Luka 11 - Enі Baalantı

Bizim Boba

¹ Bir gün İisus dua edärdi bir erdä. Açan bitirdi duasını, birisi üürenicilerdän dedi: «Saabi, üüret bizi dä dua edelim, nicä İoan üüretti kendi üürenicilerini, dua etsinnär».

² İisus dedi: «Açan dua edersiniz, deyin: „/Ey göklerdä olan/ Boba, Ko ayozlansın Senin adın. Ko gelsin Senin Padişahlıın. /Ko olsun Senin istediin, nicä göktä, ölä erdä dä./

³ Hergünkü ekmeemizi her gün bizä ver.

⁴ Baaşla bizim günahlarımızı, Zerä biz dä baaşlêêrız hepsini, kim bizä borçlu. Götürmä bizi denemeyä, /Ama kurtar kötü olandan/“».

Çalışmak duada

⁵ Sora dedi: «Eer sizin birinizin varsa dostu, da o gecä yarısı gidärsä ona da deyärsä: „Dostum, ver bana ödünç üç ekmek,

⁶ zerä geldi yoldan benim bir dostum, da yok ne onun önünä koyayım“;

⁷ içyandan onun dostu cuvap edärsä: „Savaştırma beni, zerä kapu kitli, uşaklarım benimnän pat üstündä, yok nasıl kalkayım da ekmek vereyim sana“.

⁸ Söleerim sizä, eer kalkmarsaydı versin dostuna gibi, hep okadar bunun kalın üzlülüü beterinä kalkacek da hepsini, ne lääzım, verecek.

⁹ Onun için deerim sizä: isteyin – da verilecek; aarayın – da bulacenız; urun – da açılacek.

¹⁰ Zerä kim isteer – edener, kim aarêêr – bulêr, hem kim urêr – ona açılêr.

¹¹ Var mı sizin aranızdan boba, angısının oolu ekmek istärkän, versin ona taş? Osa balık istärkän, versin yılan balık erinä?

¹² Osa yımırta istärkän, versin skorpion?

¹³ Eer siz, ani fenaysınız, bilärseniz uşaklarınıza ii baaşışlar vermää, nekadar taa çok sizin Gökteki Bobanız verecek Ayoz Duhu onnara, kim Ondan isteyecek».

İisus hem Veelzevul (şeytan)

¹⁴ İisus bir hastadan, angısı lafedämärdi, çıkarardı fena duhu. Açan yaptı bunu, o hasta olan başladı lafetmää, da insan şaştı.

¹⁵ Kimisi deyärdi: «Fena duhları çıkarêr Veelzevulun – fena duhların öndercisinin – kuvedinnän».

¹⁶ Başkaları, ki denesinnär İisusu, istärdilär bir nışan göktän göstersin.

¹⁷ İisus annadı onnarın neetlerini, onuştan dedi: «Herbir padişahlık, ani bölüner da karşı gider kendi-kendinä, daalêr. Hep ölä herbir ev, neredä bölünmäk olêr, daalêr.

¹⁸ Eer şeytan bölündüseydi kendi-kendinä, nesoy var nasıl dursun onun padişahlıı? Siz deersiniz, ani Bän uuradarmışım fena duhları Veelzevulun kuvedinnän.

¹⁹ Eer Bän çıkararsaydım fena duhları Veelzevulun kuvedinnän, ozaman sizin adamnar kimin kuvedinnän çıkarêrlar? Bunda onnar sizä daava keseceklär.

²⁰ Eer Bän çıkararsaydım fena duhları Allahın kuvedinnän, ozaman Allahın Padişahlıı sizädän etişti.

²¹ Açan bir adam, kaavi hem islää silählı, koruyêr kendi evini, onun varlıı korkusuzlukta.

²² Ama açan geler onun üstünä birkimsey, taa kaavi ondan, da enseer onu, ozaman alêr kuvetlän onun silählarını, angılarına o umutlanardı, da payeder, ne ondan aldı.

²³ Kim diil Benimnän, o karşı Bana. Kim toplamêêr Benimnän, o daadêr.

Fena duh döner geeri

²⁴ Açan fena duh çıkêr adamdan, o gezer susuz erlerdä, raatlık aarêêr, da çünkü bulamêêr, deer: „Döneyim evimä, neredän çıktım“.

²⁵ Geldii zaman, bulêr onu süpürülmüş hem donak.

²⁶ Sora gidip, alêr kendisinnän başka edi duh, taa fena, nekadar kendisi. Girerlär içyanına da orada erleşerlär. Butakım, adamın son halı olêr taa kötü, nekadar baştakı».

Hakına mutluluk

²⁷ Açan İisus sölärdi bu lafları, bir karı insandan büük seslän baardı: «Ne mutlu Senin anan, kim taşıdı hem emzirdi Seni!»

²⁸ İisus cuvap etti: «Taa ne mutlu onnara, angıları sesleerlär hem tamannêêrlar Allahın sözünü!»

İonanın nışanı

²⁹ Açan çok insan toplandı, İisus lafetmää başladı: «Bu senselä – kötü bir senselä, isteer bir nışan, ama ona verilmeyecek başka nışan, prorok İonanın nışanından kaarä.

³⁰ Zerä, nicä İona oldu bir nışan Nineviya kasabasının insanı için, hep ölä Adam Oolu da olacek nışan bu senselä için.

³¹ Üülendän padişahka kalkacek daava günündä bu senselenin adamnarınnan da kabaatlandıracek onnarı, zerä o geldi dünneyin kenarından, ki işitsin Solomonun aarifliini, ama büün burada durêr Birisi, Angısı taa büük Solomondan.

³² Nineviya kasabasından insannar daava günündä kalkaceklar bu senselenin adamnarınnan da kabaatlandıraceklar onnarı, zerä onnar, İonanın nasaadını işidip, kendi günahlarından Allaha döndülär, ama büün burada durêr Birisi, Angısı taa büük İonadan.

Güüdenin aydınnıı

³³ Kimsey tutuşturmêêr şafkı, ki koysun onu bir saklı erä eki küp altına, ama koyêr onu kandillik üstünä, ki kim girer, görsünnär aydınnıı.

³⁴ Göz – güüdenin aydınnıı. Eer senin gözün saa olarsaydı, bütün güüdän aydınnıkta olacek. Ama senin gözün kötüseydi, bütün güüdän karannıkta kalacek.

³⁵ Onun için bak aydınnık, ani sendä, karannık olmasın.

³⁶ Eer bütün senin güüdän aydınnıksa, da hiç bir tarafı karannıklı diilsä, bu taman bir aydınnık olacek, ölä nicä bir şafk yalabıklıınnan seni aydınnadêr».

Bilgiçleri hem fariseyleri takazalamak

³⁷ Açan İisus bunnarı sölärdi, bir farisey Onu buyur etti kendisinä konaa. İisus geldi da sofraya oturdu.

³⁸ Açan farisey gördü, ani İisus imektän öncä ellerini yıkamadı, şaştı.

³⁹ Ama Saabi dedi: «Siz, fariseylär, yıkêêrsınız çölmään hem çanaan dışansını, ama içyansı hırsızlıklan hem fenalıklan dolu.

⁴⁰ Fikirsizlär! Kim yarattı dışansını, yaratmadı mı içyansını da?

⁴¹ Yapın iilik, ne var sizdä, ozaman sizin için hepsi temiz olacek.

⁴² Vay sizä, fariseylär, zerä siz verersiniz onuncu payını naanedän, sedef otundan hem başka eşilliklerdän, ama unudêrsınız dooruluu hem Allahın sevgiliini. Bunnarı lääzım yapasınız, kalanını da brakmayasınız!

⁴³ Vay sizä, fariseylär! Zerä siz sinagogalarda seversiniz oturmaa ilk skemnelerä, beenersiniz, insan seläm versin sizä meydannarda.

⁴⁴ Vay sizä, /bilgiçlär hem ikiüzlü fariseylär/! Siz nışansız mezarlar gibi, ani görünmeerlär, da insan bilmeyeräk, çiineer onnarı».

⁴⁵ Zakon üüredicilerindän birisi dedi: «Üüredici, sölärkän bunnarı, bizi dä gücendirersin».

⁴⁶ İisus cuvap etti: «Vay sizä, zakon üüredicileri! Zerä siz aar üklär insan taşısın koyêrsınız, ama kendiniz o üklerä baarlem parmaanızlan diimeersiniz.

⁴⁷ Vay sizä, ani proroklara mezar kurêrsınız, kimi öldürdü sizin bobalarınız.

⁴⁸ Butakım, gösterersiniz, ani bobalarınızın işlerinnän kayılsınız, çünkü onnar prorokları öldürdülär, siz dä mezar düzersiniz.

⁴⁹ Onuştan Allahın Aariflii deer: „Yollayacam onnara Benim proroklarımı hem apostollarımı: kimisini öldüreceklär, kimisini koolayaceklar!“.

⁵⁰ Onun için bu senseledän esap sorulacek prorokların kannarı için, ani döküldü taa dünneyin kurulmasından,

⁵¹ Avelin kanından Zahariyanın kanınadan, angısı öldürüldü Ayoz binanın hem kurbannıın arasında. Aslı söleerim sizä: esap sorulacek bu boy insandan!

⁵² Vay sizä, zakon üüredicileri, zerä siz aldınız elinizä bilgi kapusunun anatarını, ama ne kendiniz girersiniz, ne dä, kim isteer girsin, brakêrsınız!»

⁵³ Açan İisus çıktı oradan, bilgiçlär hem fariseylär, dakılıp, çok sormaklar koydular, ki sölesin çok işlär için.

⁵⁴ Çalıştılar, kıstırsınnar Onu bir yannış laflan, ki sora kabaatlandırsınnar.