Luka 12 - Enі Baalantı

Olmayın ikiüzlü

¹ Bu vakıt, açan çok binnän insan toplandı ölä, ani çiinärdilär biri-birini, İisus başladı üüretmää üürenicilerini, deyip: «Korunun fariseylerin mayasından, ani ikiüzlülüktür.

² Yok bişey örtülü, ani açılmasın hem yok bişey saklı, ani annaşılmasın.

³ Onuştan, ne sölediniz karannıkta, o işidilecek aydınnıkta. Ne fisirdediniz içerdä, o haberlenecek evlerin örtüleri üstündän.

⁴ Söleerim sizä, Benim dostlarım, korkmayın onnardan, kim güüdeyi öldürer, ama başka bişey yapamêêr.

⁵ Söleerim, kimdän korkasınız: korkun Allahtan, Angısı öldürdüktän sora, kuvedi var cendemä atsın. Sizä deerim: elbetki, Ondan korkun.

⁶ Satılmêêr mı beş saçak kuşu iki assariyä? Onnarın birisi bilä unudulmêêr Allahtan.

⁷ Sizin başınızda hepsi saçlarınız sayılı. Onuştan korkmayın. Siz taa paalıysınız çok saçak kuşlarından.

⁸ Söleerim sizä, ani kim şaatlık edecek Bana insanın önündä, onu Adam Oolu da şaatlık edecek Allahın angillerinin önündä.

⁹ Ama kim atılacek Bendän insanın önündä, ondan Bän dä atılacam Allahın angillerinin önündä.

¹⁰ Eer birkimsey lafedärsä Adam Ooluna karşı, afedilecek. Ama kim kötüleyecek Ayoz Duhu, afedilmeyecek.

¹¹ Açan götüreceklär sizi sinagogaların, zaabitlerin hem çorbacıların önünä, düşünmeyin, netürlü dooruluunuzu çıkarmaa eki ne cuvap etmää,

¹² zerä Ayoz Duh üüredecek sizi, ne lafedäsiniz ozaman».

Korunun para tamahlıından

¹³ Birisi insandan İisusa dedi: «Üüredici, sölä benim kardaşıma, payetsin bizä bobamızdan kalma varlıı».

¹⁴ «Be adam, – cuvap etti İisus, – kim koydu Beni daavacı olayım eki payedeyim varlıınızı?»

¹⁵ Sora dedi: «Bakın, korunun hertürlü para tamahlıından, zerä yaşamak tutunmêêr varlıın bolluundan».

¹⁶ Sora söledi bir örnek: «Bir zengin adamın merasında büük bereket oldu.

¹⁷ O kendi-kendinä düşünärdi hem deyärdi: „Näbayım? Yok nereyi berekedimi toplayım.

¹⁸ Tä ne yapacam: eski ambarlarımı bozacam da taa büük eni ambarlar yapacam. Orayı toplayacam hepsi ekinnerimi hem varlıımı.

¹⁹ Sora deyecäm canıma: canım, var çok iilik toplu çok yıllar için; dinnen, i, iç hem şennen!“

²⁰ Ama Allah dedi ona: „Sän fikirsizsin, bu gecä senin canın alınacek. Bunnar, ne hazırladın, kimä kalacek?“

²¹ Hep butürlü olêr onunnan da, kim toplêêr zenginnik kendisi için, ama zenginnämeer Allahta».

Kahırlanmayın

²² Sora İisus dedi üürenicilerinä: «Onuştan deerim sizä, kahırlanmayın yaşamak için, düşünmeyin, ne iyeceniz hem ne güüdenizä giiyeceniz.

²³ Yaşamak taa paalı, nekadar imäk, hem güüdä taa paalı, nekadar ruba.

²⁴ Bakın gargalara. Onnar ne eker, ne dä biçer. Onnarın yok ne ambarları, ne dä çitleri, ama Allah onnarı doyurêr. Siz çok taa paalıysınız kuşlardan!

²⁵ Hem kim sizdän, artık kahırlanıp, var nasıl eklesin baarlem bir endezä kendi boyuna?

²⁶ Eer yapamarsaydınız en küçük işi, ozaman neçin kahırlanêrsınız kalan işlär için?

²⁷ Esap alın, nesoy büüyer zambaklar. Onnar ne zaametlener, ne dä dokuyêr. Ama deerim sizä: artık Solomon bütün donaklıında giinämedi, nicä onnarın birisi.

²⁸ Çünkü Allah bölä giidirer otu, ani büün kırda, ama yaarın ateşä atılacek, nekadar taa çok giidirecek sizi, az inancılar?

²⁹ Aaramayın, ne imää hem ne içmää. Bunun için kasavetlenmeyin.

³⁰ Zerä hepsini bunnarı dünnä insannarı aarêêr. Bobanız biler, ani bunnar lääzım sizä.

³¹ Hepsindän öncä aarayın Allahın Padişahlıını, kalan işlär dä verilecek sizä.

³² Korkma, sän, küçük sürü. Sizin Gökteki Bobanız havezliklän verer Padişahlıı sizä.

³³ Satın ne var sizdä, da yapın iilik. Kendinizä eskimäz keselär hazırlayın – geçmäz zenginnik göklerdä, nereyi hırsız sokulmêêr hem güvä imeer.

³⁴ Zerä neredä sizin zenginniiniz, orada sizin üreeniz dä olacek.

Kuşku izmetkerlär

³⁵ Olun hazır, beliniz kuşaklı olsun, şafklarınız yansın.

³⁶ Olun, nicä adamnar, ani çorbacılarını bekleerlär, düündän dönsün, ki gelip, kapuya urduynan, çabuk açsınnar.

³⁷ Ne mutlu çıraklar, angılarını çorbacı gelmesindä açıkgöz bulacek! Dooru söleerim sizä, ani oturdacek sofraya da, kuşanıp, izmet edecek onnara.

³⁸ Eer gelmiş olarsaydı ikinci eki üçüncü gecä bekçiliindä, ne mutlu olacek izmetkerlerä, angılarını çorbacı açıkgöz bulacek!

³⁹ Bunu bilin, eer bileydi ev çorbacısı, ne saatta hırsız gelecek, kuşku duraceydı da evini soysun brakmayaceydı.

⁴⁰ Siz dä olun hazır, zerä Adam Oolu gelecek o saatta, açan hiç düşünmeersiniz».

Aarif hem inanç çırak

⁴¹ «Saabi, bizim için mi söleersin bu örnää osa hepsi için mi?» – sordu Petri.

⁴² Saabi cuvap etti: «Kimdir inanç hem aarif vekil, angısını çorbacısı koyacek cuvapçı kendi evindä hepsi çırakların üstünä, vakıdında imää versin onnara deyni?

⁴³ Mutlu çırak, angısını çorbacısı, gelmesindä, bulacek bölä yaparkan!

⁴⁴ Dooru söleerim sizä, ani koyacek onu cuvapçı bütün kendi varlıı üstünä.

⁴⁵ Ama çırak akılca deyärseydi: „Çorbacım oyalanêr gelmää“, da başlarsaydı düümää izmetkerleri hem izmetçiykaları, imää, içmää hem sarfoşluk etmää,

⁴⁶ onun çorbacısı gelecek bir gün, nezaman hiç beklämeer hem o saatta, nezaman hiç düşünmeer, çok düüyecek da onu inansız olannarlan bir erä koyacek.

⁴⁷ O çırak, angısı bilärdi çorbacının istediini, ama hazırlanmadı hem işi yapmadı, nicä çorbacı istärdi, bu çırak çok düülmüş olacek.

⁴⁸ Ama o, kim bilmeyeräk kabaat yaptı, az düülmüş olacek; zerä kimä çok verildi, çok istenecek dä, hem kimä çok inandırıldı, ondan taa çok cuvap istenecek.

Bölümnük sebepleri

⁴⁹ Geldim ateş getireyim er üstünä da pek isteerim, ki şindi tutuşsun!

⁵⁰ Bir vaatizlik var, angısından lääzım geçeyim. Bu tamannanınca, çok zeetlenerim.

⁵¹ Sanêrsınız, geldim, usluluk mu getireyim erä? Söleerim sizä: diil usluluk, ama bölünmäk.

⁵² Zerä büündän ötää beş kişidän, ani yaşayaceklar bir ev içindä, üçü kalkacek karşı ikisinä, ikisi dä üçünä.

⁵³ Boba kalkacek ooluna karşı, ool da bobasına, ana – kızına karşı, kız da anasına, kaynana – gelinä karşı kalkacek, gelin dä kaynanasına».

Vakıdın nışannarı

⁵⁴ İisus bunu da dedi insana: «Açan görersiniz, günbatısından kalkêr bulut, siz hemen deersiniz: „Yaamur yaayacek“, ölä dä olêr.

⁵⁵ Açan lüzgär eser üülendän, deersiniz: „Sıcak olacek“, ölä dä olêr.

⁵⁶ İkiüzlülär, erin hem gökün üzünü annamaa bilersiniz. Nasıl bu vakıtları tanımêêrsınız?

⁵⁷ Nesoy siz kendi-kendinizdän tanımêêrsınız, ne dooru?

⁵⁸ Nezaman daavacının önünä gidersin senin karşı duranınnan, bak taa yolda annaş onunnan, ki sürümesin seni daavacının önünä, daavacı da vermesin seni zındancıya, angısı kapayacek seni zındana.

⁵⁹ Söleerim sana, ani çıkmayacan oradan, ödämeyincä bitki leptonu».