İoan 7 - Enі Baalantı

İisus Bordey yortusunda

¹ Bundan sora İisus gezärdi Galileyada. İstämärdi gezsin İudeyada, zerä iudeylär aarardılar öldürsünnär Onu.

² Yaklaşardı iudeylerin Bordey yortusu.

³ İisusun kardaşları dedilär Ona: «Çık buradan da git İudeyaya, Senin üürenicilerin dä görsünnär, ne işlär yapêrsın.

⁴ Zerä kimsey yaptıklarını saklamêêr, açan isteer açılsın insana. Çünkü Sän yapêrsın bu işleri, göster Kendini dünneyä».

⁵ Onun kardaşları bunu dedilär, zerä inanmardılar Ona.

⁶ İisus cuvap etti onnara: «Benim vakıdım taa gelmedi, ama sizin için herzaman vakıt uygun.

⁷ Sizdän dünnä yok nasıl azetmesin, ama Bendän azetmeer, zerä Bän açıklêêrım, ani onun işleri kötü.

⁸ Siz gidin yortuya. Bän taa gitmeyecäm bu yortuya, zerä Benim vakıdım taa gelmedi».

⁹ Bunnarı sölediktän sora O kaldı Galileyada.

İisus yortuda

¹⁰ Açan kardaşları gittilär yortuya, sora O da ardlarından gitti, ama diil açıkta, saklı gitti.

¹¹ İudeylär aarardılar Onu yortu vakıdı da sorardılar: «O neredä?»

¹² İnsan arasında çok türlü Onun için fisirdemäk olurdu. Kimisi deyärdi: «O bir islää adam», başkası deyärdi: «Diil islää, O insanı aldadêr».

¹³ Ama kimsey Onun için lafetmärdi açık, zerä korkardılar iudeylerdän.

¹⁴ Yortunun yarısında İisus girdi Ayoz bina içinä da başladı üüretmää.

¹⁵ İudeylär şaşardılar, deyip: «Näändan O biler, üürenmediynän, Ayoz Yazıları?»

¹⁶ İisus cuvap etti: «Benim üürenmişliim diil Bendän, ama Ondan, Kim Beni yolladı.

¹⁷ Eer birkimsey istärseydi yapsın Onun istediini, o annayacek bu üüretmäk Allahtan mı, osa Bän Kendimdän mi söleerim.

¹⁸ Kim lafeder kendindän, o kendinä metinnik bakêr, ama kim onun yollayanın metinniini bakêr, o dooru söleer, onda yok yannışlık.

¹⁹ Vermedi mi Moisey sizä Zakonu? Hep okadar kimsey sizdän tutmêêr Zakonu, ozaman neçin Beni öldürmää bakêrsınız?»

²⁰ İnsan cuvap etti: «Diil mi fena duh Sendä? Kim bakêr Seni öldürmää?»

²¹ İisus cuvap etti onnara: «Bän bir iş yaptım, da hepsiniz şaştınız.

²² Moisey verdi sımarlamak kesiklik için sizä, makar ki bu diil Moiseydän, ama dedelerdän, da siz onuştan kesiklik yapêrsınız uşaa cumertesi günü.

²³ Eer uşaa kesiklik yapılarsaydı cumertesi günü, ki basılmasın Moiseyin Zakonu, neçin Bana okadar üfkelenersiniz, ani cumertesi günü bir adamı heptän saa yaptım?

²⁴ Daava kesmeyin dışankı duruşa görä, ama daava kesin doorulaa görä».

İisus hakına Hristos mu?

²⁵ Kimi adamnar İerusalimdän sorardılar: «Diil mi bu O, kimi öldürmää aarêêrlar?

²⁶ Tä, O lafeder açıklıkta, da kimsey bişey Ona demeer! Acaba kayıl olmadı mı öndercilär dä, ani O Hristos?

²⁷ Biz bileriz, neredän O, ama açan Hristos gelecek, kimsey bilmeyecek neredän».

²⁸ İisus, Ayoz bina aulunda üürederäk insanı, bölä baardı: «Siz Beni tanıyêrsınız hem bilersiniz neredänim, ama Bän Kendi başıma gelmedim. Beni Yollayan – haklı, ama siz Onu tanımêêrsınız.

²⁹ Bän tanıyêrım Onu, zerä geldim Ondan. O Beni yolladı».

³⁰ Onnar bakardılar tutsunnar Onu, ama kimsey el koyamadı Ona, zerä gelmediydi vakıdı.

³¹ Çoyu insandan inandılar Ona. Onnar deyärdilär: «Açan Hristos gelecek, ne taa çok nışan yapacek mı, nekadar bu Adam yapêr?»

³² Fariseylär işittilär insanı bölä fısırdaşarak İisus için. Büük popazlar hem fariseylär yolladılar bekçileri, ki tutsunnar İisusu.

³³ Ama İisus dedi: «Bän bir parça vakıt taa olacam sizinnän da sora gidecäm Ona, Kim yolladı Beni.

³⁴ Siz aarayacenız Beni da bulamayacenız. Neredä Bän olacam, siz orayı yok nicä geläsiniz».

³⁵ İudeylär lafedärdilär biri-birinnän: «Nereyi bu adam isteer gitsin, da biz Onu bulamayalım? Düşünmeer mi gitsin bizim insana, ani daanık urum kasabalarına, da urumnarı üüretsin?

³⁶ Başka türlü nesoy annamaa bu lafları, ani söledi: „Aarayacenız da bulamayacenız Beni“ hem „Neredä Bän olacam, siz orayı gelämeyeceniz?“»

İisus – yaşamak suyu

³⁷ Yortunun bitki büük günündä İisus kalktı ayakça da baardı: «Kim susadı, gelsin Bana da içsin.

³⁸ Kim inanêr Bana, ondan bir derä yaşamak suyu akacek, nicä yazılı Ayoz Yazıda».

³⁹ Sölärdi bu lafları Ayoz Duh için, Angısını lääzımdı kabletsinnär onnar, kim Ona inanêr. Zerä Ayoz Duh taa verilmediydi, hem İisus taa diildi metinnikli.

⁴⁰ Kimisi insandan, açan işittilär bu lafları, dedilär: «Bu adam hakına beklenän prorok».

⁴¹ Başkası deyärdi: «O Hristos», ama taa başkası deyärdi: «Olur mu Hristos Galileyadan gelsin?

⁴² Yok mu yazılı Ayoz Yazıda, ani Hristos gelecek Davidin senselesindän, Vifleem kasabasından, neredä David yaşardı?»

⁴³ Ölä ki, olurdu çekiş insan arasında İisus için.

⁴⁴ Kimisi baktılar tutsunnar Onu, ama kimsey el koyamadı Ona.

İudey öndercileri inanmêêrlar

⁴⁵ Bekçilär döndülär geeri büük popazlara hem fariseylerä. Bunnar sordular onnara: «Neçin getirmediniz Onu?»

⁴⁶ Bekçilär cuvap ettilär: «Kimsey bir sıra bilä lafetmedi bu adam gibi».

⁴⁷ Fariseylär dedilär: «Ne, siz dä mi aldandınız?

⁴⁸ İnandı mı acaba bir önderci eki bir farisey Ona?

⁴⁹ Bu insan bilmeer Zakonu, o betvalı!»

⁵⁰ Onnardan biri, Nikodim, angısı öncä geldiydi İisusa, dedi onnara:

⁵¹ «Bizim Zakon kabaatlandırêr mı birkimseyi, taa seslämediynän onu hem annamadıynan, ne yaptı?»

⁵² Onnar cuvap ettilär: «Beki sän dä Galileyadansın? Aaraştır islää da bak, Galileyadan var mı nasıl çıksın prorok?»

⁵³ Sora hepsi daalıştılar evlerinä.