Koloslulara 4 - Enі Baalantı

¹ Siz, çorbacılar, verin ne düşer çıraklara, da hepsini birtürlü sayın, bileräk, ani sizin dä var Çorbacınız göktä.

Hertürlü nasaatlar

² Herzaman verilin duaya. Dua edärkän, kuşku olun hem şükür edin.

³ Dua edin bizim için dä, ki Allah açsın bizä bir kapu nasaat için, ki haberleyelim Hristozun saklılıını, angısı için kapana düştüm,

⁴ ki bunu açık bildiräbileyim, da, nicä düşer, lafedeyim.

⁵ Klisedän dışanda olannarlan götürün kendinizi aarifliklän, vakıdı paaya koyup.

⁶ Sizin lafınız herzaman hayırlı olsun, tuzlanmış, ki biläsiniz, nicä düşer herkezinä cuvap etmää.

Bitki selämnär

⁷ Sizä, benim için hepsini söleyecek Tihik, bizim sevgili kardaş hem inanç yardımcı, hem kafadar Saabinin izmetindä,

⁸ angısını sizä maasuz yolladım, ki annasın halınızı da üreklendirsin sizi.

⁹ Onunnan bilä yolladım Onisimi dä, angısı inanç hem sevgili kardaştır sizin aranızdan. Onnar söleyeceklär sizä hepsini, ne burada olêr.

¹⁰ Seläm yollêêr sizä Aristarh, ani kapalı benimnän barabar, hem Mark, Varnavanın teyzä oolu, angısı için siz sımarlamak aldınız, ki geldiynän kabledäsiniz onu,

¹¹ hep ölä İisus, angısına dener İust. Kesikli olannardan yalnız bunnar işleerlär benimnän bilä Allahın Padişahlıı için. Onnar üreemi serinnettilär.

¹² Seläm yollêêr sizä Epafras, İisus Hristozun çıraa, ani sizdän. O herzaman çalışkan sizin için duada, ki olasınız taman hem kaavi inanda, tanıyarak hepsini, ne isteer Allah.

¹³ Şaatlık ederim onun için, ani o çok çalışkan sizin için hem onnar için, kim Laodikiya hem İerapol kasabalarında bulunêr.

¹⁴ Seläm yollêêr sizä Luka, sevgili doftor, hem Dimas.

¹⁵ Selämneyin kardaşları Laodikiya kasabasından, hem Nimfayı hem kliseyi, ani bu karının evindä toplanêr.

¹⁶ Bu kiyat aranızda okunduktan sora, bakın da verin, Laodikiya klisesinä okusunnar. Siz dä okuyun kiyadı, ani Laodikiyadan gelecek.

¹⁷ Söleyin Arhipä bölä: «Bak da tamanna izmetçilii, ani kablettin Saabidän».

¹⁸ Bän, Pavli, yazêrım bu selämi kendi elimnän. Unutmayın benim sincirlerimi. Sizinnän iivergi olsun. /Amin./