Luka 14 - Enі Baalantı

Ne düşer cumertesi yapmaa?

¹ Bir cumertesi günü İisus girdi farisey öndercilerin birisinin evinä ekmek imää. Fariseylär yakından Onu gözledärdilär.

² Ona karşı oturdu bir hasta adam, angısının güüdesi su toplamıştı.

³ Ozaman İisus sordu zakon üüredicilerinä hem fariseylerä: «Düşer mi cumertesi günü hastalıktan alıştırmaa osa düşmeer mi?»

⁴ Onnar sustular. Ozaman İisus tuttu bu hasta adamı da alıştırdı, sora, brakıp,

⁵ dedi: «Kim sizdän, düşürseydi eşää yada öküzü bir pınar içinä, da cumertesi günü hızlı çıkarmasın onu?»

⁶ Bu laflara bişey cuvap edämedilär.

Yavaş olun

⁷ Sora İisus esap aldı, nicä buyur edilmişlär sofrada bakardılar öndeki erleri, onuştan onnara bunu söledi:

⁸ «Eer seni buyur edärseydilär bir düünä, çalışma oturmaa öndeki erä, ki olmasın birkimsey taa üstün sendän buyurulmuşlar içindän,

⁹ da ikinizi buyur edän, sana yaklaşıp, demesin: „Eri ver bu adama“. Sän utanmaklan lääzım olacek oturasın en geeridä.

¹⁰ Açan seni buyur ederlär bir konuşa, git da otur en geeridä, da açan gelecek buyur edän, ki teklif etsin seni, deyip: „Ba dost, diiş taa önünä“, bu olacek sana ikram hepsi sofrada oturannarın önündä, angıları seninnän barabar.

¹¹ Herkezi, kim kendini üüseklendirer, o aşaalanmış olacek, hem kim kendini aşaaladêr, o üüseklenmiş olacek».

Kimi lääzım çaaralım sofraya

¹² Sora İisus danıştı buyur edenä da dedi: «Açan koyêrsın bir sofra, çaarma kendi dostlarını, kardaşlarını, hısımnarını, ne dä senin zengin komuşularını, olmasın deyni, ki sora onnar da kendi sıralarında çaarsınnar seni. Butürlü sän kabledersin ödek senin iiliinä.

¹³ Açan koyêrsın bir sofra, çaar o fukaara olannarı, sakatları, topalları hem köörları.

¹⁴ Da mutlu olacan, zerä onnar yok neylän çevirsinnär sana geeri. Bunun için sana ödek olacek dooru olannarın dirilmesindä».

Büük konuş

¹⁵ Birisi onnardan, angıları sofrada oturardılar Onunnan barabar, işidip bu lafları, dedi: «Ne mutlu onnara, kim oturacek sofrada Allahın Padişahlıında!»

¹⁶ İisus cuvap etti: «Bir adam hazırladı bir büük konuş da buyur etti çoyunu.

¹⁷ Açan yaklaştı konuş vakıdı, yolladı çıraanı, desin çaarılmışlara: „Buyurun gelin, hepsi hazır“.

¹⁸ Ama onnar hepsi, sansın laflanmışlar, afetmäk istemää başladılar. İlkinkisi dedi: „Satın aldım toprak da lääzım gideyim bakayım onu, yalvarêrım, afet“.

¹⁹ İkincisi dedi: „Satın aldım beş çift öküz, giderim, deneyim onnarı, yalvarêrım, afet“.

²⁰ Taa başkası dedi: „Şindi evlendim, onuştan yok nasıl geleyim“.

²¹ Çırak döndü geeri da söledi hepsini bunnarı çorbacısına. Ozaman evin çorbacısı pek gücendi da dedi kendi çıraana: „Çabuk çık kasabanın meydannarına hem sokaklarına da getir fukaaraları, sakatları, köörları hem topalları“.

²² Birazdana çırak deer çorbacıya: „Yaptım, nicä sımarladın, ama taa er var“.

²³ Ozaman çorbacı dedi çıraana: „Çık yollara hem aul boylarına da zorla hepsini, gelsinnär, ki benim evim dolsun.

²⁴ Zerä sizä deerim, ani teklif edilmişlerdän kimsey datmayacek benim soframdan, /zerä çok çaarılmış, ama az ayırılmış/“».

İisusun üürenicisi

²⁵ İisusun ardına gidärdi çok insan. O döndü onnara da dedi:

²⁶ «Eer birkimsey gelirseydi Bana, ama Bendän taa çok sevärseydi bobasını, anasını, karısını, uşaklarını, kardaşlarını, kızkardaşlarını yada kendi yaşamasını, yok nasıl olsun Benim üürenicim.

²⁷ Kim taşımêêr kendi stavrozunu da gelmeer Benim ardıma, o yok nasıl olsun Benim üürenicim.

²⁸ Kim sizdän, açan isteer yapsın bir külä, oturmêêr ilkin yapsın esap, nekadar lääzım harcasın, ki baksın, başa çıkarabilecek mi?

²⁹ Olmasın, ki temeli koyduktan sora bitirämesin, da hepsi bunu görennär gülmää başlasın,

³⁰ deyeräk: „Bu adam başladı, ama başa çıkaramadı“.

³¹ Yada angı padişah, cengä gidecää zaman, ilkin oturmêêr, annaşsın adamnarınnan, var mı nasıl on bin askerlän gitsin karşı başka padişaha, angısında var irmi bin asker?

³² Esabı çıkmarsaydı, yollêêr elçileri barışmak için, taa öbürü uzaktaykan.

³³ Hep ölä siz dä, kim atılmêêr hepsindän, neyi var, yok nasıl olsun Benim üürenicim.

³⁴ Tuz iidir, ama eer tuz dadını kaybedärseydi, nasıl onu enidän tuzlu yapabilirsin?

³⁵ O ne topraa yarar, ne dä fışkı gibi faydalanar. Kalêr salt dışarı atmaa. Kimin var kulaa işitmää deyni, ko işitsin!»