Luka 1 - Enі Baalantı

Ne işittik diri şaatlardan

¹ Çoyu başladı yazmaa annatmak oluşlar için, ani geçtilär bizim aramızda,

² nicä etiştirdilär bizä baştan o insannar, ani gördülär hepsini hem angıları şindi oldular Allahın Sözünün nasaatçıları.

³ Bän dä esapladım, hepsini islää aaraştırdıktan sora, hatırlı Feofil, sıravardır yazayım sana hepsini, nicä oldu,

⁴ ki sän biläsin o işin aslısını, ani üürendin.

İoanın duuması için haber

⁵ İudeyada, padişah İrodun vakıdında, vardı bir popaz, adı Zahariya, Aviyanın sırasından. Onun karısı Aronun kızlarındandı, adı Elisaveta.

⁶ İkisi dä Allahın önündä dooru insannardılar. Bir lekesiz bilä tamannardılar hepsi Allahın sımarladıklarını hem sıralarını.

⁷ Uşak onnarda yoktu, zerä Elisaveta gebä kalmardı, hem ikisi dä, Zahariya hem Elisaveta, yaşlı insannardı.

⁸ Bir sıra, açan Zahariya izmet edärdi Allahın önündä onun izmetçilii sırasında,

⁹ attılar çetelä popazların alışmaklarına görä, da ona düştü, günnüklesin Allahın Ayoz binası içindä.

¹⁰ Günnüklemäk vakıdında çok insan dua edärdi dışarda.

¹¹ Ozaman Zahariyaya gösterildi Allahın bir angili. O durardı günnük altarın saa tarafında.

¹² Açan Zahariya gördü onu, ürktü. Bir büük korku bastı onu.

¹³ Angil dedi ona: «Zahariya, korkma, zerä senin duan seslenmiş oldu. Senin karın Elisaveta duuduracek sana bir ool, angısının adını koyacan İoan.

¹⁴ O sana olacek şennik hem sevinmäk. Çok insan sevinecek onun duuması için.

¹⁵ O Allahın önündä olacek bir büük adam. İçmeyecek şarap hem başka sersem edän içkileri. Taa duumaktan o dolu olacek Ayoz Duhlan.

¹⁶ Çoyunu İzraildän o döndürecek onnarın Saabi Allahına.

¹⁷ O Allahın önündä gezecek İliyanın kuvedinnän hem duhunnan, çevirsin deyni bobaların üreklerini uşaklarına hem o kanırıklı neetlileri doorulaa. O hazırlayacek insanı Saabinin gelmesi için».

¹⁸ Zahariya dedi angilä: «Nedän bän tanıyacam bunu? Zerä bän ihtärım, karım da yaşlı».

¹⁹ Angil cuvap etti: «Bän, Gavriil, durêrım Allahın karşısında, yollanılmışım, ki lafedeyim seninnän da getireyim bu ii haberi sana.

²⁰ Sän lafedämeyecän hem dilsiz kalacan o günä kadar, bu olunca, zerä inanmadın benim sözlerimi, ani vakıt geldiynän, hepsi ölä olacek».

²¹ İnsan, ani beklärdi Zahariyayı, şaşardı, neçin çok oyalanêr Ayoz bina içindä.

²² Açan çıktı dışarı, lafedämärdi. Onnar annadılar, ani Ayoz bina içindä o gördü bir görünmäk. Zahariya onnara nışannan gösterärdi, zerä lafedämärdi.

²³ Açan izmet günneri tamannandı, Zahariya geldi evä.

²⁴ Bu günnerdä Elisaveta gebä kaldı da beş ay saklandı, zerä deyärdi:

²⁵ «Saabi bitki-bitkiyä esap aldı da yaptı, ki çıkayım insanın aazından hem kötü laflarından».

İisusun duuması için haber

²⁶ Altıncı ayda, angil Gavriil yollanmış oldu Allahtan Galileyanın bir kasabasına, adı Nazaret.

²⁷ Geldi bir kıza, angısı yavkluydu İosiflän, bir adamnan, Davidin senselesindän. Bu kızın adı Mariya.

²⁸ Angil geldi ona da dedi: «Usluluk sana, Allahtan iivergi edenän kız, Saabi seninnän. /İisözlenmişsin sän karıların arasında!/»

²⁹ Mariya bu laflardan şaştı da düşünmeyä vardı. O sorardı kendi-kendinä, ne annaması var bu selämin?

³⁰ Angil dedi: «Korkma, Mariya, sän edendin iivergi Allahtan.

³¹ Gebä kalacan da duuduracan bir Ool, Angısının adını koyacan İisus.

³² O olacek bir büük Adam. Onun adını koyaceklar „Pek üüsek Allahın Oolu“. Saabi Allah verecek Ona Onun Bobasının, Davidin, çorbacılıını.

³³ O divecinä padişahlık edecek İakovun evindä. Onun padişahlıının sonu olmayacek».

³⁴ Mariya sordu angilä: «Nesoy bu var nasıl olsun, açan bän bilmeerim, nedir koca?»

³⁵ Angil cuvap etti: «Ayoz Duh konacek sana. Pek üüsek Allahın gölgesi seni gölgeleyecek. O, Kim sendän duuacek, adlanacek ayoz, Allahın Oolu.

³⁶ Senin hısımın Elisaveta artık yaşlı, ama gebä kaldı. O da duuduracek bir ool. Ona hepsi deyärdi uşaksız, ama artık altı ay, nicä gebä kaldı.

³⁷ Allahın bir dä sözü yok nasıl kuvetsiz kalsın».

³⁸ Ozaman Mariya dedi: «Saabi, bän senin çıraan, olsun Senin sözünä görä!» Da angil gitti ondan.

Mariya geler Elisavetaya

³⁹ Mariya birazdana kalktı da alatlan gitti bayırlardakı kasabaya, ani İudanın erlerindeydi.

⁴⁰ Girdi Zahariyanın evinä da selämnedi Elisavetayı.

⁴¹ Açan Elisaveta işitti Mariyanın kutlamasını, onda birdän tepindi uşak. Elisaveta doldu Ayoz Duhlan.

⁴² Elisaveta baardı büük seslän: «İisözlenmişsin sän karıların arasında hem iisözlenmiş senin Uşaan, angısını sän taşıyêrsın!

⁴³ Nasıl bän kazandım bölä ikram, ki bana gelsin benim Saabinin anası?

⁴⁴ Nicä işittim senin sesini kutlamakta, tepindi uşak sevinmektän içimdä.

⁴⁵ Ne mutluysun sän, ani inandın Saabinin sözünü, zerä Saabi ne adêêr, onu tamannêêr».

⁴⁶ Mariya dedi: «Bän bütün ürektän metinneerim Saabiyi.

⁴⁷ Sevinir duhum Allahta, benim Kurtarıcımda.

⁴⁸ Zerä Allah esap aldı Onun çıraan aşaadan halını. Büündän ötää hepsi senselelär mutlulayaceklar beni.

⁴⁹ Çünkü Çokkudretli yaptı büük işlär benim için, Onun adı ayozdur.

⁵⁰ Onun acıyannıı kaplêêr boydan-boya Ondan korkan insanı.

⁵¹ O gösterdi kuvedini Kendi elinnän da bozdu hodulların düşünmeklerini.

⁵² Devirdi o kaavileri çorbacılık skemnelerindän da kaldırdı aşaa haldan insanı.

⁵³ Aaç olannarı O doyurdu iiliklän, ama zengin olannarı salverdi, gitsinnär boş ellän.

⁵⁴ O Kendi izmetkerinä, İzrailä, yardıma geldi. O bir sıra bilä unutmêêr acımaa,

⁵⁵ nicä adadı bizim dedelerimizä, Avraama hem onun senselesinä divecinä».

⁵⁶ Mariya kaldı Elisavetaylan üç ayın dolayında, sora döndü geeri evä.

İoan Vaatizedicinin duuması

⁵⁷ Açan geldi vakıdı duudursun, Elisaveta duudurdu bir ool.

⁵⁸ Komuşular hem hısımnar işittilär, ani Saabi büük hayır baaşladı Elisavetaya, onuştan hepsi onunnan bilä sevindilär.

⁵⁹ Sekizinci günü geldilär uşaa kesiklik yapmaa. İstedilär adını koymaa Zahariya, nicä bobasının adı.

⁶⁰ Ama anası onnara dedi: «Olmaz, onun adı İoan olacek».

⁶¹ «Kimseydä sizin hısımnardan yok butürlü ad», – cuvap etti onnar.

⁶² Yaptılar nışan ellerinnän bobasına, ki annasınnar, nesoy uşaan adını koysunnar.

⁶³ Zahariya istedi bir parça taftacık da yazdı bölä: «Onun adı İoan olacek». Hepsi şaştılar.

⁶⁴ Hemen çözüldü onun dili, da başladı lafetmää hem Allahı metinnemää.

⁶⁵ O bayırlı İudeyanın erlerindä hepsi komuşuları bir korku bastı. Dolayda hepsi insan bunun için lafedärdi.

⁶⁶ Hepsi, kim dä işidärdi bunu, düşünmää varıp, deyärdi: «Acaba, bu uşak kim olacek?» Hakına, ani Allahın eli onun üstündeydi.

Zahariyanın prorokluu

⁶⁷ Uşaan bobası, Zahariya, doldu Ayoz Duhlan da prorokluk etti:

⁶⁸ «İisözlenmiş olsun İzrailin Saabi Allahı, Angısı geldi yardıma Kendi insanına da kurtardı onnarı.

⁶⁹ Kaldırdı bizä bir kaavi Kurtarıcı Kendi izmetkerin, Davidin, evindän,

⁷⁰ nicä haberlediydi evel vakıttan ayoz proroklarınnan.

⁷¹ Adadı, ani kurtaracek bizi duşmannardan hem kincilerin ellerindän.

⁷² Butakım, Allah gösterer Kendi acıyannıını bizim bobalarımız için, unutmêêr ayoz baalantısını

⁷³ hem eminnän adamasını, ani verdi bizim bobamıza Avraama.

⁷⁴ O adadı, ani bizi kurtaracek duşmannardan da yapacek, ki izmet edelim Ona korkusuz,

⁷⁵ kabaatsızlıkta hem ayozlukta bütün bizim yaşamamızda.

⁷⁶ Ama sän, evlat, adlanacan Pek üüsek Allahtan prorok, zerä gidecän Saabinin önü sora, ki Onun için yol hazırlayasın.

⁷⁷ Sän insana haberleyecän kurtulmak hem günahlardan baaşlamak.

⁷⁸ Allahımız, dolu sevgiylän hem acıyannıklan, yukardan yollayacek bizä kurtulmak, benzär dan erinin şafkına,

⁷⁹ ki aydınnatsın onnara, kim bulunêr karannıkta hem ölüm gölgesindä, doorutsun bizi usluluk yoluna».

⁸⁰ Uşak büüyärdi, kaavilenärdi duhlan. Yaşadı çol erlerindä o günä kadar, açan çıktı İzrail halkının karşısına.