Koloslulara 2 - Enі Baalantı

¹ İsteerim, ki biläsiniz, nekadar çok çalışêrım sizin için, laodikiyalılar için hem hepsi onnar için, kim görmedi benim üzümü.

² İsteerim, ani onnarın ürekleri hoşlansın hem sevgiylän birleşsinnär, ki taman bilimin bütün zenginiini edensinnär da tanısınnar Allahın saklı kurulmuşunu, ani Hristostur,

³ Angısında saklı bütün aarifliin hem bilimin haznası.

⁴ Bunu söleerim, ki birkimsey sizi yanıltmasın kulaa nazlandıran laflarlan.

⁵ Zerä, makar ki güüdeycesinä bulunmêêrım aranızda, duhça sizinnänim. Görüp nekadar tertipliysiniz hem nekadar kaavi inanêrsınız İisus Hristoza, bän çok sevinerim.

Hakına kesiklik

⁶ Onuştan, nicä kablettiniz Saabi İisus Hristozu, ölä dä Onda yaşayın.

⁷ Kökleşin hem temellenin Onda, kaavileşin inanda, nicä üürendiniz, herzaman şükür ederäk Allaha.

⁸ Bakın, kardaşlar, ki birkimsey sizi esir almasın filosofluklan, boşuna aldangaç laflarlan, insanın adetlerinä görä, bu dünneyin başlankı üüretmeklerinä görä, ama diil Hristoza görä.

⁹ Zerä Onda güüdeycesinä bulunêr Allahın bütün tamannıı.

¹⁰ Odur, Kim herbir kullanıcılıın hem zaabitliin Başı, Onda siz dä taman oldunuz.

¹¹ Ondan kesikli oldunuz diil bir el kesikliinnän, ama soyunarak tencä tabeetlerinizdän kesikliklän, ani Hristos yaptı,

¹² Onunnan gömülüp vaatizliktä, hep Onunnan dirildiniz inannan Allahın kuvedinä, Angısı Onu ölüdän diriltti.

¹³ Siz ölüydünüz, zerä günah yapardınız hem güüdeycesinä diildiniz kesikli. Ama Allah sizä yaşamak Hristozlan verdi. Zerä O baaşladı hepsi bizim günahlarımızı.

¹⁴ O bizim borç yazımızı sildi, ani sıralarınnan bizä karşıydı da kabaatlı çıkarardı. Onu aradan alıp, stavroza kaktı.

¹⁵ Gökteki kullanıcıların hem zaabitlerin silählarını aldı, stavrozlan gezdirip onnarı ensemäk paradında, herkezin gözü önündä utandırdı.

Aldanmayın yannış üüretmeklerä

¹⁶ Onuştan kimsey sizi imäk için, içmäk için, bir yortu için, eni ay için eki cumertesi için kabaatlandırmasın.

¹⁷ Bunnar gelär vakıdın gölgesidir, ama aslılık Hristozda.

¹⁸ Kimsey baaşışınızı kapmasın, isteyeräk, olasınız münüz hem verili angillerä. Bölä bir adam karışêr onnara, ne kendi görmedi, boşuna kabarêr kendi tenin fikirinnän

¹⁹ da tutunmêêr Baştan, Kimdän bütün güüdä ekleri hem baalantıları yardımınnan beslener hem birleştiriler, da başarêr, büüyeräk Allahın yardımınnan.

²⁰ Eer siz, öleräk Hristozlan bilä, dünneyin başlankı üüretmeklerindän kurtuldusaydınız, ozaman neçin siz, sansın dünnedä yaşayannar, bu sıraları tutêrsınız:

²¹ «Diimä», «datma», «dokunma».

²² Hepsi bu sıralar verildi o işlär için, ani kullanıldıkça yok olêr. Bunnar – insan emirleri hem adam üüretmekleri.

²³ Bu sıralar yapınar allahçılıklan, tutaklıklan hem güüdeycä zeetlenmäklän aarif görünür, ama tenin istediklerini durgutmak için onnarın faydası yok.