Luka 13 - Enі Baalantı

Pişman olun günahlarınızdan

¹ Kimisi onnardan söledilär İisusa, ne oldu birkaç Galileyadan adamnarlan, angılarını Pilat, öldürüp, kannarını karıştırmış onnarın kurbannarınnan.

² «Sanêrsınız, ani bu galileyalılar taa günahkerdilär kalanından mı, da butürlü razgeldi? – sordu İisus. –

³ Diil! Ama, Bän söleerim, eer siz dä pişman olmarsaydınız günahlarınızdan, hep ölä kaybeleceniz.

⁴ Osa o onsekiz kişi, kimin üstünä Siloam külesi düştü da öldürdü onnarı, sanêrsınız, ani taa günahkerdilär mi hepsi kalan insandan İerusalimdän?

⁵ Bän söleerim sizä: diil. Ama eer siz dä pişman olmarsaydınız günahlarınızdan, hep ölä kaybeleceniz».

Meyvasız fidan

⁶ İisus söledi bu örnää: «Bir adamın vardı bir incir fidanı, koyulu kendi baasında. Gelip, fidanda aaradı meyva, ama bulmadı.

⁷ Da dedi baacıya: „Üç yıl var, nicä bän gelip aarêêrım meyva bu fidanda, ama bulamêêrım. Kes onu, neçin boşuna eri emsin?“

⁸ „Saabi, beklä taa bir yıl, kazacam onu doz-dolay, koyacam kökünä fışkı, – cuvap etti baacı. –

⁹ Beki ondan sora getirir meyva, ama eer getirmärseydi, gelän yıla kesärsin onu“».

Cumertesi günü hasta karı alıştırıldı

¹⁰ İisus üüredärdi insanı bir cumertesi günü sinagogaların birindä.

¹¹ Orada bulunardı bir karı, angısında onsekiz yıl hastalık duhu vardı. O kamburlanmıştı da hiç uzlanamardı.

¹² Açan İisus gördü onu, çaardı da dedi: «Karı, kurtuldun derdindän».

¹³ Koydu ellerini onun üstünä. Karı çabuk dooruldu da başladı Allahı metinnemää.

¹⁴ Ama sinagoganın öndercisi üfkelendi, ani İisus cumertesi günü alıştırêr, onuştan dedi insana: «Var altı gün, nezaman lääzım işlenilsin. Gelin o günnerdä, alışmaa hastalıklardan, ama diil cumertesi!»

¹⁵ Saabi cuvap etti ona: «İkiüzlülär, herkeziniz cumertesi günü götürmeersiniz mi, çözüp ahırdan öküzü eki eşää, sulayasınız?

¹⁶ Bu karı, Avraamın kızı, angısını şeytan tuttu baalı onsekiz yıl, acaba düşmärdi mi onu cumertesi günü boşandırmaa bu derttän?»

¹⁷ Açan İisus butürlü lafetti, hepsi karşı durannar utanmış kaldılar. Herkezi sevinärdi hepsi metin işlerä, ani yapardı İisus.

Hardal toomu hem hamur mayası

¹⁸ Sora İisus dedi: «Neyä benzär olur Allahın Padişahlıı, neylän benzedeyim onu?

¹⁹ Benzeer bir hardal toomuna, ani adam, alıp, eker aulu içinä. Toom büüyer da aaç gibi olêr. Gök kuşları yuva yapêrlar onun dallarında».

²⁰ Sora enidän dedi: «Neyä benzedeyim Allahın Padişahlıını?

²¹ O benzeer bir parça hamur mayasına, ani alêr bir karı da karıştırêr üç ölçü unnan, bütün hamuru kabartsın».

Dar kapu

²² İisus gezärdi küüdän küüyä hem kasabadan kasabaya, üüredärdi insanı, gideräk İerusalimä.

²³ Birkimsey sordu Ona: «Saabi, sanki kurtulmuşlar azlık mı olaceklar?»

²⁴ O cuvap etti: «Çalışın girmää dar kapudan. Zerä sizä deerim: çoyu çalışacek, ama girämeyecek.

²⁵ Nezaman evin çorbacısı kalkıp kapuyu kapayacek, siz duracenız dışanda, uracenız kapuya da deyeceniz: „Saabi, aç bizä!“ Ama O cuvap edecek: „Tanımêêrım sizi, neredän geldiniz“.

²⁶ Ozaman başlayacenız Ona demää: „Biz idik hem içtik Seninnän barabar. Bizim sokaklarda Sän üürettin insanı“.

²⁷ Da O cuvap edecek: „Bilmeerim, neredänsiniz, uzaklaşın Bendän hepsiniz, ani zakonsuz yaşadınız“.

²⁸ Orada olacek aalamak hem diş gıcırdatması. Göreceniz Avraamı, İsaakı, İakovu hem hepsi prorokları Allahın Padişahlıında, ama kendiniz dışanda kalacenız.

²⁹ Geleceklär günduusundan hem günbatısından, poyrazdan hem üülendän, Allahın Padişahlıında sofraya oturaceklar.

³⁰ Kimisi, ani şindi bitki, orada ilk olacek, hem kimisi, ani şindi ilk, bitki olacek».

İisus aalêêr İerusalim için

³¹ O saat geldi birkaç farisey da dedilär İisusa: «Çık da git buradan, zerä İrod öldürmää isteer Seni».

³² «Gidin da söleyin o tilkiyä: „Tä, çıkarêrım fena duhları hem alıştırêrım hastaları büün hem yaarın, öbürgünä bitirerim“.

³³ Bana lääzım büün, yaarın hem öbürgünä yolda gideyim, zerä yok nicä prorok ölsün İerusalimdän dışarı.

³⁴ İerusalim, İerusalim, ani öldürersin prorokları hem taşlan düüyersin sana yollanılmışları! Kaç sıra istedim toplayım senin uşaklarını, nicä kloçka toplêêr piliçlerini kanatları altına, ama siz istämediniz!

³⁵ Tä, eviniz sizä boş brakılêr. Söleerim sizä, ani görmeyeceniz Beni gelmeyincä o vakıt, açan deyeceniz: „İisözlenmiş olsun, kim geler Saabinin adına!“»