İoan 6 - Enі Baalantı

Beş bin adam doyurulêr

¹ Bundan sora İisus gitti Galileya (Tiveriada) gölünün öbür tarafına.

² Çok insan gidärdi Onun ardına, zerä görärdilär nışannarı, ne yapardı hastalarlan.

³ İisus pindi bayır üstünä da otururdu orada üürenicilerinnän barabar.

⁴ Paskellä, iudeylerin yortusu, yaklaşardı.

⁵ İisus baktı da gördü çok insan, ani gelärdi Ona. Ozaman dedi Filipä: «Näändan satın alacez okadar ekmek, ki bu insanı doyuralım?»

⁶ Söledi bölä, ki denesin onu, zerä Kendisi bilärdi, ne yapacek.

⁷ Filip cuvap etti: «İkiüz dinarlık ekmek dä etişmäz onnara, ki herkezi birär parça alabilsin».

⁸ Öbür üürenici, Andrey, Simon Petrinin kardaşı, dedi:

⁹ «Burada var bir çocuk, angısında var beş ekmek arpadan hem iki balık, ama nedir onnar bukadar insana?»

¹⁰ İisus dedi: «Söleyin, insan otursun». Orada vardı çok çimen. İnsan oturdu erä. Hepsi vardılar bir beş bin adamın dolayında.

¹¹ İisus aldı ekmekleri, şükür etti Allaha, sora payetti /üürenicilerinä, üürenicileri da payettilär/ insana. Hep ölä payetti balıkları, herkezinä, kim nekadar istedi.

¹² Onnar doyunduktan sora, İisus dedi üürenicilerinä: «Toplayın imäk parçalarını, ki bişey zän olmasın».

¹³ Topladılar da doldurdular oniki sepet ekmek parçasınnan, ani kaldıydı o inilmiş beş arpa ekmeendän.

¹⁴ İnsan, açan gördü bu nışanı, ani yaptı İisus, dedi: «Budur hakına prorok, angısı lääzım gelsin dünneyä».

¹⁵ İisus bilärdi, ani neetlenärdilär gelsinnär da zorlayıp yapsınnar Onu padişah. Onuştan O sauştu oradan da yalnız genä pindi bir bayır üstünä.

İisus gezer su üstündä

¹⁶ Açan avşam oldu, Onun üürenicileri gittilär göl boyuna.

¹⁷ Girdilär kayık içinä da gidärdilär gölün öbür tarafına, Kapernaum kasabasına. Karannık olduydu, ama İisus hep okadar gelmärdi onnara.

¹⁸ Bir sert lüzgär esärdi, göl dä dalgalıydı.

¹⁹ Açan üzdülär bir irmi beş-otuz stadi, gördülär ani İisus gezer su üstündä da kayaa yaklaşêr. Onnar korktular.

²⁰ «Bu Bänim, korkmayın!» – dedi İisus.

²¹ Ozaman onnar istärdilär alsınnar Onu kayık içinä. Bundan sora birdän kayık etişti o erä, nereyi onnar gidärdilär.

Ömür ekmää

²² Ertesi günü insannar, ani kaldılar gölün öbür tarafında, gördülär, ani orada vardı salt bir kayık. Annadılar, ani İisus girmedi üürenicilerinnän kayık içinä, ama üürenicilär Onsuz gittilär.

²³ Geldi başka birkaç kayık Tiveriada kasabasından yakın o erä, neredä idiydilär ekmek Saabinin iisözlemesindän sora.

²⁴ Ölä ki, insan, görüp, ani orada yok ne İisus, ne dä üürenicilär, pindi kayıklara da gitti Kapernaum kasabasına İisusu aaramaa.

²⁵ Açan buldular Onu gölün öbür tarafında, dedilär Ona: «Üüredici, nezaman Sän burayı geldin?»

²⁶ İisus cuvap etti onnara: «Dooru, dooru söleerim sizä: aarêêrsınız Beni, diil ani gördünüz nışannarı, ama ani idiniz ekmek da doyundunuz.

²⁷ Çalışın diil geçär imäk için, ama geçmäz imäk için, ani diveç yaşamaya götürer. Bunu sizä Adam Oolu verecek. Zerä Adam Oolunu Allah Boba nışannadı Kendi mühürünnän».

²⁸ Onnar dedilär: «Ne lääzım yapalım, Allahın işini deyni tamannayalım?»

²⁹ İisus cuvap etti: «Budur Allahın işi, ki inanasınız Ona, Kimi O yolladı».

³⁰ Buna onnar cuvap ettilär: «Ne nışan gösteräbilirsin bizä, ki görelim da inanalım Seni? Ne iş Sän yapêrsın?

³¹ Bizim bobalar idilär manna çolda, nicä var yazılı: „Verdi onnara ekmek göktän“».

³² İisus dedi: «Dooru, dooru söleerim sizä, ani Moisey vermedi ekmek göktän sizä, ama Benim Bobam verer hakına ekmek göktän.

³³ Zerä Allahın ekmää Odur, Kim göktän iner da yaşamak dünneyä verer».

³⁴ «Saabi, ver bizä herzaman bu ekmektän», – dedilär onnar.

³⁵ İisus dedi onnara: «Bänim yaşamak ekmää. Kim Bana geler, hiç acıkmaz, kim Bana inanêr, bir sıra bilä susuz kalmaz.

³⁶ Nicä söledim sizä, gördünüz Beni da hep okadar inanmadınız.

³⁷ Hepsi, ne Boba Bana verer, Bana geler. Kim dä Bana geler, onu hiç birzaman uuratmayacam dışarı.

³⁸ Zerä göktän indim, diil ani Kendi istediimi yapayım, ama Beni yollayan Bobanın istediini tamannayım.

³⁹ Beni Yollayanın istedii budur: birini bilä onnardan, ani Bana verdi, kaybetmeyim, ama bitki gündä hepsinä yaşamak vereyim.

⁴⁰ Budur Bobanın istedii: herkezin diveç yaşaması olsun, kim görer Oolu da inanêr, bitki gündä onu dirildecäm».

⁴¹ İudeylär mırıldanardılar Ona karşı, zerä dedi: «Bänim göktän inmä ekmek».

⁴² Deyärdilär: «Diil mi O – İisus, İosifin oolu, Angısının bobasını hem anasını biz tanıyêrız? Şindi neçin O deer: „Bän göktän indim?“»

⁴³ İisus cuvap etti: «Mırıldanmayın biri-birinizin aranızda.

⁴⁴ Kimsey yok nasıl Bana gelsin, eer Beni yollayan Boba onu çekmärseydi. Ona bitki gündä Bän ömür verecäm.

⁴⁵ Prorokların kiyatlarında yazılı: „Hepsi Allahtan üüredilmiş olaceklar“. Hepsi, kim Bobadan işitti hem üürendi, o Bana geler.

⁴⁶ Zerä kimsey Bobayı görmedi, Ondan kaarä, Kim Allahtan geldi. O Bobayı gördü.

⁴⁷ Dooru, dooru söleerim sizä: kim inanêr /Bana/, onun var diveç yaşaması.

⁴⁸ Bänim yaşamak ekmää.

⁴⁹ Sizin bobalarınız idilär manna çolda da öldülär.

⁵⁰ Göktän inän ölädir bir ekmek, ani kim onu iyer, hiç ölmeer.

⁵¹ Bänim yaşamak ekmää göktän inmä. Kim bu ekmektän iyer, diveç yaşayacek. Ekmek, ani Bän vererim dünneyin yaşaması için, Kendi güüdäm».

⁵² Açan iudeylär bu lafları işittilär, başladılar çekişmää biri-birinnän. Onnar deyärdilär: «Nesoy var nasıl bu Adam versin güüdesini, iyelim?»

⁵³ İisus dedi: «Dooru, dooru söleerim sizä, ani eer imärseydiniz Adam Oolunun güüdesini hem içmärseydiniz Onun kanını, siz yaşamak edenmeyeceniz.

⁵⁴ Kim iyer Benim güüdemi hem içer benim kanımı, onun var diveç yaşaması. Onu dirildecäm bitki gündä.

⁵⁵ Zerä Benim güüdäm – hakına imäk hem Benim kanım – hakına içmäk.

⁵⁶ Kim iyer Benim güüdemi hem içer Benim kanımı, o kalêr Bendä, Bän dä onda.

⁵⁷ Nicä diri Boba yolladı Beni, da yaşêêrım Bobanın kuvedinnän, hep ölä Beni dä iyän yaşayacek Benim kuvedimnän.

⁵⁸ Budur göktän inmä ekmek, diil nicä manna, ani bobalarınız idilär da öldülär. Kim iyer bu ekmää, diveç yaşayacek».

⁵⁹ İisus söledi bunnarı sinagoga içindä, açan üüredärdi insanı Kapernaum kasabasında.

Üürenicilär brakêrlar İisusu

⁶⁰ Bu laflardan sora çoyu üürenicilerindän dedilär: «Ne fasıl laflar, kim var nasıl kabletsin bu lafları?»

⁶¹ Ama İisus bilärdi, ani Onun üürenicileri mırıldanêrlar, onuştan dedi: «Bu laflar sizä köstek mi?

⁶² Ne deyeceniz, açan göreceniz Adam Oolunu kalkarak enidän orayı, neredä O baştan bulunardı?

⁶³ Yaşamak verän duhtur. Güüdä bişeyä yardım etmeer. Bu laflar, ani sizä söledim, duhtur hem ömürdür.

⁶⁴ Ama var sizdän kimisi inansız». İisus baştan bilärdi, kim inanmêêr hem kim Onu satacek.

⁶⁵ Da dedi: «Bunun için söledim, ani kimsey yok nasıl gelsin Bana, eer bu ona diilseydi verilmiş Bobamdan».

⁶⁶ Bu beterä çoyu Onun üürenicilerindän döndülär geeri da ondan sora Onunnan gezmedilär.

⁶⁷ Ozaman İisus, danışıp onikisinä, dedi: «Beki siz dä isteersiniz gitmää?»

⁶⁸ «Saabi, kimä gidelim? – dedi Simon Petri. – Sendä diveç yaşamak sözleri.

⁶⁹ Biz inandık da tanıdık, ani Sänsin Allahın Ayozu».

⁷⁰ İisus cuvap etti: «Ayırmadım mı Bän sizi onikinizi? Ama sizdän birisi diavol».

⁷¹ Bunu dedi onikisindän birisi için, Simon İskariotun oolu İuda için, angısı sonda sattı Onu.