İoan 4 - Enі Baalantı

Samariyalı karı

¹ Fariseylär işittilär, ani İisus taa çok üürenici edener hem vaatiz eder, nekadar İoan.

² Aslısı, Kendi İisus vaatiz etmärdi, ama vaatiz edärdi Onun üürenicileri.

³ Açan İisus annadı bunu, braktı İudeyayı da enidän gitti Galileya erlerinä.

⁴ Lääzımdı geçsin Samariyadan.

⁵ Tä, İisus geler Samariyada bir kasabaya, adı Sihar, neresi yannaşık o kırlan, ani İakov verdiydi kendi ooluna İosifä.

⁶ Orada bulunardı İakovun pınarı. İisus, dingin yoldan, oturdu pınarın yanında ölä bir altıncı saatta.

⁷ Geldi bir karı Samariyadan, ki su pınardan çıkarsın. «Ver Bana, su içeyim», – dedi İisus.

⁸ Zerä Onun üürenicileri gittiydilär kasabaya imeelik almaa.

⁹ Samariyalı karı dedi: «Sän iudeysin, nesoy bendän, samariyalı karıdan, su içmää isteersin?» İudeylär bişey paylaşmêêrlar samariyalılarlan.

¹⁰ İisus cuvap etti ona: «Eer bilsän Allahın baaşışını hem Onu, Kim sendän su isteer, sän kendin istärsin Ondan su içmää, da O yaşamak suyu verir sana».

¹¹ Karı deer Ona: «Saabi, sän yok neylän çıkarasın su, pınar da derin, nesoy var kolay olsun sendä yaşamak suyu?

¹² Ne sän taa büüksün bizim bobadan İakovdan mı, angısından bizä kaldı bu pınar, neredän içti kendisi, oolları hem hayvannarı?»

¹³ İisus cuvap etti: «Kim içer bu sudan, o enidän susar,

¹⁴ ama kim içecek o sudan, ani Bän verecäm, diveç susuz kalmayacek. Ama su, ani ona verecäm, onda bir sızıntı olacek, da diveç yaşamaya getirecek».

¹⁵ Karı dedi Ona: «Çorbacı, ver bu sudan bana, ki susamayım da gelmeyim buradan su çıkarmaa».

¹⁶ «Git, çaar kocanı da gel burayı», – dedi İisus.

¹⁷ Karı cuvap etti: «Yok kocam». «Dooru söledin, ani yok kocan, – dedi İisus, –

¹⁸ zerä beş kocan oldu. Bu adam, kiminnän şindi yaşêêrsın, o da diil senin kocan. Bunu dooru söledin».

¹⁹ Karı dedi: «Çorbacı, görerim, ani Sän bir proroksun.

²⁰ Bizim bobalar baş iilttilär bu bayır üstündä, ama siz deersiniz, ani er, neredä lääzım baş iiltmää, bulunêr İerusalimdä».

²¹ İisus cuvap etti ona: «Karı, inan Beni, geler vakıt, açan baş iiltmeyeceniz Bobaya ne bu bayır üstündä, ne dä İerusalimdä.

²² Siz baş iildersiniz neyä bilmeersiniz, biz baş iilderiz neyä bileriz, zerä kurtulmak – iudeylerdän.

²³ Ama geler vakıt, artık şindän sora geldi, açan hakına baş urannar baş iildeceklär Bobaya duhta hem aslılıkta, zerä butürlü baş iildenneri Boba aarêêr.

²⁴ Allah – duh. Kim baş iilder Ona, lääzım baş ursun duhta hem aslılıkta».

²⁵ Karı cuvap eder: «Bilerim, ani gelecek Messiya, Angısına dener Hristos. O, geldiynän, hepsini bizä annadacek».

²⁶ İisus dedi: «Bän, ani seninnän lafederim, Kendim Messiyayım».

²⁷ Bu vakıt geldi Onun üürenicileri. Onnar şaştılar, ani O lafeder bir karıylan. Ama birisi bilä sormadı: «Ne isteersin?» eki: «Neçin lafedersin onunnan?»

²⁸ Karı braktı su kabını, gitti kasabaya da dedi insana:

²⁹ «Gelin dä görün bir adam, angısı söledi hepsini, ne yaptım. Acaba diil mi O Hristos?»

³⁰ Onnar çıktılar kasabadan da gelärdilär İisusa.

³¹ Bu vakıt üürenicilär yalvarardılar Ona, isin, deyip: «Üüredici, i bişey».

³² Ama O dedi: «Bendä var bir imäk, ani siz bilmeersiniz».

³³ Üürenicilär biri-birinnän lafedärdilär: «Getirmedi mi acaba Ona birkimsey imää?»

³⁴ İisus dedi: «Benim imääm budur: yapayım Onun istediini, Kim Beni yolladı, hem işini Onun tamannayım.

³⁵ Demeersiniz mi siz, ani var taa dört ay biçmäk vakıdınadan? Ama Bän sizä deerim: ya gözlerinizi açın da bakın ekinnerä. Onnar şindän sora sarardılar biçmäk için.

³⁶ Kim biçer, hak alêr, bereket diveç yaşamak için toplêêr. Onuştan ekici hem biçici barabar sevineceklär.

³⁷ Onun için dooru o söz, ani deer: „Birisi eker, ama başkası biçer“.

³⁸ Bän yolladım sizi, biçäsiniz, neredä siz işlämediniz, ama başkası işledi, siz dä pay alêrsınız onnarın işlerindän».

³⁹ Çoyu samariyalılar bu kasabadan inandılar İisusa karının laflarından, angısı, şaatlık edip, dedi: «O söledi bana hepsini, ne yaptım».

⁴⁰ Onuştan, açan geldilär samariyalılar Ona da yalvardılar, kalsın onnarda, O kaldı orada iki gün.

⁴¹ Sora inandılar taa çokluk Kendi İisusun laflarından.

⁴² Onnar dedilär karıya: «Şindi inanêrız diil senin laflarından, ama kendimiz işittik hepsini da annadık, ani hakına Odur dünneyin Kurtarıcısı /Hristos/».

Öndercinin oolu saa oldu

⁴³ İki gündän sora İisus yollandı oradan da gitti Galileyaya.

⁴⁴ O Kendisi şaatlık etti, ani bir dä prorok diil hatırlanmış kendi duuma erindä.

⁴⁵ Açan geldi Galileyaya, orada Onu kablettilär, zerä onnar da yortuya gittiydilär da gördüydülär hepsini, ne O yaptı yortu vakıdı İerusalimdä. Onnar da yortuda oradaydılar.

⁴⁶ İisus enidän döndü geeri Galileyanın Kana küüyünä, neredä suyu çevirdiydi şaraba. Kapernaum kasabasında bir padişah izmetkerin oolu hastaydı.

⁴⁷ Bu izmetkär işitti, ani İisus döndü İudeyadan Galileya erlerinä. O geldi İisusa da yalvardı, gelsin da alıştırsın onun oolunu, ani ölüm döşeendeydi.

⁴⁸ İisus dedi: «Siz, meraklı nışannar hem şaşmaklı işlär görmeyincä, inanmêêrsınız!»

⁴⁹ Padişahın izmetkeri dedi: «Saabi, gel, taa ölmediynän benim uşaam».

⁵⁰ İisus cuvap etti: «Git, senin oolun yaşayacek». O inandı İisusun sözünü da gitti.

⁵¹ Açan o taa yoldaydı, çırakları çıktılar ona karşı da söledilär, ani çocuk saa.

⁵² O sordu onnara: «Ne vakıt ona ii oldu?». Onnar cuvap ettilär: «Dün, edinci saatta onun yangını düştü».

⁵³ Bobası annadı, ani bu oldu ozaman, açan İisus dedi ona: «Senin oolun yaşayacek». O hem onun bütün evi inandılar.

⁵⁴ Bu ikinci nışan, ani yaptı İisus geeri İudeyadan Galileya erlerinä döndüktän sora.