, çıraa kırdan geldii zaman sürmektän yada koyunnarı otlatmaktan, deer ona: „Hızlı gel, otur sofraya!“

⁸ Demeer misiniz taa tez: „Hazırla imää, kuşan da izmet et bana, bän iyincä hem içincä, sora sän dä iyecän hem içecän“.

⁹ Şükür edersin mi sän çıraana, ani yaptı, ne sımarladın ona? /İnanmêêrım!/

¹⁰ Hep ölä siz dä, açan yapacenız hepsini, ne sımarlanmış, deyiniz: „Biz yaramaz çıraklar, yaptık, ne lääzımdı yapalım“».

On lepralı hasta saa oldular

¹¹ Gidärkän İerusalimä, İisus geçti Samariyadan hem Galileyadan.

¹² Girärkän bir küü içinä, Ona karşı çıktılar on lepralı adam. Onnar uzakta durdular.

¹³ Sora büük seslän baardılar: «İisus, Üüredici, acı bizi!»

¹⁴ Açan İisus gördü onnarı, dedi: «Gidin, gösterilin popazlara!» Onnar, yolda gidärkän, paklandılar.

¹⁵ Onnardan birisi, açan gördü saa olmuş kendini, büük seslän Allahı metinneyeräk, geeri döndü.

¹⁶ O düştü üzükoynu İisusun ayaklarına da şükür etti. O bir samariyalıydı.

¹⁷ İisus dedi: «Paklanmadı mı on kişi? Neredä dokuzu?

¹⁸ Bulunmadı mı kimsey, bu yabancıdan kaarä, geeri dönsün da Allahı metinnesin?»

¹⁹ Sora dedi bu adama: «Kalk da git, senin inanın seni kurtardı».

Allahın Padişahlıı içinizdä

²⁰ Fariseylär sordular İisusa: «Nezaman gelecek Allahın Padişahlıı?» İisus cuvap etti onnara: «Allahın Padişahlıı gelmeyecek ölä, ani gözä ursun.

²¹ Demeyeceklär sizä: „Tä orada!“ yada: „Tä burada!“. Zerä Allahın Padişahlıı sizdä».

İisusun ikinci gelmesi

²² Sora dedi üürenicilerinä: «Gelecek vakıt, açan pek isteyeceniz göräsiniz Adam Oolunun günnerindän birini, ama görämeyeceniz.

²³ Deyeceklär sizä: „Tä orada, tä burada!“ Yola çıkmayın, onnarın ardına gitmeyin.

²⁴ Zerä, nicä çimçirik çakêr da aydınnadêr gökü bir kenarından öbür kenarınadan, ölä olacek Adam Oolu da Kendi günündä.

²⁵ Ama bundan öncä lääzım çok zeet çeksin hem kabul olmasın bu boy insandan.

²⁶ Nicä oldu Noyun günnerindä, hep ölä olacek Adam Oolunun günnerindä dä.

²⁷ İyärdilär, içärdilär, evlenärdilär o günä kadar, nezaman Noy girdi gemi içinä. Geldi potop da kaybetti hepsini.

²⁸ Enidän olacek, nicä oldu Lotun günnerindä, nezaman insan iyärdi, içärdi, satın alardı, satardı, ekärdi hem ev yapardı.

²⁹ Ama o günü, açan çıktı Lot Sodomdan, göktän ateş hem kükürt yaadı da hepsini kaybetti.

³⁰ Hep ölä olacek o günü dä, nezaman Adam Oolu peydalanacek.

³¹ Kim o gündä bulunacek ev üstündä, inmesin almaa ev işlerini içyandan. Kim olacek kırda, dönmesin geeri evä.

³² Aklınıza getirin Lotun karısını.

³³ Kim çalışacek kurtarsın yaşamasını, kaybedecek onu, ama kim kaybedecek yaşamasını, yaşamak edenecek.

³⁴ Söleerim, o gecä iki kişi barabar bir patta olacek. Birisi alınacek, öbürü kalacek.

³⁵ İki karı barabar un üüdeceklär. Birisi alınacek, öbürü kalacek. /

³⁶ İki adam olacek kırda. Birisi alınacek, öbürü kalacek./»

³⁷ Üürenicilär sordular: «Neredä, Saabi?» O cuvap etti: «Neredä leş olacek, orayı leş kartalları toplanacek».