Luka 10 - Enі Baalantı

İisus yollêêr etmiş üürenicisini nasaat etmää

¹ Bundan sora Saabi seçti taa etmiş üürenici. Yolladı onnarı ikişär-ikişär Kendi önü sora hepsi kasabalara hem erlerä, nereyi O gitmää istärdi.

² Dedi onnara: «Bereket büük, ama işçi az! Onuştan dua edin berekedin çorbacısına, çıkarsın işçi ekinnerini toplamaa.

³ Gidin! Yollêêrım sizi, nicä kuzuları yabanılar içinä.

⁴ Almayın kendinizlän ne kesä, ne hiybä, ne dä ayak kabı. Kimseylän yolda selämnäşmeyin.

⁵ Herbir evdä, nereyi gireceniz, deyäsiniz: „Usluluk olsun bu evdä!“

⁶ Eer varsa orada usluluk oolu, sizin seläminiz kalacek onunnan, başka türlü dönecek sizä geeri.

⁷ O evdä kalın, iyin hem için, ne vereceklär. Zerä işçi kendi işi için baaşış kabletsin düşer. Evdän evä gezmeyin.

⁸ Herbir kasabaya, nereyi gireceniz hem neredä kabledileceniz, iyin ne koyaceklar önünüzä.

⁹ Orada alıştırın hastaları, deyip: „Allahın Padişahlıı yaklaştı sizä“.

¹⁰ Ama herbir kasabada, nereyi gideceniz, da kabletmeyeceklär sizi, orada sokaa çıkın da bölä deyin:

¹¹ „Kasabanızdan ayaklarımıza konan tozu azar gibi silkeriz sizä karşı, ama hep okadar bilin, Allahın Padişahlıı yaklaştı sizä“.

¹² Söleerim sizä, ani daava günündä Sodom kasabasına taa ilin olacek, nekadar o kasabaya.

Vay inansız kasabalara!

¹³ Vay sana, Horazin! Vay sana, Vifsaida! Zerä, eer bu kudretli işlär, ne sizdä yapıldı, Tir hem Sidon kasabalarında yapılaydı, çoktan çuvallan giiyimni hem kül üstünä oturup, günahlarından Allaha döneceydilär.

¹⁴ Ama daava günündä taa ilin olacek Tir hem Sidon kasabalarına, nekadar sizä.

¹⁵ Sän, Kapernaum, gökä kadar mı üüseklenecän? Diil, sän ölülär erinä düşecän.

¹⁶ Kim sesleyecek sizi, Beni sesleyecek. Kim sizdän atılacek, Bendän atılacek. Ama kim Bendän atılacek, o atılacek Ondan, Kim Beni yolladı».

Etmiş üürenici döner geeri

¹⁷ O etmiş kişi döndülär büük sevinmäklän da dedilär: «Saabi, artık fena duhlar da sesleerlär bizi Senin adınnan».

¹⁸ İisus dedi: «Gördüm şeytanı, angısı düştü göktän, nicä bir çimçirik.

¹⁹ Verdim kuvet sizä, basasınız yılannar hem skorpionnar üstünä hem duşmanın bütün kuvedi üstünä. Hiç bişey sizä zarar yapmayacek.

²⁰ Siz sevinmeyin, ani fena duhlar sizi sesleer, ama sevinin, ani adınız göklerdä yazılı».

Boba hem Ool

²¹ O saat İisus Ayoz Duhlan sevindi da dedi: «Şükür ederim Sana, Boba, ani sakladın bunnarı aarif hem fikirli olannardan da açtın evlatlara. Hakına, Boba, budur Senin istediin!

²² Hepsini Bobam Benim elimä verdi. Kimsey bilmeer, kimdir Ool, Bobadan kaarä, hem kimsey bilmeer, kimdir Boba, Ooldan kaarä, hem onnardan, kimä Ool isteer açmaa».

²³ Sora döndü üürenicilerinä da salt onnara dedi: «Mutlu gözlär, ani görerlär, ne siz görersiniz!

²⁴ Zerä söleerim sizä, ani çoyu proroklardan hem padişahlardan istedilär görmää, ne siz görersiniz, hem işitmää, ne siz işidersiniz, ama görmedilär hem işitmedilär».

Acıyannıklı samariyalı

²⁵ Bir zakon üüredicisi kalktı denesin İisusu da dedi: «Üüredici, ne yapayım, ki diveç yaşamak edeneyim?»

²⁶ İisus dedi: «Ne var yazılı Zakonda? Nasıl okuyêrsın?»

²⁷ O cuvap etti: «Seväsin Saabi Allahını bütün üräännän, bütün canınnan, bütün kuvedinnän hem bütün aklınnan hem seväsin yakın olanını, nicä kendini».

²⁸ İisus dedi ona: «Dooru cuvap ettin, yap ölä da yaşayacan».

²⁹ Ama o istedi kendini doorutsun da İisusa sordu: «Kimdir yakın olanım?»

³⁰ İisus enidän lafetti da dedi: «Bir adam İerusalimdän İerihona gidärdi, haydutların elinä düştü. Onnar onu soydular, düüyüp, yarı ölü braktılar, sora gittilär.

³¹ Razgelä, bir popaz o yoldan geçärdi. Onu görüp, yolun öbür tarafına geçti.

³² Hep ölä bir leviyli oradan geçärdi. Onu görüp, yolun öbür tarafına geçti.

³³ Ama bir samariyalı, bu yoldan geçärkän, yaklaştı, onu görüp, canı acıdı.

³⁴ Yanına geldi, zeytin yaayı hem şarap döktü da yaralarını baaladı. Sora pindirdi eşek üstünä, götürdü bir konak evinä da zaamet güttü ona.

³⁵ İkinci günü, açan yollandı, çıkardı iki dinar da verdi konak evinin çorbacısına, deyip: „Bakasın onu, ne harcayacan taa zeedä, dönmemdä ödeyecäm sana“.

³⁶ Kim bunnarın üçündän, sayêrsın, haydutların elinä düşmüşün yakın olanıydı?»

³⁷ O cuvap etti: «O, kim yardım etti ona». Ozaman İisus cuvap etti: «Git, sän dä ölä yap».

Marfa hem Mariya

³⁸ Açan İisus yolda bulunardı, üürenicilerinnän girdi bir küüyä. Bir karı, adı Marfa, kabletti Onu kendi evinä.

³⁹ Onun vardı kızkardaşı Mariya, angısı, oturup Saabinin ayakları yanında, seslärdi Onun sözünü.

⁴⁰ Marfa çok çalışardı, ki izmet etsin. İisusa yaklaşıp, dedi: «Saabi, senin kasavetin yok mu, ani kızkardaşım beni braktı, yalnız izmet edeyim. Desänä ona, yardım etsin bana».

⁴¹ Saabi cuvap etti ona: «Marfa, Marfa, çok işlär için sän zaamet hem kahır güdersin.

⁴² Sade bir iş lääzım sana. Mariya seçti ii tarafını, ani hiç alınmayacek ondan».